Read Punu Dulasu 13 Bible Online

Dulasu 13 - Punu bible

Dulasu 13

¹Mbana nyimalaba yibulu ayimapalila o mubu. Yimaba na digumi dimasiyi na yisambuali yimiuru, disiyi disiyi dimaduisu dugaba; muru muru umasonu diina didisabu, diwendi rie: usabula Nsambi.

²Yibulu ayi nyimalaba yimabagunu na magena; makulu mandi mamaba nderi mayibulu ayinengulungu ursa na munu andi nderi munu uyimbungu. Mukuimbinyoga umayivega mangolu mandi na yitsiga yibufumu buandi nesi musuga uotsu.

³Muru andi umosi umalabana nderi umafu mbana umabeluga. Bisi butamba buotsu bamakambulu na bamaduka yibulu.

⁴Botsu bamayitsa mukuimbi-nyoga mu mbari umavega musuga andi ombu yibulu. Bamayitsa yibulu wandi na bamavosa rie: Anyi ebagunu na yibulu? Anyi oningula utoganandi?

⁵Yibulu yimavegu musuga uvosa mambu mabi ulensa Nsambi te na magumana na tsungi beji.

⁶Yimasienga Nsambi na diina diNsambi na Mbura aji Nsambi etsanini nesi jogu abetsani o julu.

⁷Yimavegu musuga utoga na batu baNsambi nolunga. Va julu vana yimavegu musuga unima botsu, diwendi rie: bifumba biotsu na binombu biotsu na mambembu motsu na malongu motsu.

⁸Bisi butamba buotsu boyiyitsa, diwendi rie: botsu abamasonu ubanda va dibandu mu dibuku dimonyu diMuana Yindombu ayimaboku.

⁹Jandi oyigulu alubuyi!

¹⁰Oyikotisi basusu o tsugu okotusu o tsugu wandi. Oyiboki batu na dijenga jandi wandi oboku na dijenga. La dibandu batu baNsambi vengu boba na pugu na yitu.

¹¹Mbana nyimalaba yibulu yisusu ayimapalila o butamba. Y imaba na masiyi mabeji nderi masiyi maMuana Yindombu, tumba diufi diandi dimaba nderi diufi dimukuimbi-nyoga.

¹²Yimasalisa musuga uyibulu ayitega ayimaba vana wandi. Yimabamiga bisi butamba botsu uyitsa yibulu ayitega ayi mbe yifu tumba yimabeluga.

¹³Yibulu ayimubeji yimavaganga bimaga bineni; va misu mabatu yimabondusa muji o julu va tsi.

¹⁴Yimadunsa bisi butamba botsu na bimaga abi yimavaganga va gusu misu mayibulu yitega. Yimatsingula bisi butamba botsu uvala yibagunu yiyibulu ayi mbe yifu tumba yimabeluga.

¹⁵Yibulu ayimubeji yimavotsa punga muna yibagunu yieni te na yimaba na mangolu uvosa nesi uboka botsu abamabusa uyiyitsa.

¹⁶Yibulu yimabamiga botsu, diwendi rie: bageyi na baneni; bisina na bijaga; bafumu na baviga usonu va makaka mogu mamabaala nesi va mambami mogu.

¹⁷Diwendi rie: mutu agorungula usumba vo usumbisa yima pa asamasonu na diina diyibulu vo durangu dudiina diandi.

¹⁸Mu dionyi mutu ana nsala diela. Ona diela orungula ujaba durangu duyibulu; duonyi la durangu dudiina dimutu. Durangu duvu kama yisiamunu na magumasiamunu na bisiamunu.