Read Punu Dulasu 8 Bible Online

Dulasu 8 - Punu bible

Dulasu 8

¹Ava Muana Yindombu amakakulila ayimanamugu ayimusambuali julu jiotsu jimaba na duvotsu yibuku yidiweru.

²Mbana nyimalaba yisambuali yibiansa abivu diteli va gusu Nsambi; yiansa yiansa yimavegu mumbandaandi.

³Yiansa yisusu ayimaba na yinyensulu yilora yimaba diteli va yinyensulu yipagu. Yimavegu bima bimbunga jiboti yiri yiubisobana na tsambu tsibatu baNsambi ava yimavagulila pagu va yinyensulu yilora ayivu va gusu yitsiga yibufumu.

⁴Nsumbili jibima bimbunga jiboti na tsambu tsibatu baNsambi bimaba va dikaka diyiansa va gusu Nsambi.

⁵Mbana yiansa yimabonga yinyensulu ayimabasa na muji uyinyensulu yipagu na yimayibuaga va tsi. Barnaba mufi na bidumi na tsiemu na butamba bumasisana.

⁶Mbana yisambuali yibiansa bimaba bikunsama usiga mimbanda miogu.

⁷Yiansa yitega yimasiga mumbanda andi. Mfula jimamanyi na muji usobana na malungu jimanoga. Butamba bumapasu biasi birieru; yiasi yimosi yimanyenga na miri na biriri wandi.

⁸Mbana yiansa ayimubeji yimasiga mumbanda andi. Yima ayimabagunu na mukongu uneni yimasobana na muji yimabuagu o mubu. Mubu umapasu biasi birieru: yiasi yimosi yimakaluga malungu.

⁹Bima abivu monyu mu mubu bimapasu biasi birieru; yiasi yimosi yibiotsu yimafu. Makuimbinyoga mamubu mamagabu makabu marieru; dikabu dimosi dimakuimbinyoga dimabungana.

¹⁰Mbana yiansa ayimurieru yimasiga mumbanda andi. Mbuelili jineni ajiluli nana paga jimabonduyila o julu. Mijamba na bileka bimapasu biasi birieru; mbuelili eni jimabonduga mu yiasi yimosi yimijamba na bileka wandi.

¹¹(Diina dimbuelili eni dimaba Dugundu.) Yiasi yimosi yimijamba yimakaluga nduli nana dugundu na puela batu bamafu mu mbari mamba mamakaluga nduli.

¹²Mbana yiansa ayimuina yimasiga mumbanda andi. Wisi na tsungi na bambuelili bamapasu biasi birieru; yiasi yimosi yiwisi yimadimbu na yiasi yitsungi na yibambuelili yiri yibi pisama na yiri yilumbu yikatsiemusa yiasi yiyijalala na mukolu munongu mosi.

¹³Mbana nyimagengila na nyimalaba mbira ajimapurumuganga vala o julu. Jimavosa na diufi dineni rie: Ubiva, ubiva! Ka muna ubiva gu bisi butamba bolaba ava biansa birieru bosiyila mimbanda miogu!