Read Punu Dulasu 17 Bible Online

Dulasu 17 - Punu bible

Dulasu 17

¹Mbana yiansa yimosi ayimaba va gari yisambuali yibiansa abimaba na yisambuali yikopa yimatasuna, yimavosa rie: Rugati, nyugulasa mukihi uyimbembu yimugetu, diwendi rie: musiengi agumarungu va disimu dimijamba.

²Bakaga bamavaganga bumbembu nandi na bisi butamba bamalanganga bumbembu buandi.

³Mbana Yinyunyi yiNsambi amambega o kumu. Nyimalaba mugetu atsana va julu yibulu yibenga ayimasonu miina madisabu, diwendi rie: usabula Nsambi Yibulu yimaba na yisambuali yimiuru na digumi dimasiyi.

⁴Mugetu amaduara yilinga yibenga ayimanamugu lora na mamanyi madufunu duneni na baperala yiari na yiari. Va dikaka diandi vamaba kopa jilora ajimabasa na nsoruru na muinsi bibumbembu buandi.

⁵Va mbami andi bamasonu diina adisamajabunu, adimasonu rie: Babylone uneni, nguji bimbembu na nsoruru tsiotsu tsibutamba.

⁶Mbana nyimalaba mugetu eni amalanganga na malungu mabatu baNsambi na majogu abamaboku mu mbari bamaba basigama ombu Jesus. Nyinomulaba, nyimakambulu puela.

⁷Yiansa yimakwivula rie: Mu mbari yi guikambulu? Nyugujabisa divindugulu dimugetu na diyibulu ayimubeyi, ayivu na yisambuali yimiuru na digumi dimasiyi.

⁸Yibulu ayi gumalaba yimaleba monyu tumba yimafu, namapapa yiupala o mbengi nowenda o dubungu. Bisi butamba abasakasonu mu dibuku dimonyu ubanda va dibandu bokambulu ava bogengila yibulu. Mu mbari yimaleba monyu tumba yimafu, ne nana yiumuelabana.

⁹Mu dionyi mutu ana nsala diela na dujabu. Yisambuali yimiuru yivu yisambuali yimikongu va julu mionyi mugetu avu atsana. Vamaba yisambuali yibakaga wandi:

¹⁰baranu bamagusuga, jimosi ji vana, jisusu jisakaruga. Ava oruyila otsana yika mua pesu temu.

¹¹Yibulu ayimaleba tumba yimafu aji kaga ajimunana tumba aji mu durangu duyisambuali yibakaga na ewendi o dubungu.

¹²Digumi dimasiyi adi gumalaba divu digumi dibakaga abasakabanda uruma tumba boruma va mosi na yibulu, diweru dimosi.

¹³Digumi dieni bana duganu dumosi na boveganga mangolu na musuga ogu ombu yibulu.

¹⁴Botoga divita na Muana Yindombu; tumba Muana Yindombu ofubana mangolu na abamasolu na abasigama na jogu bolunga mu mbari aji Fumu bafumu na Kaga bakaga.

¹⁵Mbana yiansa yimabuesa rie: Gumalaba yimbembu yimugetu atsana va julu mamba. Mamba meni mavu batu na binombu na malongu na mambembu.

¹⁶Digumi dimasiyi adi gumalaba jogu va mosi na yibulu bovina yimbembu yimugetu. Bomuvula tsanda nomusila penyi; boji misonyi miandi na bomunyensa.

¹⁷Mu mbari Nsambi amabavega nsala udugusu duganu duandi, diwendi rie: bamafubana mirima nandi na botsu bamavega yibulu musuga ogu uruma te na mambu maNsambi modugu.

¹⁸Mugetu agu gumalaba uvu musiengi uneni agu bakaga botsu begengili.