Read Punu Bansonsi 14 Bible Online

Bansonsi 14 - Punu bible

Bansonsi 14

¹Yilumbu yimosi Samson amawenda o Timna na amayelaba numba jimuPhilistin.

²Ava amagabuyila amatsingula taji andi na nguji andi rie: Nyimalaba numba jimuPhilistin o Timna, mukwelilianu.

³Taji andi na nguji andi bamamuwivula rie: Baana bataji bagu bagaa na banumba na batu betu botsu bagaa na baana babagetu? Adina digurombisi uwelana na muPhilistin? Gugejabi bagekipi durebu? Tumba Samson amaruma taji andi rie: Mukwelili mu mbari nyimurondi.

⁴Kabogu taji andi na nguji andi basamajaba yiri dionyi dimaruyila ombu Fumu; mu mbari Fumu uramba erambili baPhilistin murambu. Va temu eni baPhilistin bamarumanga baIsrael.

⁵Samson amawenda na taji andi na nguji andi o Timna; ava bamatolila va nungi tsiTimna amalaba mumfumfu uyimbungu agumayemubengusana nogumba.

⁶Samson amagaangu na Yinyunyi yiFumu; diuleba asamaba na yima va dikaka, Samson amapasa yimbungu nana bepasili muana yinsabi. Asamatsingula taji andi na nguji andi adi amavaga.

⁷Mbana amawenda uyevosa na mugetu uPhilistin; Samson amamuronda.

⁸Mua bilumbu binovioga amamuegabuga uyemuwela; amapembuga uyelaba yibindi yiyimbungu, amalaba yisila yibuji mu yibindi yiyimbungu.

⁹Amabonga buji abu amayenajanganga muna nsila; ava amabambinina na taji andi na nguji amabagabila wandi na bamaji. Tumba asamabatsingula yiri amabongila buji bueni mu yibindi yiyimbungu.

¹⁰Taji Samson amagabuga uyewelila muana andi mugetu; avana Samson amalisa batu mulambu udiwela; ayina yimaba yifu yibafudu.

¹¹Yika baPhilistin bemulabi bamanengila magumarieru mabambatsi uyeji nandi.

¹²Samson amabatsingula rie: Nyirondi udusavila dusavu; pa dudupindiyila mu yisambuali yibilumbu bimulambu na pa dudutubula nyuduvega magumarieru mabijungi na magumarieru mabiduaru bifeta.

¹³Tumba pa dugorungula upindiyila yika jenu dupega magumarieru mabijungi na magumarieru mabiduaru bifeta. Bamamuwaka rie: Sava dusavu duagu, jetu tudugulu.

¹⁴Kabogu amabasavila rie: Mu jandi oyiji mumapalila ayiligu, mu mangolu mumapalila ayivu dueyi. Te na bilumbu birieru basamarungula utubula dusavu.

¹⁵Yilumbu yimusambuali yinotola bamaruma mugatsi Samsbn rie: Sovisa mulumi agu, akatuvindiyila dusavu duandi; pa tsi nana tugunyensa va mosi na ndagu jitaji agu. Kabogu dumatunengila uyitupatula biduaru bietu, mbeya?

¹⁶Mugatsi Samson amalilanga notatanga rie: Guipini, gugetondi; gumasavila batu bami dusavu na gugepindiyili duonyi! Jandi amawaka rie: Nyisamaduvindiyila ne taji ami ne nguji ami; yika ndeju agu nyuduvindiyila?

¹⁷Amamutatilanga te na yisambuali yiotsu yibilumbu bimulambu; yilumbu yimusambuali amamuvindiyila duonyi mu mbari amamutsoyisanga. Mugetu amayetubulila batu bandi divindugulu didusavu dueni.

¹⁸Bisi musiengi bamawivula Samson mu yilumbu yimusambuali ne wisi ukatsima rie: Yi yiviolili buji dueyi? Yi yiviolili yimbungu mangolu? Mbana Samson amabatsingula rie: Mbe dusamasalisa muana ngombi ami mbe dusamajaba divindugulu didusavu dueni.

¹⁹Mbana Samson amagaangu na Yinyunyi yiFumu. Amawenda o Ascalon amayeboka magumarieru mababaala; amabavula biduaru biogu; amavega biduaru bifeta ombu jogu abamatubula dusavu duandi; mbana amawenda na kabu jineni o ndagu jitaji andi.

²⁰Mugatsi andi amavegu ombu mbatsi andi jimosi ajimaleba tindi mbatsi murima.