Read Punu Dulasu 16 Bible Online

Dulasu 16 - Punu bible

Dulasu 16

¹Mbana nyimagulu diufi dineni adimapalila o Ndagu Nsambi; dimavosa na yisambuali yibiansa rie: Wendanu, na witilanu yisambuali yikopa tsikabu jiNsambi va butamba.

²Yiansa ayitega yimawitila kopa andi va butamba. Botsu abamasonu na yibulu na abamayitsa yibagunu yiandi bamanamu masieyi.

³Yiansa ayimubeji yimawitila kopa andi va mubu. Mamba mamakaluga malungu mamutu agumafu kala na biotsu abimaba monyu o mubu bimafu.

⁴Yiansa ayimurieru yimawitila kopa andi va mijamba na bileka na mamba motsu mamakaluga malungu.

⁵Nyimagulu yiansa ayikelisi mamba meni yimavosa rie: Guji usungama ndeʼ aguvu na agumaba. Gumatabulila bunsonsi buwelimina ndeʼ aguvu uNsambi!

⁶Jogu bamaboka aba Nsambi na babiyitsi, kabogu gumabavega malungu monu. Adi bediii divu diwelimina nogu.

⁷Mbana nyimagulu diufi adimapalila o yinyensulu yipagu adimavosa rie: Nyiina, Fumu Nsambi Mangolu, bunsonsi buagu buvu bungensa na busungama.

⁸Yiansa ayimuina yimawitila kopa andi va wisi. Mbana wisi umavegu musuga unyensa batu.

⁹Diuleba batu bamanyensu na nyangu jineni bamasienga Nsambi oyirumi bidungu bieni na basamakalula diela na basamayitsa bundumba buandi.

¹⁰Yiansa ayimuranu yimawitila kopa andi va yitsiga yiyibulu na durumu duandi dumakubugu na pisama. Mu diambu dimaguga batu bamakegakanga ndimi tsiogu.

¹¹Bamasienga Nsambi aguvu o julu mu diambu dimaguga mogu na masieyi mogu. Ne nana basamakalula diela na basamabusa mabi mogu.

¹²Yiansa ayimusiamunu yimawitila kopa andi va mujamba uneni, diwendi rie: va Euphrate. Mamba mamakamuga yiri bakaga abamamyila o yiari ayi wisi epalili boba na nsila.

¹³Mbana nyimalaba binyunyi bibi birieru abimabagunu na milansa. Binyunyi bieni bimapalila o munu umukuimbi-nyoga, na munu uyibulu na munu umubiyitsi umamfurulu.

¹⁴Bivu binyunyi bibayisi abivayi bimaga. Binyunyi birieru bieni biwendi uyebenguna na bakaga uyetoga divita diyilumbu yiNsambi Mangolu.

¹⁵Gulu, nyiniyi nana muifi. Ka muna ubueji gu jandi aguvu na dukanda na oyibambi mivuatu miandi olaba, jandi aguna agorasunu penyi, diwendi rie: agogaangu na yisonyi.

¹⁶Mbana binyunyi bimabega bakaga va mbura ajinengulungu mu mbembu Hebreu rie: Harmaguedon.

¹⁷Mbana yiansa ayimusambuali yimawitila kopa andi va punga. Diufi dineni dimapalila o yitsiga yibufumu o Ndagu Nsambi, dimavosa rie: Dimavagu!

¹⁸Mbana vamaba tsiemu na mufi na bidumi na disisana dibutamba. Ubanda va dibandu vasamaba disisanadibutamba nana adina.

¹⁹Musiengi uneni umagabu makabu marieru na misiengi miotsu misusu mimabungu. Nsambi amarangimina Babylone uneni na amaguduba malamu, amamaba tindi kabu andi.

²⁰Nyingi tsiotsu tsimadiama na mikongu miotsu mimatsiemuga.

²¹Mfula jineni jimamanyi aji maberi mamaba na utsira umagumana makilu, jimanogulu batu. Botsu bamasienga Nsambi mu diambu diyidungu yimfula mamanyi, mu mbari yidungu yieni yimaba yiviolila uroga.