Read Punu Bansonsi 6 Bible Online

Bansonsi 6 - Punu bible

Bansonsi 6

¹BaIsrael bamavaga amasamalasa Fumu ubueji. Kabogu Fumu amabawakisa ombu bisi Madian yisambuali yibilima.

²Bisi Madian bamalasa baIsrael tindi maguga. Ava baIsrael bamarinina bisi Madian bamayenasuemanga mu mitsumba na bansiga no gari tsimamanyi.

³Yiotsu ayi baIsrael bamavarila manungi mogu bisi Madian na bisi Amalec na bisi yiari ayi wisi epalili bamatoga nogu.

⁴Bamavaga milaku va nsungisini nogu; bamabunga bivaru bibisi bulongu te no Gaza na basamasila nesi biguji nesi bindombu nesi bangombi nesi baburu o Israel.

⁵Bamakotanga na migamba miogu na mandagu mogu mamatsanda, bamatolanga nderi bivevi bimakokoku, bamaba tindi bapuela bapuela; nesi jogu nesi basamo bogu. Bamabasa tindi ubasa bulongu uyebubunga.

⁶Bisi Madian bamadetsa baIsrael mirima, kabogu baIsrael bamatatila Fumu na migamu mineni.

⁷Mbana baIsrael bamasambila Fumu mu diambu dibisi Madian.

⁸Fumu amabatindila mubiyitsi agumabatsingula rie: Nsambi Israel jandi rie: Nyimadupalisa o Egypte agu dumabanganga baviga.

⁹Nyimaduwaka kalala ombu bisi Egypte nombu jogu abamadulasanga maguga, nyimababinga na nyimaduvega bulongu buogu.

¹⁰Nyimadutsingula rie: Menu la Fumu Nsambi enu; duyamueyitsanga bansambi bangana baAmor abavu o bulongu abu duitsanini. Tumba dusamadedila diufi diami.

¹¹Mbana yiansa yiFumu amaruga noyetsana va tsi muterabeta o Ofra agumaba uYoach jiyifumba yiAbiezer. Muana andi udibaala Gedeon amawansanga ble o mbura jiyigamunu yiri tsiusuegulu bisi Madian.

¹²Yiansa yiFumu amalabana nandi na amamutsingularie: Ndeʼ ngogaga, Fumu aji nagu.

¹³Gedeon amamuwivula rie: Aa, fumu ami pa Fumu aji netu dibandu yi mambu meni motsu melabinini ombu getu? Bimaga bieni biotsu abi bataji betu betutsinguli, bika? Bevosi rie: Fumu amatupalisa o Egypte! Nyilabi yiri Fumu amatubuaga na amatuwakisa ombu bisi Madian!

¹⁴Fumu amageluga ombu gandi novosa rie: Wenda na mangolu amavu nagu noyewaka baIsrael kalala ombu bisi Madian; tsiri menu nyigusindiyi?

¹⁵Gedeon amamuwivula rie: Aa, fumu ami na yi nyubawaka kalala? Jetu baManasse, tugaa bifufu? Meʼ ngaa ngebi o ndagu taji ami?

¹⁶Fumu amamutsingula rie: Nyuba nagu na gubetsa bisi Madian botsu nderi bavu mutu mosi buandi.

¹⁷Gedeon amamutsingula rie: Pa guindabi uwelimina ndasi yilimba ayiunjabisa yiri guivosi nami.

¹⁸Guyagusuga vava te na nyugabuga; nyirondi uguvagulila pagu. Mbana Fumu amavosa rie: Ngowenda mbura te na gugabuga.

¹⁹Gedeon anokota amalambisa muana yinsabi na amavaga mapa mageyi amagaa na dufunusu na yietsu yimosi yifufu. Amapodula nyama mu nsienga na amavaga muembu mu yibona amamubeyila bionyi va tsi muterabeta na amabiwakisa.

²⁰Yiansa yiNsambi amamuruma rie: Bonga nyama na mapa gukabisunsa va dimanyi diedidi, witila muembu va julu. Gedeon amamudedila.

²¹Yiansa yiFumu amabambasana kodu nguangu ajimaba nandi, amabemba nyama na mapa. Mbana muji umasundila ubanga vana julu dimanyi, agumasielasana banyama na mapa.

