Read Punu Hebreux 12 Bible Online

Hebreux 12 - Punu bible

Hebreux 12

¹Jetu wetu tuji va gari bambeji beni. Kabogu tubusianu mabi na masumu ametukambisingi na tuwarisianu miendu mietu nderi tuivovini.

²Tugengilianu yisuisu ombu Jesus ojivu dibandu diyitu yietu na oyiyidugusu wandi. Asamadeda ne mu temu aji amagomununu va kurusu! Tumba amajaba nsangu ajiuba o gusu, amawarila yisonyi yidufu dukurusu na namunyi utsana etsani va mabaala maNsambi.

³Rangiminanu nana jandi amawarila divina dibavayitsi bamasumu! Kabogujenu wenu duyadeda!

⁴Ava dumagayinina na mutu mubi dusamaboku.

⁵Duyalibana yiri Nsambi amadulubusa nana nderi duji baana bandi. Amavosa rie: Muana ami guyalensa mukilu uFumu na guyatsora ava egusiembili;

⁶Fumu ekilisi agu erondi na edimbi baana bandi mikasa.

⁷Warilanu mukilu nojaba yiri Nsambi edukelisi nana baana bandi. Muana nyi agu taji agekilisi?

⁸Pa agedukilisi dugaa baana bandi duji baana babutsuari.

⁹Bataji betu bamatukilisa ne nana tumabayitsa. Kabogu tugorungula ukesunsa o tsi durumu duTata ajivu o julu yiri tudila monyu?

¹⁰Bataji betu bamatukilisanga mua bilumbu nana bamarondilanga. Nsambi etukilisi utuwamusa yiri tubagunu nandi.

¹¹Dingensa mukilu eni uituveyi munyongu tsiri nsangu tumba abamakilusu bolaba dusungugu o gusu.

¹²Kabogu sunsanu mirima duyamueba na yinoru!

¹³Wendanu na buranga yiri dugomuededa tumba duwangalana.

¹⁴Diwelimina uba na duvotsu na batu botsu. Wijianu nsanunu ajivu jiwelimina na Nsambi mu mbari agugotsana nana agolaba Fumu.

¹⁵Kebananu yiri mutu agovinda maboti maNsambi. Duyabagunu na dugundu, diwendi rie: kebananu yiri dugobivisa mirima mibatu na posulu tsienu.

¹⁶Kebananu yiri dugobagunu nana Esau omasumbisa buvunda buandi na diji dimosi.

¹⁷Duijabi o gusu amaronda mula utaji andi na diuleba amavonda na matsanga, umamuwimunu; diwendi rie: asamamuerungula ukalula diela.

¹⁸Jenu dusaa nana batu baIsrael. Bamatola o mukongu uSinai agu basamarungula ubemba na agumalula na muji. Ombu genu vesaa pisama nesi dimungi nesi mungudi.

¹⁹Ombu genu vesaa mimbanda nesi diufi adimalasa batu abamadigulu goma.

²⁰Diufi adimavosa rie: Pa yibulu yiubemba mukongu yiuboku na mamanyi.

²¹Ne Moise ava amagengila yijalala yieni amavosa rie: Nyimakambulu na nyireyimi!

²²Tumba jenu duiruyi o mukongu uSion o musiengi uNsambi aguvu monyu o Jerusalem aguvu o julu aguvu bivevi bibiansa.

²³Duiwendi o yibenguna yitsomi tsiNsambi, miina mogu mamasonu kala o julu. Duiwendi ombu Nsambi aguitabulili botsu bunsonsi nombu binyunyi bibasungama abamalunga.

²⁴Duiwendi ombu ojivu yilumbi yipangini jigona na o malungu matsatsu, amelasi yiri ama Abel magaa na tsongu nana maJesus.

²⁵Kebananu duyabusa ugulu jandi oyivosi. Lesa jogu basamarina mukilu ava bamabusila ugulu jandi omalonsanga va butamba tambusa na jetu, tugokilusu pa tuibusi ugulu jandi ojivu o julu ava etulubusili?

²⁶Mu temu eni diufi diandi dimasisana butamba tumba temu ejiji amavangana pangini rie: Ngosisana yika butamba tumba na julu wandi.

²⁷Ava evosili rie: Nyumuesisana, adina dilasi yiri bisundu biotsu biusisana na biutsiemuga yiri abigosisana biusiala.

²⁸Tugabusilinganu diboti ombu Nsambi mu mbari tutsana o tsi durumu duandi adugovinsu, kabogu tumusalilianu na goma na duyitsu adina diumulasa ubueji.

²⁹Nsambi etu avu nderi muji aguisielisini.