Read Punu Bansonsi 19 Bible Online

Bansonsi 19 - Punu bible

Bansonsi 19

¹Va temu eni o Israel usamaba kaga, muisi Levi agumatsananga o julu mukongu uEfraim, amabonga mugetu agumaba muisi Bethleem o Juda.

²Mugatsi andi amavaga buvuyisa, mbana amayenagabuga o ndagu taji andi o Bethleem o Juda; amatsana guna miweli mina.

³Mulumi andi amamuduka; amaronda ukunsa diambu diogu noyenamugabusa o dimbu diandi. Amamuduka na musalitsi andi na buru beji. Mugatsi amamukotisa o ndagu taji andi. Taji mugetu amamulaba ava amaruyila, amayemubengusana na nsangu.

⁴Boji buandi agumaba taji muana mugetu amamusikiga na amatsana bilumbu birieru nandi; bamaji, bamanu na bamasilama.

⁵Yilumbu ayimuina bamarambuga kedi jineni na muisi Levi amaba na ditasa uwenda. Tumba taji mugetu amatsingula boji buandi rie: Bonga mua biguji utunga mfiba mbana dukayenawenda.

⁶Jogu botsu babeji bamatsana va mosi; bamaji na bamanu. Mbana taji mugetu amatsingula boji buandi rie: Letsanati nolaba nsangu va mosi netu.

⁷Mulumi amaronda uyenawenda; tumba boji buandi amamutsotsa umuesilama, kabogu amamuesilama mukolu ususu.

⁸Yilumbu ayimuranu amarambuga kedi jineni na ditasa uwenda. Mbana boji buandi amamutsingula rie: Kokolu tsiagu letunga mfiba; gukatsana te na wisi utsima. Jogu botsu babeji bamaji.

⁹Mulumi amamuerelama na ditasa uwenda na mugatsi andi na musalitsi andi; tumba boji buandi amamutsingula rie: Labati, wisi umawenda na yika utsima uitsimi, kabogu muesilamati nolaba nsangu va mosi netu. Mugesa gurambuga kedi jineni nowenda te no dimbu diagu.

¹⁰Mulumi asamaronda umuesilama kabogu amayenawenda. Amatola te no Jebus, aguvu Jerusalem na buru tsiandi beji atsimatungu bitsiga na mugatsi andi.

¹¹Ava bamatolila bebeli na Jebus wisi mbe umawenda, musalitsi amatsingula fumu andi rie: Tʼwendianu o musiengi Jebus tukayesiliminanu guna.

¹²Fumu andi amamugabusila rie: Tugokota o misiengi mingana amigaa mibaIsrael, tuwendanu te no Guibea.

¹³Amamuetsingula musalitsi andi rie: Tʼwendianu o mbura mosi va gari tsiotsu tsibeji nesi Guibea vo Rama, tukayesiliminanu guna.

¹⁴Bamayenawendanga ne wisi umatsima ava bamabila bebeli na Guibea aguvu musiengi uBenjamin.

¹⁵Bamapembuga o yiari yieni uyesilimina o Guibea. Bamakota na bamayesikama va dulombili. Mutu asamabadila o ndagu andi uyesilama.

¹⁶Bamalaba yinunu agumaruyila tsisiga o usala o musiru; dibaala dieni amaba muisi mukongu uEfraim na amatsaninanga o Guibea tumba bisi mbura eni bamaba baBenjamin.

¹⁷Anobuaga misu amalaba mulinsi o dulombili. Yinunu yieni amamuwivula rie: Agunyi guiwendisini? Agunyi guiruyisini?

¹⁸Amamuwaka rie: Tuiruyisini o Bethleem o Juda, tuiwendi o mukongu uEfraim agu nyimaburulu. Nyimawenda o Bethleem o Juda, yika ugabuga nyigabuyi o ndagu ami. Tumba vagaa mutu oyindili o ndagu andi,

¹⁹diuleba tuna biguji bibaburu betu nesi biguji na malamu bijetu beni; diwendi rie: Meʼ beni na mugatsi ami na musalitsi ami. Tugegambu na yima.

²⁰Yinunu yieni amavosa rie: Sunsa murima! Nsala tsiagu tsiotsu tsikengili, gugosilimina o dulombili.

²¹Kabogu amabakotisa o ndagu andi na amavega baburu biguji. Balinsi bamasusa makulu; mbana bamaji na bamanu.

²²Ava bamajanganga, bisi musiengi abamaba batu babi bamakanda ndagu, mbana bamadukisa; bamaruma fumu ndagu rie: Palisa dibaala aditsikota o ndagu agu, tuirondi ufubana yitsiga nandi.

²³Fumu ndagu amapala na amabatsingula rie: Kokolu tsienu baana bataji bami, duyavaga dibi; dibaala diedidi atsikota o ndagu ami, kabogu duyavaga nsoruru tsienu.

²⁴Labatianu nyivu na muana mugetu agukivu tsiemi na dibaala diedidi avu na mugatsi; nyuduwakisa abana o gusu kana; dukababivisa nana duirondili. Tumba duyavaga nsoruru tsimunongu eni ombu dibaala diedidi.

²⁵Babaala beni bamabusa umugululu. Kabogu muisi Levi eni amabapalisila mugatsi andi. Jogu bamamubivisa mukolu uotsu te na mavuvungi mbana bamamudunda.

²⁶Ava matebugulu mugetu eni amayeberuga va dikotulu dindagu jiyinunu yieni agu mulumi andi amaba; amaba vana te na wisi umatebuga.

²⁷Ava kedi mulumi andi amasimbuga; amadibula diguyi na ditasa uyenawenda. Tumba amalaba mugatsi asilama va tsi va dikotulu dindagu na makaka mandi mamaba va julu yilemondi.

²⁸Amamuruma rie: Simbuga, tʼwendi. Mugetu asamawagula. Mbana mulumi amanangiga mfumbi jimugatsi andi va julu buru na bamayenawenda o dimbu diogu.

²⁹Anotola o ndagu andi amabonga dibaga mbana amasasa mfumbi andi yigumi na bibuku bibeji abi amatinda o biari biotsu biIsrael.

³⁰Botsu abamadigulu bamavosanga rie: Tusakagulu diambu dimunongu egugu na disakalabana yiotsu ayi baIsrael bamapalila o Egypte te na namunyi; ditasianu, digengilianu na divosianu!