Read Punu Philemon 1 Bible Online

Philemon 1 - Punu bible

Philemon 1

¹Muganda egugu uiruyili ombu Paul aguvu muisi tsugu mu diambu diJesus Christ nombu Timothee muana taji andi. Tuigusonini Philemon mbatsi etu mu yisalu.

²Va julu vana tuisonini bisi dibundu abebengum o ndagu agu na ndeʼ Appia yibusi yietu na tugelibini ndeʼ Archippe mu mbari gumalaba maguga wandi.

³Maboti maNsambi na duvotsu bibi nenu mu diina diNsambi Taji etu na diFumu etu Jesus Christ!

⁴Philemon, temu tsiotsu atsi nyisambilingi nyigurangimini

⁵mu mbari nyigulungu yiri batu baNsambi botsu begukakisi nana gumavayila Fumu Jesus yitu.

⁶Nyiwivuli Nsambi yiri dinonga adivu netuanu diutuwamusa utsiyisa miula amimatuvegu ava tumafubinina mirima na Christ.

⁷Mu diambu didurondu duagu nyimalaba nsangu jineni na nyimawarusu. Va julu vana gumalasa batu baNsambi botsu nsangu.

⁸La dibandu diuleba nyina musuga uguruma mu diina diChrist, ngerondi udivaga.

⁹Nyirondi yiri guvaga amavu mawelimina mu mbari guimarondi diuleba nyiji yinunu na nyiji o tsugu mu diambu diChrist.

¹⁰Nyigusonini mu diambu diOnesime aguvu nderi muana ami mu mbari ava nyimabila o tsugu amafubana murima na Christ.

¹¹Jandi asamaleba na tsongu ombu gagu tumba namunyi aji na tsongu ombu gagu nombu garni.

¹²Diuleba nyulaba munyongu nyumugabusa ombu gagu.

¹³Mbe nyironda umusikiga yiri onsalila va yivinga yiagu ava nyivu o tsugu mu diambu diMusamu Uboti.

¹⁴Pa dionyi digebandi nagu ngerondi ugubamiga. La dibandu ngaarondila udivaga te na gumadisinga.

¹⁵Diurungula uba yiri Onesime amakakana nagu yiri o gusu omueba nagu mutubu.

¹⁶Kokolu, guyamuemugengila nana muviga, avu uviolila muviga; namunyi aji muana taji agu mu diambu diChrist. Ka muna durondu du nyimurondi! Na nyitasi gulaba nsangu nandi mu mbari agaa yika muviga agu tumba amafubana murima na Christ.

¹⁷Kabogu pa jetu nagu tuna dinonga mudili nana nderi guindili.

¹⁸Pa amavaga dibi vo pa egusombi, kengili mu dionyi.

¹⁹Menu Paul nyigusonini na dikaka diami rie: Nyufuta nsombi andi. (Tanguji disawelimina ugurangimisa yiri ndeʼ wandi guna muganu nami.)

²⁰Kokolu muana taji ami, payili diambu diedidi mu diambu diFumu. Kwamusi mu mbari tuji baana bataji!

²¹Nyina yitu yiri gupayila adi nyiguwivuli, ne uviolila.

²²Pivingi mu mbari nyina yitu yiri Fumu owagula tsambu tsienu na tumuelabana.

²³Epaphras aguvu o tsugu nami mu diambu diJesus Christ egutindili mambolu.

²⁴Marc na Aristarque na Demas na Luc begutindili mambolu wandi, jogu baji bambatsi bami mu yisalu.

²⁵Maboti maFumu etu Jesus Christ mabi nenu!