²²Mbana yiansa yiFumu amasunda utsiemuga va misu mandi. Gedeon anolaba yiri amaba yiansa yiFumu amagamuga rie: Ngeba menua, Fumu, nyimalaba yiansa yiFumu kiakiaki.

²³Fumu amamutsingula rie: Sunsa murima, guyalaba keri gugofu.

²⁴Gedeon amarungila Fumu yinyensulu yipagu vana na amayiluga Fumu duvotsu; yikivu o Ofra dimbu diyifumba yiAbiezer.

²⁵Vana mukolu eni Fumu amaruma Gedeon rie: Bonga muvogulu ngombi utaji agu na mulumi ngombi ususu agukavu yisambuali yibilima. Pansa yinyensulu yipagu yiBaal ayivu yitaji agu na pansa kosi jiAshera ajivu va julu jionyi.

²⁶Gukarungila Fumu Nsambi agu yinyensulu yipagu va julu dimanyi dieni va yidesi. Gukabonga mulumi ngombi agumubeji gukaguvagula pagu jiunyensa na mikansu mikosi jiAshera aji gumapansa.

²⁷Gedeon amabonga yigumi yibasalitsi bandi na amavaga adi Fumu amamuruma. Amadumanga bataji bandi na bisi musiengi wandi na amalaba keri udugusu diruma dieni va nyangu kabogu amadidugusu mukolu.

²⁸Kedi, ava bisi musiengi bamarambuyila bamalaba yiri yinyensulu yipagu yiBaal yimapansu; kosi jiAshera ajimaba va julu yionyi jimapansu wandi na mulumi ngombi agumubeji umavagulu pagu jiunyensa va julu yinyensulu yipagu ayibanorungu.

²⁹Bamawivusananga rie: Anyi amavaga nana? Bamaketanga na bamayenarombanga. Bamabatsingula rie: Agutsivaga dionyi la Gedeon muana dibaala uYoach.

³⁰Mbana bisi musiengi bamaruma Yoach rie: Palisa muana agu, akaboku; amapansa yinyensulu yipagu yiBaal na amapansa kosi ajimaba va julu yionyi.

³¹Yoach amawivulanga botsu abamawendanga ombu gandi rie: Je divu diambu dienu uwamusa Baal? Je divu diambu dienu umuwamusa? Mutu uotsu aguwamusa Baal afu ne wisi ukatebuga. Pa Baal avu nsambi jaʼ beni akegabusilila pila mu mbari bamapansa yinyensulu yiandi yipagu!

³²Muna yilumbu yieni bamaluyila Gedeon Yeroubaal ava bamavosila rie: Baal akewamusa mu mbari Gedeon amapansa yinyensulu yiandi yipagu!

³³Bisi Madian botsu na baAmalec botsu na bisi yiari ayi wisi epalili botsu bamabenguna va mosi; bamasabuga mujamba uJourdain na bamavaga milaku va yibususu yiJizreel.

³⁴Gedeon amagaangu na Yinyunyi yiFumu, amasiyisa mumbanda unengila yifumba yiAbiezer ufubana nandi.

³⁵Amatinda bilumbi uyenengila yifumba yiManasse ufubana nandi wandi. Mbana amatinda bilumbi ombu bifumba bisusu: yiAsser na yiZabulon na yiNeftali abimayefubana nandi wandi.

³⁶Gedeon amavosa na Nsambi rie: Gutsivosa yiri gunsalisa uwaka baIsrael kala-la.

³⁷Kabogu nyusunsa dibuyi dimionyi va bisinga. Pa disala diunogulu yika va julu dibuyi dimionyi na butambd buba bugumuga mbana nyujaba yiri gunsalisa uwaka baIsrael kalala nana gumavanginina.

³⁸Adina dimalabana. Ava kedi jineni Gedeon amarelama na amagama dibuyi dimionyi, amapalisa mamba amamabasa dimoyi de.

³⁹Gedeon amamuelenda Nsambi rie: Kokolu tsiagu, guyanyoyila kabu; nyumuevosa temu mosi buandi. Kokolu tsiagu nyirondi umuelaba yilimba yisusu yidibuyi dimionyi: dibuyi dimionyi diyabola tumba bisinga biotsu bikaba manogu na manogu.

⁴⁰Adina Nsambi amavaga mukolu eni: dibuyi dimionyi disamabola, bisinga biotsu bimaba yika manogu na manogu.