Read Punu Jacques 3 Bible Online

Jacques 3 - Punu bible

Jacques 3

¹Baana bataji duyaronda uba milonsi mu mbari duijabi yiri jetu tusosisu uviolila basusu.

²Jetu botsu tuitsimbu mu mambu mapuela. Pa mutu agetsimbu na posulu, amadugu; orungula ukekelisa mu motsu.

³Pa tuisunsi madilu mu miunu mibakabala botugulu na tuiwendisi nyuru tsiogu.

⁴Labatianu dikumbi: ne divu dineni na mingudi midisindili, diusungugu yika na yivepi yigeyi nana mubeyitsi erondili.

⁵Munongu mosi dulimi duvu yima yigeyi tumba duibungi mambu maneni. Mua muji urungula unyensa musiru uneni.

⁶Dulimi duvu nana muji. Duvu nana bulongu bubasa de na mabi, kabogu duonyi duibivisi nyuru tsiotsu ne duvu yika yilema yimosi duibivisi nsanunu tsiotsu mu mbari duvu nderi muji agumabangusu o bulungi.

⁷Minongu miotsu mibibulu na mibilandila na minyama tsimamba bilonsu nabimalonsu kala.

⁸Tumba ne mutu mosi agorungula ulonsa dulimi. Duonyi la dibi adigosungugu, duvu na bipovu.

⁹Tuiyitsi Fumu na Taji etu na duonyi na tuisiengi batu abamasundu na yibagunu yiNsambi.

¹⁰Mambu maduyitsu na madilensa mepalili munu mosi. Baana bataji bami disawelimina nana!

¹¹Je yileka yipalisi mamba maposi na mamba maleluga?

¹²Je mumanga urungula ubura malanga mafubu vo malanga mafubu morungula ubura mimanga? Mamba makali magorungula ukaluga mamba maposi.

¹³Anyi ana dieia na dujabu? Jandi guna alasi usigama uandi na bisalu biboti na bifu biboti.

¹⁴Pa duna diwavi na duitsundingi duyakedodisa, diwendi rie: duji bafuritsi.

¹⁵Dieia dieni digeruyili o julu tumba divu dieia dibutamba buebubu, divu dibumutu na didiabu.

¹⁶Ava diwavi na mitsundu bivu vavu kulini na minongu miotsu mimambu mabi.

¹⁷Tetega dieia adiruyili o julu divu dilioma na va julu vana divotsi mirima mibatu, divu na buvolamabombu na divu na yisagumunu, divu na yingeba na disali bisalu biboti. Digaa na mabeʼ mabeji vo penda.

¹⁸Mutu ojivu na duvotsu evotsingi basusu wandi na duvotsu dueni duiveyingi batu nsanunu tsisungama.