Read Punu Bansonsi 8 Bible Online

Bansonsi 8 - Punu bible

Bansonsi 8

¹Mbana babaala baEfraim bamawivula Gedeon rie: Dibandu yi gumatuvayila nana? Dibandu yi gusamatunengilila ava gumawendila o utoga divita na bisi Madian? Bamamunyoyila tindi kabu.

²Tumba amabawaka rie: Diambu yi nyimavaga adivu dedi na dienu? Dutsonsugu duEfraim dugeviolili adu Abiezer?

³Nsambi amawakisa basefu baMadian ombu genu, diwendi rie: Oreb na Zeb. Diambu yi nyimavaga adivu dedi na dienu? Anovosa anana kabu ogu jimasaguga.

⁴Gedeon amatola o Jourdain, amasabuga na kama yirieru tsibagora abamaba nandi, diuleba bamatoguiu bamayenabadukanga.

⁵Bamatola o Soukot na Gedeon amavonda rie: Kokolu tsienu peyianu mua mapa uvega batu abavu nami mu mbari bamatogulu na uduka tuiduki Zeba na Salmounna, bakaga baMadian.

⁶Basefu baSoukot bamawaka rie: Gumagaanga Zeba na Salmounna? Dibandu yi tuguveyila biguji bietu ulisila bagora bagu?

⁷Gedeon amawaka rie: Dulaba! Ava Fumu owakisila Zeba na Salmounna ombu gami nyududimbisa na mingalangansi na mikuga.

⁸Anorambuyila vana amawenda o Penouel amayevonda bisi Penouel munongu mosi. Jogu bamamuwaka dedi mosi na bisi Soukot.

⁹Mbana amawaka bisi Penouel rie: Ava nyulungila nyupansa ndagu jisakama ejiji ava nyuruyila.

¹⁰Zeba na Salmounna bamaba o Carcor na bagora bogu abamaba yika yigumi na tosini yiranu. Abana buandi abamasialulu mu dutalu dubagora babisi yiari ayi wisi epalili mu mbari kama na magumabeji matosini tsibagora bamaboku.

¹¹Gedeon amavioyila o nsila jijogu abetsani o mandagu mamatsanda o yiari ayi wisi epalili o Noba no Yogboha na bamatumuna bagora abamatasanga baji sui.

¹²Zeba na Salmounna bamarina; Gedeon amababingisa na amagaanga bakaga babeji baMadian: Zeba na Salmounna, amapansa bagora bogu botsu.

¹³Gedeon muana dibaala u Yoach amaruyila o utoga mu nsila jiHeres.

¹⁴Amagaanga mufudu, muisi Soukot, na amamuwivula bivu; mufudu eni amamusonina miina mabasefu na mabivunda biSoukot: magumidusambuali na yisambuali yibabaala.

¹⁵Mbana amawenda ombu bisi Soukot na amavosa rie: Guluanu Zeba na Salmounna aba jenu dumansiengila ava dumavosila rie: Gumagaanga Zeba na Salmounna? Dibandu yi tuguveyila biguji bietu ulisila bagora bagu abamatogulu?

¹⁶Amabonga matsiendi na magala bikumu uyenalonsanga bivunda biSoukot

¹⁷Amapansa ndagu jisakama jiPenoul na amaboka bisi musiengi botsu.

¹⁸Amawivula Zeba na Salmounna rie: Batu aba dumaboka o Tabor, tsie bamabila? Bamawaka rie: Bamaba nana ndeju, mutu mutu amaba nderi muana kaga.

¹⁹Gedeon amagamuga rie: Bamaba baana banguji bami, diwendi rie: jetu nogu tindi nguji mosi. Aa, Fumu ejabi! Mbe dusamababoka mbe ngoduboka.

²⁰Mbana amaruma Yeter tsomi andi rie: Relama, baboki! Tumba mufudu eni asamasomuna dijenga diandi mu mbari mbe akivu muana, amalaba goma.

²¹Zeba na Salmounna bamavosa rie: Relama ndeʼ beni gukatuboka! Mu mbari nana mutu avu anana mangolu mandi mavu. Mbana Gedeon amarelama amaboka Zeba na Salmounna. Amabonga bilimba biogu abimaduisu mu kingu tsibasamo.

²²BaIsrael bamavosa na Gedeon rie: Turumingi, jenu na muana agu udibaala na mutegula agu udibaala mu mbari ndeʼ gumatuwaka kalala ombu bisi Madian.

²³Gedeon amavosa rie: Ngodurumanga na baana bami bababaala wandi bagodurumanga; Fumu agudurumanga.

²⁴Gedeon amabatsingula rie: Nyirondi uduvonda yima, peyianu, mutu mutu bipunga abi dumakinda. Bisi Madian bamaduara bipunga bilora nana baIsmael bamaduarilanga.

²⁵Bamawaka rie: Tubivega na murima umosi. Mbana bamawala yijungi na mutu mutu amayibuayila bipunga biandi abi amakinda.

²⁶Utsira ubipunga bibaIsmael bilora abi Gedeon amavonda umaba magumabeji makilu tsilora, tsiri utala bilimba na bipunga bimunongu na munongu na biduaru biyinyuru ayivu va gari dumbulu na ubenga abi bakaga baMadian bamaduaranga na tsiri utala panga tsilora atsimaba mu kingu tsibasamo bogu.

²⁷Gedeon amavaga yijungi yibuvagulitsi bupagu ayi amavakiga o musiengi andi o Ofra. Ayina yimaba dibandu dinsoruru tsibaIsrael; ayina yimaba nderi murambu uGedeon na bisi ndagu andi.

²⁸Bisi Madian bamakesundusa va gusu baIsrael na basamamueba na mujangu. Bulongu bumaba na duvotsu magumana mabilima; yitsingu yiotsu yiGedeon.

²⁹Yeroubaal, Gedeon muana dibaala uYoach amayenagabuga na amayetsana o ndagu andi.

³⁰Gedeon amabura magumidusambuali mabaana bababaala mu mbari amaba na bagatsi bapuela.

³¹Dironda diandi adimatsaninanga o Sichem amamuburila muana umosi udibaala agu bamaluga Abimelek.

³²Bununu buGedeon muana dibaala uYoach bumabueji; dufu duandi dusamaba na diambu; amatsigulu o ngila jitaji andi Yoach o Ofra agumaba umukuta uAbiezer.

³³Gedeon anofu baIsrael bamamuekota muyitsa uBaal na bamayitsa Baal-Berit nderi nsambi ogu.

³⁴BaIsrael basamamuerangimina Fumu Nsambi ogu agumabawaka kalala ombu bavinitsi bogu abamabakambisanga.

³⁵Diuleba Yeroubaal-Gedeon amavayila baIsrael maboti mapuela jogu basamamuekipa bisi ndagu andi.