Read Punu 2 Timothee 1 Bible Online

2 Timothee 1 - Punu bible

2 Timothee 1

¹Muganda egugu uiruyili ombu Paul. Nyimanengulu uba yilumbi yiJesus Christ mu duganu duNsambi na nyimasindugu usamuna pangini jimonyu aguvegu na Jesus Christ.

²Nyigusonini Timothee muana ami udurondu. Maboti maNsambi na dutandulu dumasumu na duvotsu bibi nagu mu diina diNsambi Tata na diJesus Christ Fumu etu!

³Nyigabusili Nsambi diboti agu nyisalili na murima agugaa na mbela nana bivunda biami bamamusalila. Nyigurangiminingi nyangu na mukolu na tsambu tsiami.

⁴Nyirangimini matsanga magu na nyirondi ugulaba yiri nyumuelaba nsangu.

⁵Nyirangimini yitu yingensa ayivu nagu ayimaleba na kaga agu Lois na nguji agu Eunice. Nyilabi yikivu nagu wandi.

⁶La dibandu nyigulubusili rie: Warisa pegulu jiNsambi aji gumadila ava nyimagusakiyila miogu.

⁷Mu mbari Yinyunyi agu Nsambi amatuvega agetuveyi goma tumba etuveyi mangolu na durondu na diela.

⁸Kabogu guyalaba yisonyi usingisili bumbeji buFumu etu na guyalaba yisonyi mu mbari nyiji muisi tsugu. Tumba warila maguga va mosi nami mu diambu diMusamu Uboti.

⁹Jandi amatugobula na amatunengila uba batu bandi tsiri mu diambu dibisalu bietu tumba mu diambu diduganu duandi na maboti mandi wandi. Maboti meni mamalabana na Jesus Christ mbe butamba busakasundu.

¹⁰Duganu duandi dumadugusu ava Mugobutsi etu Jesus Christ amarambuyila o dufu.

¹¹Nsambi amansola usamuna Musamu Uboti noba yilumbi na mulonsi

¹²la dibandu nyiwarili maguga memama. Tumba ngelabi yisonyi mu mbari nyijabi jandi agu nyimavayila yitu na nyijabi yiri ana mangolu ukelisa amavu nami te na yilumbu yieni.

¹³Warisa mambu mangensa ama nyimadulonsa amana mavu mawelimina uduka; warisa yitu na durondu abimatuvegu ava tumafubinina mirima na Jesus Christ.

¹⁴Kelisa amavu maboti na mangolu maYinyunyi yiNsambi oyitsani netu.

¹⁵Nyijabi yiri botsu abavu o Asie bamambusa; sinsa viri Phygele na Hermogene.

¹⁶Fumu afunisi yingeba yiandi ombu bisi ndagu Onesiphore mu mbari jandi amakwamusa temu tsipuela. Asamalaba yisonyi mu mbari nyimaba o tsugu.

¹⁷Vana ava amaruyila o Rome amatombanga te na amatasuna.

¹⁸Alasu yingeba va gusu Fumu vana yilumbu yieni. Ndeʼ guijabi bisalu biotsu abi jandi amansalila o Ephese.