Read Punu Bansonsi 2 Bible Online

Bansonsi 2 - Punu bible

Bansonsi 2

¹Yilumbi yiFumu amarambuyila o Guilgal uwenda o Bokim, amavosa rie: Nyimadupalisa o Egypte na nyimadubega o bulongu abu nyimavangana uvega bataji benu. Nyimavosa rie: Ngobunsa pangini ami nenu te na mutubu.

²Kabogu duyavangana pangini na bisi bulongu buebubu, dupansa binyensulu biogu bipagu. Tumba dusamadedila diufi diami. Dibandu yi dumavayila nana?

³La dibandu nyimavosila rie: Ngodubingisila batu beni tumba botsananga va mosi nenu na bansambi bogu boba murambu enu ava dubayitsilanga.

⁴Yilumbi yiFumu anomana utsingula baIsrael mambu meni motsu batu bamalila na munyongu.

⁵La dibandu bamaluyila mbura eni Bokim na bamavagulila Fumu pagu tsiunyensa vana mbura eni.

⁶Josue amaganina dibuji, baIsrael bamawenda yifumba yifumba o disiala diandi uyedila bulongu.

⁷Batu bamasalila Fumu yitsingu yiotsu yiJosue nesi va yitsingu yiotsu yibivunda abimavinganga Josue abimalaba mambu motsu maneni ama Fumu amavayila baIsrael.

⁸Josue muana dibaala uNoun, musalitsi uFumu amafu ava amabila kama na yigumi yibilima.

⁹Bamamutsiyila o Timnat-Heres o yiari ayi amadila ava bulongu bumagabulu o mukongu uEfraim o banda jimukongu uGaach.

¹⁰Dukula dueni duotsu dumafu na vamalabana dukula dususu adumavinga adutega aduna dusamajabanga Fumu nesi ama amavayila baIsrael.

¹¹Kabogu baIsrael bamavaga amasamalasa Fumu ubueji na bamayitsila baBaal.

¹²Bamaliyila Fumu Nsambi bataji bogu nsima agumabapalisa o bulongu buEgypte na bamakota miyitsa mibansambi bangana; bansambi babatu abamaba yiari na yiari bebeli nogu; bamabagudimina te na bamanyoyisa Fumu.

¹³Bamaliyila Fumu nsima na bamayitsa baBaal na baAstarte.

¹⁴Fumu amanyoyila baIsrael tindi kabu. Amasingisa badayitsi ubadayila, na amabawakisa ombu bavinitsi bogu abamaba yiari na yiari na basamamuerungula ugagana nogu.

¹⁵Mbura tsiotsu atsi bamawendanga, Fumu amabalasanga maguga nana Fumu amavosila na nana Fumu amabalevila pesi. Adina dimabarombisa tindi munyongu.

¹⁶Tumba Fumu amabapalisilanga bansonsi abamabawaka kalala ombu jogu abamabalasanga maguga.

¹⁷Tumba baIsrael basamagululu nesi bansonsi bogu mu mbari bamakekotisa o miyitsa mibansambi bangana na bamabagudimina. Bamasundila upembuga nsila aji bataji bogu bamadukanga na basamadedila migaga miFumu nana bataji bogu bamamidedila.

¹⁸Ava Fumu amabapalisilanga nsonsi, Fumu amabanganga na nsonsi na asamabawakisanga ombu bavinitsi bogu mu yitsingu yiotsu yinsonsi eni; Fumu amagulungu bibimu biogu ava batu bamabatsoyisilanga kabogu amabalasanga yingeba.

¹⁹Tumba nsonsi anofu bamamuekebivisa ne uviolila bataji bogu ava bamakotilanga miyitsa mibansambi bangana nobagudiminanga. Basamadunda bifu biogu bibi na bamabanganga na mirima migala.

²⁰Mbana Fumu amanyoyila baIsrael tindi kabu na amavosa rie: Batu bebaba bamabunsa pangini ami aji nyimavangana na bataji bogu na basamadedila diufi diami,

²¹kabogu ngomuebapansila ne bulongu bumosi va gari malongu ama Josue amasila ava amafuila.

²²Na malongu meni nyuweliyila baIsrael ujaba yeri bokevega undedila dedi mosi na bataji bogu vo bobusa diufi diami.

²³Fumu asamasundila ubinga bisi malongu mamosi, diwendi rie: ama Josue asamadila.