Read Punu Bansonsi 3 Bible Online

Bansonsi 3 - Punu bible

Bansonsi 3

¹Malongu memana Fumu amasila nana uweliyila baIsrael, botsu abasamatoga mavita na bisi Canaan.

²Dimosi buandi amaronda yiri kula tsiotsu tsibaIsrael tsijabi nowiji utoga mavita.

³Abamasalusu ubaweliga bamaba baPhilistin babiari biranu na bisi Canaan botsu na baSidon na baHivie abamatsaninanga o julu tsimikongu miLiban na mukongu uBaal-Heimon te no dikotulu diLebo-Hamat.

⁴Malongu meni mamasalusu ulasa Fumu yeri baIsrael bodedila migaga ami amavega Moise utsingula bataji bogu.

⁵BaIsrael bamatsananga va mosi na bisi Canaan na baHitt na baAmor na baPerizie na baHivie na baJebusie.

⁶Bamawela bagetu bogu na bamawetsa baana bogu bababaala na baana bogu babagetu na bamayitsanga bansambi bogu.

⁷BaIsrael bamavaga amasamalasa Fumu ubueji, bamalibana Fumu Nsambi ogu na bamayitsanga baBaal na bakosi.

⁸Fumu amanyoyila baIsrael tindi kabu na amabawakisa ombu Kouchan-Richataim agumaba kaga jiMesopotamie. BaIsrael bamaba baviga baKouchan-Richataim yinana yibilima.

⁹BaIsrael bamatatila Fumu na Fumu amabapalisila mugobutsi agumabawaka kalala, jandi la Otniel muana dibaala uQuenaz agumaba ngebi Caleb.

¹⁰Yinyunyi yiFumu amaba nandi. Amaba nsonsi o Israel na amawenda uyetoga divita. Fumu amawakisa Kouchan-Richataim kaga jiMesopotamie ombu gandi na amamubetsa.

¹¹Bulongu bumaba na duvotsu magumana mabilima. Mbana Otniel muana dibaala uQuenaz amafu.

¹²BaIsrael bamamuevaga amasamalasa Fumu ubueji; Fumu amavega Eglon kaga jiMoab mangolu utoga na baIsrael mu mbari bamamuevaga amasamamulasa ubueji.

¹³Eglon amabengusana baAmmon na baAmalec ombu gandi na bamayetoyisa baIsrael te na bamababetsa; bamabapatula musiengi uMambari.

¹⁴BaIsrael bamaba baviga baEglon kaga jiMoab yigumi na yinana yibilima.

¹⁵BaIsrael bamatatila Fumu kabogu Fumu amabapalisila mugobutsi, jandi la Ehoud muana dibaala uGeura muana dibaala uBenjamin agumaba na dumosu. BaIsrael bamatinda Ehoud na mulendu ombu Eglon kaga jiMoab.

¹⁶Ehoud amaketulila dijenga adimaba mengu yiari na yiari, usakama udionyi yibuku yimetera; amadiduara o tsi biduaru biandi o yiari yimabaala.

¹⁷Amawakisa mulendu ombu Eglon kaga jiMoab: kabogu Eglon amaba yika mideyi na mideyi.

¹⁸Anomana umuwakisa mulendu Ehoud na bambatsi bamayenawenda.

¹⁹Banotola o mbura jibakosi bamamanyi bebeli na Guilgal, jaʼ beni amagabuga mbana amavosa rie: Aa Kaga! Nyina mua fundu ugutsingula. Kaga amavosa rie: Gusuganu. Botsu abamaba nandi bamapala.

²⁰Mbana Ehoud amabambana na kaga agumatsana va mbura andi na amamutsingula rie: Nyina mbembu Nsambi ugutsingula. Eglon amarelama.

²¹Mbana Ehoud amasomuna dijenga diandi na gogu agumagetu adi amaduara o yiari yimabaala na amamunonga dionyi mu moji.

²²Muvandi umakota na matsi mamatsiemusa dionyi; asamadisomuna, dimapalila nesi te no nsima.

²³Ehoud amapala va gusu kana, amamudibiga o gari ndagu na amabindiga yiabutsu.

²⁴Anopala basalitsi bakaga bamagabuga uyegengila, bamarasuna biabutsu bidibama. Bamavosa rie: Tanguji kaga aji o tsomu.

²⁵Bamaviva yitsingu yineni, bamalaba yiri agedibuli biabutsu kabogu bamabonga tsafi na bamadibula ndagu. Bamalaba yiri fumu ogu amafu; bamalaba mfumbi va tsi.

²⁶Vana temu eni Ehoud amarina, amavioga mbura jibakosi bamamanyi na amayesuema o Seira.

²⁷Yika etoli, amasiga mumbanda va julu mukongu uEfraim. BaIsrael bamasunduga mukongu va mosi nandi mbana amakevaga murumitsi ogu.

²⁸Amabaruma rie: Ndukianu, Fumu amakwakisa bavinitsi benu, bisi Moab. Bamavindama va mosi nandi na bamadila disabu diJourdain va nsungisini na Moab, basamasingisa mutu ususu uvioga.

²⁹Vana temu eni bamabokisila bebeli na yigumi yitosini tsibabaala baMoab abamaba na mavata-manyuru na abamaba na mangolu; basamasingisa ne umosi urina.

³⁰Muna yilumbu yieni bulongu buMoab bumaba o tsi durumu dubaIsrael. Bulongu bumaba na duvotsu magumidunana mabilima.

³¹Temu Ehoud jinosuka, Chamgar muana dibaala uAnat amamuvinga. Amabetsa kama yisiamunu tsibaPhilistin na musulu-ubangombi, jaʼ wandi amawaka baIsrael kalala.