Read Punu Hebreux 10 Bible Online

Hebreux 10 - Punu bible

Hebreux 10

¹Migaga mibaJuif migelasi tindi ngensa mivu, yika yibagunu yimambu maboti amoruga. Pagu tsieni tsinaletsina tsimigaga tsimawakusungu yilima na yilima. Tsie migaga na pagu tsimionyi tsiurungula udugusu batu aberuyi ombu Nsambi?

²Mbe batu abamayitsanga Nsambi bamaliomusungu mutubu mbe basamamueba na mbela; mbana pagu mbe tsimasuka.

³Tumba pagu tsimabarangimisanga masumu mogu yilima na yilima.

⁴Malungu mabangombi na babinsabi magorungula ugusula masumu, via!

⁵La dibandu ava Christ amaruyila va butamba amavosa na Nsambi rie: Ndeʼ gugerondi pagu vo miensili, tumba gumaba na nsala dunyuru duami.

⁶Gusamalaba ubueji na miensili mibibulu abimanyensu va yinyensulu yipagu, nesi pagu atsimagusula masumu.

⁷Mbana nyimavosa rie: Nsambi meʼ janduʼgu! Nyiruyi uvaga duganu duagu, nana dimasonugulu mu dibuku dimigaga.

⁸Tetega amavosa rie: Gugerondi pagu vo miensili mibibulu abimanyensu ugusula masumu na gugelabi ubueji na bionyi. Amadivosa ne amajaba yiri motsu mana mamasonugu mu migaga.

⁹Mbana amabuesa rie: Nsambi meʼ janduʼgu! Nyiruyi uvaga duganu duagu. Kabogu Nsambi amagusula pagu atsitega na amasinga Christ uba yivinga yitsionyi.

¹⁰Jesus Christ anovaga duganu duNsambi jetu botsu tumaliomusu mutubu ava dunyuru duandi dumavagululu pagu temu mosi mutubu.

¹¹Bavagulitsi bapagu botsu besali diteli yilumbu na yilumbu na bevagulingi pagu tsiogu atsigorungula ugusula masumu.

¹²Tumba Christ anomana uvagula pagu mosi buandi mu diambu dimasumu mabotsu amatsana mutubu va mabaala maNsambi.

¹³Evivi te na Nsambi osunsa bavinitsi bandi o tsi durumu duandi.

¹⁴Na pagu umosi buandi jandi amadugusu mutubu jogu abamaliomusu na masumu mogu.

¹⁵Adina Yinyunyi yiNsambi esingisili wandi. Amavosa rie:

¹⁶Pangini aji nyuvangana nogu pa bilumbu bieni bimavioga ajiji rie: Nyubalonsa migaga miami, nyumisona nesi va mirima miogu.

¹⁷Amabuela uvosa rie: Ngomuerangimina masumu mogu.

¹⁸Kabogu masumu manotandu pagu tsiugusula masumu tsisamamuevagulu, diwendi rie: tsigaa na tsongu.

¹⁹Kabogu baana bataji malungu maChrist mamatuvega musuga ukota o Mbura Ajivu Tindi Yingitsi,

²⁰ajimatudibululu ava dumbu dumapasiyila, diwendi rie: amatusolila nsila jigona ava amaveyila dunyuru duandi.

²¹Kabogu tuna yivunda yibavagulitsi bapagu yineni ayivu murumitsi uNdagu Nsambi.

²²Tubambinianu na Nsambi na murima umosi na yitu yidugu na tubianu na matasa masunda na nyuru atsimabuitsu na mamba malioma.

²³Tukelisianu ditasa dietu mu mbari jandi agumavangana pangini aji asigama.

²⁴Tulomisinianu yiri tuba na durondu na bisalu biboti.

²⁵Tuyabusa ubenguna va mosi nana divu yifu yibamosi. Tumba tulubusinianu mu mbari yilumbu yiFumu uruga yiruyi.

²⁶Vasaa pagu tsisusu atsiugusula masumu metu pa tuimavayingi na kanda mu mbari tumajaba ngensa.

²⁷Kabogu tubianu na goma ava tuivivili aniolabana ombu botsu abobusa Nsambi; diwendi rie: bunsonsi na muji uneni agusielasana.

²⁸Va temu migaga miMoise pa batu babeji nesi barieru bamavega mutu mbela, mutu eni amaboku tsiri ulasu yingeba.

²⁹Kabogu yika tsie pa mutu olensa Muana Nsambi? Yika tsie pa olensa malungu mapangini Nsambi amamaliomisa botsu? Yika tsie pa osienga Yinyunyi yiNsambi aguvu na maboti? Ka muna mukilu gu okilusu!

³⁰Tuijabi jandi agumavosa rie: Kabusulu pila ajiami, nyujigabusa. Amamuevosa rie: Fumu otabulila batu bandi bunsonsi.

³¹Divu diambu dineni uwakusu ombu Nsambi aguvu monyu.

³²Rangiminanu bilumbu bieni bitega. Dunojaba Mambu maNsambi dumawarila tindi maguga.

³³Temu tsimosi dumakilusu nolasu maguga va gusu batu ne nana dumafubana na basiisu abamalasu maguga.

³⁴Jenu dumalaba maguga va mosi na bisi tsugu na ava bamadupatulila biboti bienu dumasunsa mirima mu mbari dumajaba yiri dukivuna biboti abiviolili ubueji na abivu mutubu.

³⁵Kabogu duyadeda: dusaku o gusu.

³⁶Vengu duba na pugu yiri duvaga duganu duNsambi udila aji evangini nenu.

³⁷Bisonu bisonugu rie: Mua pesu temu tindi mua pesu jandi oyiruyi oruga, agotsinga.

³⁸Batu bami basungana bopayila yitu nodila monyu; tumba ngelabi ubueji na jandi oyigabusi murima andi nsima.

³⁹Jetu tugegabuyi mirima nsima yika jogu abetsiemuyi. Jetu tuimuvayili yitu na tumagobulu.