Read Punu Jacques 1 Bible Online

Jacques 1 - Punu bible

Jacques 1

¹Menu Jacques musalitsi uNsambi na uFumu Jesus Christ Nyisonini batu baNsambi abamapansiga yiari na yiari; mboluanu!

²Baana bataji bami, labanu nsangu ava dulabila maguga maminongu na minongu;

³mu mbari pa yitu yienu yiuwara nesi ava duilabili maguga, dumawara.

⁴Tumba lubuganu yiri dugoledunda te na dumajaba Owara mu motsu, diwendi rie: te na dumadugu.

⁵Pa mutu agaa na diela adivondi ombu Nsambi oyidiveyi ombu botsu na yingeba yiandi ne uviolila na diumuvegu.

⁶Adivondi na yitu tsiri utumuna paga mu mbari jandi oyitumuni pagu ebagunu na mibiji mimubu amifundulu nosindulu yiari na yiari na punga.

⁷Mutu umunongu eni ayatasa yiri odila yima ombu Fumu

⁸mu mbari ana mabeʼ mabeji na agaa asigama.

⁹Muana taji aguvu yifufu asangili ava Nsambi omumatisila

¹⁰na aguvu muneni asangili ava osundusulu. Munongu mosi nana kembu jibisinga jikuduyili, buneni buandi butsiemuga wandi.

¹¹Ava nyangu jibalili jigumusi bisinga na kembu jibionyi jibonduyi na ubueji ubionyi uitsiemuyi; anana muneni osundusulu mu bisalu biandi biotsu.

¹²Ka muna ubueji gu mutu aguiwarili dumangu olaba! Anomana uwelugu odila monyu. Monyu eni uvu nderi dugaba adu Fumu amavangana uvega ombu jogu abemurondi.

¹³Ava mutu emangulu ayavosa rie: Nsambi embangi. Nsambi agorungula umangu na agemangi mutu.

¹⁴Mutu emangu ava jaʼ beni ekegusulila ombu Nsambi na esingi urumu na nsala tsiandi.

¹⁵Yiotsu ayi edisingi evayi masumu na masumu meni morungula umuduta o dufu.

¹⁶Baana bataji bami badurondu duyakedunsa:

¹⁷maboti motsu na pegulu tsiotsu tsiwelimina tsiruyili o julu ombu Taji agumasunda bijalala bijulu. Agekaluyi na agaa na yilinsima.

¹⁸Mu duganu duandi na Mbembu jingensa jandi amatusunda yiri tuba abatega va gari bisundu biotsu.

¹⁹Baana bataji badurondu dijabianu rie: mutu alegulu na buranga, ayasundila ukala vo unyoga

²⁰mu mbari kabu jigedugusu dusungugu duNsambi.

²¹Kabogu busanu nsoruru tsiotsu na minongu miotsu mimbivulu na kelisanu malongi ama dumalonsu na monyi modugobula.

²²Duyakedunsa! Pa duigulu Mambu maNsambi, madukianu wandi.

²³Jandi oyigulu yika ugulu na agemaduki ebagunu na mutu aguigengili yinsi yiandi mu dumuenu.

²⁴Anomana ugengila ewendi na vana vana elibini nana atsilabila.

²⁵Pa mutu otsiyisa migaga miNsambi amijeyisi mutu na pa oba na yikanana umigulu nonaiduka na pa agaa na biliba jandi aguna ogabulu mula mu mbari aji muvayitsi umionyi.

²⁶Pa mutu etasi yiri aji mu muyitsa na agaa na yidamamba ekedunsa na muyitsa andi ugaa na tsongu.

²⁷Pa mutu erondi muyitsa ungensa agu Tata Nsambi esingi alingulingi bisiana na bakuili ava bavu mu maguga na akekelisa yiri agofuama nsoruru tsibulongu.