Read Punu Dulasu 2 Bible Online

Dulasu 2 - Punu bible

Dulasu 2

¹Sonina yilumbi yidibundu diEphese rie: Gengilati, oyigaangi yisambuali yibambuelili va dikaka diandi dimabaala, oyiwendi va gari yisambuali yimangasa malora, mutu eni evosi rie:

²Nyijabi motsu amavu nenu, nesi yisalu yienu nesi pugu enu. Nyijabi yiri dumabusa bango masumu. Dumakelula batu abamavaga nderi bavu bilumbi na nyijabi dumalasa kengili yiri ufura befuri.

³Duna pugu na dumawarila maguga mu diambu didiina diami na dusakadeda.

⁴Tumba nyina kueru nenu mu mbari dugetondi nana dumaletondila.

⁵Ka muna nsimbulu tsi! Kalulanu diela na gabuganu o yisalu yienu ayitega. Pa dugovaga nana nyuruga uyegusula dingasa dienu.

⁶Tumba nyina kingu mosi nenu mu mbari duivini mambu mabadukitsi baNicolas, mambu ama nyivini wandi.

⁷Jandi oyigulu alubuyi! Aguhi ama Yinyunyi yiNsambi evosi ombu bisi mabundu rie: Ombu botsu abamalunga nyubavega musuga uji milunda mimuiri umonyu aguvu o nungi jiNsambi.

⁸Sonina yilumbi yidibundu diSmyme rie: Guluati, adimavosu na agutega na agusita, agumafu na agumamuerambuga, jandi rie:

⁹Nyijabi maguga menu; nyijabi diuleba duji bijaga duna busina bumunongu ususu. Nyijabi dumafuengululu na jogu abevosi yiri baji baJuif, bagaa baJuif baji bisi dibundu diSatan.

¹⁰Duyalaba goma, dulelaba maguga. Diabu oduweliga na bamosi va gari enu bokotusu o tsugu, diwendi rie: maguga meni molabu te na digumi dibilumbu. Banu dusigama nesi te na dufu na nyududuisa dugaba dumonyu.

¹¹Jandi oyigulu alubuyi! Agulu ama Yinyunyi yiNsambi evosi ombu bisi mabundu rie: Botsu abolunga bagolaba dufu dumubeji.

¹²Sonina yilumbi yidibundu diPergame rie: Gengilati, ojivu na dijenga adivu mengu yiari na yiari, mutu eni evosi rie:

¹³Nyijabi mbura aji duitsanini na nyijabi yiri Satan etsani vana wandi. Nyijabi duji dusigama mu mbari ava Antipas amabokulu dusamabunsa yitu ayi dumapayila, diuleba duji mbura mosi na Satan.

¹⁴Tumba nyina kueru nenu mu mbari duiduki malongi maBalaam. Jandi amalonsa Balac agumatsimbusu batu baIsrael abamaji biguji abimawakusu ombu bakosi na abamavaganga buvuyisa.

¹⁵Va julu vana jenu bamosi duiduki malongi mabadukitsi baNicolas.

¹⁶Kalulanu diela! Pa dugovaga nana nyuruga uyetoga nenu na dijenga adipali mu munu ami.

¹⁷Jandi oyigulu alubuyi! Agulu ama Yinyunyi yiNsambi evosi ombu bisi mabundu rie: Botsu abamalunga nyubavega manna amamasuegu. Nyuvega mutu mutu dimanyi divema adimasonu diina digona, adigojabunu na bususu; yika jandi oyidilugu.

¹⁸Sonina yilumbi yidibundu diThyatire rie: Gengilati, Muana Nsambi ojivu na misu nderi milutsu mimuji na makulu ameluli nana kunga ajipali o muji, mutu eni evosi rie:

¹⁹Nyijabi amavu nenu nesi durondu duenu nesi yitu yienu nesi yisalu yienu nesi pugu enu. Nyijabi wandi yiri namunyi duisali uviolila na kala.

²⁰Tumba nyina kueru nenu mu mbari duidili Jezabel oyivosi yiri aji yilumbi yiNsambi. Elonsi na edunsi basalitsi bami te na bevayingi buvuyisa na bejangingi biguji abimawakusu ombu bakosi.

²¹Nyimamuvega temu ukalula diela tumba agogaru, erondi uvaga buvuyisa.

²²Kabogu nyumubuaga va tangi va mosi na jogu abevayi buvuyisa nandi. Ka muna maguga ma jogu botsu bolaba! Nyudivaga namapapa pa bagodunda uvaga buvuyisa nandi.

²³Nyuboka baana bandi wandi mbana bisi mabundu motsu bojaba yiri menu la jandi oyijabi matasa na nsala tsibatu. Nyudufuta nana mutu mutu amasalila.

²⁴Nyijabi jenu bisi Thyatire bamosi, dusakaduka malongi mabi, dusakafuama mu mabi maSatan, kabogu ngodubuesa masusu.

²⁵Yika uvosa rie: Waranu nana duiwarili te na vana nyuruyila.

²⁶Ombu botsu abolunga, abovaganga ama nyirondi nesi te na temu jiusita nyubavega musuga nana nyimadilila ombu Tata.

²⁷Nyubavega musuga uruma malongu na nguangu jibudilu, diwendi rie: borungula umapansa munongu mosi nana mutu orungulila ubula bisanga bidiga.

²⁸Va julu vana nyubavega mbuelili jikedi.

²⁹Jandi oyigulu alubuyi! Agulu ama Yinyunyi yiNsambi evosi ombu bisi mabundu.