Read Punu Dulasu 6 Bible Online

Dulasu 6 - Punu bible

Dulasu 6

¹Mbana nyimalaba Muana Yindombu ava amakakulila ayitega ayimanamugu na nyimagulu yibulu yimosi ayimavosa na diufi nderi diyidumi. Amavosa rie: Rugati!

²Nyimagengila na vamapala kabala jivema. Jandi omajinangama amaba na pita na amavegu dugaba, amawenda uyelunga.

³Muana Yindombu anokakula ayimanamugu ayimubeji nyimagulu yibulu ayimubeji amavosa rie: Rugati!

⁴Mbana kabala jisusu jibenga jimapala. Jandi omajinangama amadila musuga udivita yiri batu boyenabokasananga. Va julu vana jandi amavegu dijenga dineni.

⁵Muana Yindombu anokakula ayimanamugu ayimuriem, nyimagulu yibulu ayimurieru, amavosa rie: Rugati! Nyimagengila na vamapala kabala jipinda. Jandi omajinangama amagaanga mudodu va dikaka diandi.

⁶Mbana va gari bibulu bina nyimagulu diufi adimavosa rie: Gusala yilumbu yimfuimbila udila yietsii yimosi yiputu nesi bietsu birieru biuresi. Kebana, guyabivisa matsi na malamu.

⁷Muana Yindombu anokakula ayimanamugu ayimuina, nyimagulu diufi diyibulu ayimuina, amavosa rie: Rugati!

⁸Nyimagengila na vamapala kabala jikuduga. Diina dimutu omajinangama la Dufu na dimutu agumamuduka la Mbura Jiabafu. Butamba bumapasu biasi bina. Jogu bamadila musuga te na yiasi yimosi. Diwendi rie: bamaba na musuga uboka na dijenga nesi na dungosu dunsala nesi na maali nesi na bibulu bibukanyi.

⁹Mbana Muana Yindombu amakakulila ayimanamugu ayimuranu. O tsi yinyensulu yipagu nyimalaba binyunyi bijogu abamaboku mu diambu diMambu maNsambi na mu mbari bamamasingisila bumbeji.

¹⁰Bamagamuga na diufi dineni rie: Fumu aguiruyili ombu Nsambi na ngensa, temu yi gutabulila bisi butamba bunsonsi? Temu yi gubakilisila mu diambu didufu duetu?

¹¹Mutu mutu amavegu yilinga yivema; bamarumu rie: Vumanu mua bilumbu te na vana durangu dubasalitsi nenu na baana bataji aboboku nana jenu dumabokulu dudugu.

¹²Mbana nyimalaba Muana Yindombu ava amakakulila ayimanamugu ayimusiamunu. Vamaba disisana dineni dibutamba, wisi umakaluga upinda nana mosu pasa. Tsungi jiotsu jimabenga nderi malungu.

¹³Bambuelili bamabonduga va butamba munongu mosi nana muiri uibondusili tsosu tsiandi ava punga jivembuyili.

¹⁴Julu jimafumgu nana befuriyili ditogu na mikongu miotsu na banyingi bimagusulu va mbura tsiogu.

¹⁵Bakagababutamba na baneni na bafumu babagora na bisina na bammitsi na baviga botsu na abagaa baviga bamayenakesuega o gari malima na o gari mansiga o yiari yimikongu.

¹⁶Bamanengila mikongu na mamanyi rie: Tuvikianu yiri jandi oyitsani va yitsiga yibufumu agotulaba na kabu jiMuana Yindombu jigotubemba.

¹⁷Yilumbu yikabu andi yimatola, anyi onmgula uyiwarila?