Read Punu Bansonsi 21 Bible Online

Bansonsi 21 - Punu bible

Bansonsi 21

¹BaIsrael bamagana kaka o Mispa rie: Ne mutu mosi va gari etu ayawetsa muana andi umugetu na yifumba yiBenjamin.

²Batu bamagabuga o Bethel, bamatsana vana ulilanga va gusu Nsambi te na tsisiga.

³Bamawivula rie: Aa Fumu Nsambi Israel dibandu yi diambu diedidi dimalabinina yiri yifumba yimosi yiIsrael yiutsiemuga tindi utsiemuga?

⁴Bamarelama kedi jineni na bamarunga yinyensulu yipagu vana na bamavagula pagu tsiunyensa na pagu tsikabusulu tsimaboti.

⁵BaIsrael bamawivula rie: Yifumba yi va gari bifumba biotsu biIsrael ayisamawenda o yibenguna yiFumu? Tusamagana kaka yiri uotsu agugowenda ombu Fumu o Mispa aboku?

⁶Tumba baIsrael bamakalula diela mu diambu adimalabana ombu baana bataji bogu baBenjamin na bamavosanga rie: Namunyi yifumba yimosi yiIsrael yimagusulu.

⁷Yi tuvaga udilila baBenjamin abavu monyu bagatsi? Tsia tumagana kaka va gusu Fumu yiri tugowetsa baana betu babagetu nogu?

⁸Bamawivula rie: Va yifumba va gari bifumba biIsrael ayisamawenda ombu Fumu o Mispa?

⁹Banovaga sansama, vasamalabana ne mutu umosi uYabech o Galaad.

¹⁰Mbana dibuli dimasindiga yigumi na tosini beji tsibagora na bamabaruma rie: Wendanu yibokanu bisi Yabech o Galaad nesi bagetu nesi baana.

¹¹Adi duvaga adidi: dukaboka dibaala diotsu nesi mugetu uotsu abamajaba ufubana yitsiga udugusu mugeli.

¹²Bamarasuna kama jina tsibatsiemi va Yabech o Galaad na bamababega o milaku o Silo aguvu o bulongu buCanaan.

¹³Dibuli diotsu dimatinda bilumbi biduvotsu uyetsingula baBenjamin abamaba o dimanyi diRimmon.

¹⁴Vana temu eni baBenjamin bamagabusila na bamabavega bagetu abasamaboku va Yabech o Galaad; tumba basamadugunu nogu.

¹⁵Kabogu batu bamakalula diela mu diambu dibaBenjamin mu mbari Fumu amatsiemusa yifumba yimosi yiIsrael.

¹⁶Bivunda bidibuli bamawivula rie: Yi tuvaga yiri jogu abasakadila bagatsi bobadila? Tsia bagetu babaBenjamin bamaboku?

¹⁷Bamabuesa rie: Jogu abamasialulu badili abamaleba babaBenjamin yiri yifumba yimosi yigotsiemuga o Israel.

¹⁸Tumba tugorungula uwetsa baana betu babagetu nogu; mu mbari tumagana kaka ajiji rie: Mulogu ubi na jandi aguwetsa muana andi na muisi Benjamin!

¹⁹Kabogu bamavosa rie: Yilima na yilima bejangingi feta jiuyitsila Fumu o Silo o banda Bethel o yiari ayi wisi epalili muna nsila Bethel na Sichem ho tandu jiLebona.

²⁰Mbana bamalonsa baBenjamin dilongi diedidi rie: Wendanu uyeviva o manungi;

²¹ava dulabila banumba baSilo bopalila o uyina jenu wenu dukapala o gari tsimamanyi, dukagaanga mutu mutu numba mosi jiSilo ajiuba mugatsi andi mbana dukayenarina o bulongu bubaBenjamin.

²²Pa bataji bogu nesi baana bataji bogu bababaala boruga uyitutatila tubatsingula rie: Tusingisianu dionyi mu mbari tusamabongila mutu mutu mugatsi o divita. Tsiri jenu adumabavega bagetu beni; mbe nana mbe dumakubula kaka.

²³Adina baBenjamin bamavaga: bamagaanga bagetu abamaba bayinitsi dedi na dutalu duogu uba bagatsi bogu. Mbana bamayenagabuga o mbura tsiogu; bamamuerungulila misiengi na bamatsana.

²⁴Mbana baIsrael bamayenagabuga; mutu mutu amagabuga o yifumba yiandi no mukuta andi no disiala diandi.

²⁵Vasamaba kaga o Israel va temu eni: mutu mutu amavaga adi amaronda uvaga.