Read Punu 1 Pierre 1 Bible Online

1 Pierre 1 - Punu bible

1 Pierre 1

¹Menu Pierre, yilumbi yiJesus Christ nyisonini jogu abamasolu na Fumu abavu yiari na yiari: o Pont no Cappadoce no Asie no Bithynie.

²Dumasolu na duganu duN sambi Tata na maboti maYinyunyi yiNsambi yiri dudedila Jesus Christ noliomusu na malungu mandi. Maboti maNsambi na duvotsu bibi nenu.

³Diboti ombu Nsambi Taji Fumu etu Jesus Christ! Mu maboti mandi amatuvega monyu ava amarambusila Jesus Christ o dufu. La dibandu tuna ditasa adivu monyu

⁴na turungula usangila mu diambu dipangini aji Nsambi amavangana na abandi. Pangini ajigorungula ubunsu nesi utsiemuga nesi ukubuga.

⁵Te na temu eni dukelusu na mangolu maNsambi mu mbari dumamuvayila yitu; dukelusu te na dugobulu tindi ugobulu va temu ajiusita.

⁶Labanu nsangu ne pa namapapa dulaba mirima mitsira mu diambu dimaguga maminongu na minongu.

⁷Maguga meni meduruyili ulasa yeri yitu yienu yivu yiwara. Ne lora ajiurungula ubungana jipitsulu na muji; kabogu yitu yienu ayivu uviolila lora ubueji yigomangu? Mbangulu tsivu uwarisa yitu yienu yiri ava Jesus Christ oruyila duba na duyitsu na bundumba na digoba.

⁸Jenu duimurondi ne dusakamulaba; ne dusakamulaba dumamuvayila yitu na duilabi nsangu uviolila.

⁹Dudila adivu dibandu diyitu yieni, diwendi rie: dugobutsu.

¹⁰Mu diambu didugobutsu dueni babiyitsi bamaronda tindi udutsiyisa va julu vana bamabiga yiri Nsambi odugabila miula.

¹¹Bamaronda ujaba temu na mabandu maduonyi; Yinyunyi yiChrist agumatsana nogu amabalubusa rie: Christ olelaba maguga mbana okota o bundumba buandi.

¹²Nsambi amalubusa babiyitsi yiri malongi ama bolonsa magoba majogu beni tumba bolonsa mu diambu dienu. Diwendi rie: ava bamabiyilanga mangensa bamaduvindiyila mambu ama mbe duksakagulu. Barnaba bilumbi biMusamu Uboti abamalonsa na mangolu maYinyunyi yiNsambi agumaruyila o julu, tsiri mu diambu disusu yika udulonsa ngensa. Nesi biansa berondi utsiyisa ngensa eni.

¹³La dibandu warisanu dujabu duenu, banu na ditasa udila pegulu tsiNsambi atsi dugabulu ava Jesus Christ oruyila.

¹⁴Dedilanu Nsambi, duyasinga yiri nsala tsienu tsiumueduruma nana ava mbe dukivu biduka.

¹⁵Tumba banu na nsanunu ajisoyini na jandi omadunengila, diwendi rie: Nsambi.

¹⁶Mu mbari Nsambi amavosa rie: Banu aba Nsambi mu mbari menu la Fumu Nsambi enu.

¹⁷Ava duisambili duinengili Nsambi Tata, jandi oyitabulili batu botsu bunsonsi buwelimina na agaa na dupasu. La dibandu ava dukivu na temu muyitsianu.

¹⁸Ka muna dufunu du dumafutu udugobula, diwendi rie: udujeyisa mu nsanunu tsienu tsikulini atsi bivunda bienu bimadulonsa. Jabanu yiri dusamagobululu nabima abibungini nana mbongu vo lora.

¹⁹Ava mbe dukivu na nsanunu tsikulini atsi dumawiji ombu bataji benu dumagobulu na malungu maChrist ojivu nderi yindombu ayigaa na yifu.

²⁰Christ amasolu na Nsambi mbe bulongu busakasundu na amalabana va temu ejiji mu diambu dienu.

²¹Mu diambu diChrist dumavayila Nsambi yitu jandi agumarambusa Christ o dufu na amamukotisa o bundumba; kabogu ditasa dienu na yitu yienu bigengili Nsambi.

²²Jenu dunodedila mambu mangensa dumaliomusu kabogu banu na durondu dudugu, rondasananganu na murima umosi.

²³Mu mbari dumaburu duburu dugona tsiri na bataji abefuangingi tumba na Taji agugefu, aguvu monyu umutubu.

²⁴Bisonu bisonugu rie: Mutu uotsu avu nderi bisinga na bundumba buandi buotsu buvu nderi kembu jibionyi. Bisinga bigumuyi mbana kembu jibonduyi.

²⁵Tumba mambu maFumu metsingi mutubu. Mambu meni ama dumagulu ava Musamu Uboti umasamununu.