Read Punu Bansonsi 15 Bible Online

Bansonsi 15 - Punu bible

Bansonsi 15

¹Mua temu jinovioga, va temu jidutsonsugu duble Samson amayelaba mugatsi andi na amamubeyila muana yinsabi. Amavosa rie: Nyirondi mugatsi ami. Tumba taji mugatsi andi amabusa.

²Jandi rie: Nyimatasa yiri gugemurondi kabogu nyimamuvega ombu mbatsi agu. Je ngebi andi agemuviolili ubueji? Bonga jandi guna va yivinga yiandi.

³Samson amabatsingula rie: Temu ejiji pa nyuvaga baPhilistin dibi, adina digoba va julu muru ami.

⁴Samson amayenawenda. Amagaanga kama yirieru tsibitsalala na amabonga bitutu; mbana amabengusana muyila na muyila na amavakiga yitutu va gari.

⁵Mbana amabangisa bitutu na amanyambisa bitsalala mu ble tsibaPhilistin na amanyensa maguki mabibutu bible ubandila o tsi te no manungi mamioliva.

⁶BaPhilistin bamawivula rie: Anyi amavaga nana? Bamawaka rie: Samson boji bubaTimna mu mbari bamamupatula mugatsi andi na bamamuvega ombu mbatsi andi. BaPhilistin bamawenda; bamayenyensa mugetu eni na taji andi mbisu.

⁷Samson amabawivula rie: Je anana duivayili? Ngodunda te na nyudugabusila pila.

⁸Amabagudisa tindi ugudisa mbana amawenda uyetsana o dilima didimanyi diEtam.

⁹Mbana baPhilistin bamawenda uyevaga milaku o Juda te no Lehi.

¹⁰BaJuda bamawivula rie: Dibandu yi dutsiruyila uyitutoyisa? Bamawaka rie: Tumaruga uyitunga Samson yiri tumuvayila nana amatuvayila.

¹¹Adina dimarombisa tosini yirieru tsibaJuda uwenda o dilima didimanyi diEtam noyewivula Samson rie: Gugejabi yiri baPhilistin utsoyisa betutsoyisi? Diambu yi gumatuvayila? Amabawaka rie: Nyimabavayila dibi munongu mosi nana bamapayila.

¹²Bamamutsingula rie: Jetu tutsiruga uyigutunga mbana tuguwakisa ombu baPhilistin. Samson amabatsingula rie: Ndevilianu pesi yiri jenu beni dugomboka.

¹³Bamamuwaka rie: Nyiina; dimosi buandi tugutunga noguwakisa ombu gogu; tugoguboka. Bamamutungisa na mikudu mibeji migona na bamamupalisa o gari dilima didimanyi.

¹⁴Ava amatolila o Lehi baPhilistin bamagamuga ava bamayemubengusinina. Mbana amagaangu na Yinyunyi yiFumu. Mikudu amimamutungulu miogu mimakaluga nderi nyongi atsimanyensu na mimasundila ubonduga.

¹⁵Amalaba mubaka uburu ajibanoboku, amasamba dikaka amagubola na amaboka tosini jibabaala na uonyi.

¹⁶Mbana Samson amavosa rie: Na mubaka umosi uburu, labatianu diguki dimosi nesi mabeji mabamfumbi! Na mubaka umosi uburu nyimabokila tosini jibabaala.

¹⁷Anomana uvosa amabuaga mubaka eni, bamaluga mbura eni Ramat-Lehi diwendi rie: mukongu umubaka.

¹⁸Samson amagaangu na tindi puila mamba na amatatila Fumu rie: Tsiri ndeʼ agumansingisa uvaga diambu diedidi dineni? Va julu vana nyufu na puila na nyugaangu na ababa abasarebu?

¹⁹Mbana Nsambi amapasa dimanyi adimaba o Lehi na dionyi dimapalisa mamba. Samson amanu na puila andi jimasuka na amamuedila mangolu. Avana bamaluyila yileka yieni yileka yiCore, yikivu o Lehi te na namunyi.

²⁰Samson amaba nsonsi o Israel magumabeji mabilima va temu baPhilistin.