Read Punu Ruth 4 Bible Online

Ruth 4 - Punu bible

Ruth 4

¹Booz amawenda o dikotulu dimusiengi agu bamatabulila mambu, na amatsana. Mbana amalaba yiburu yiElimelek ayi Booz amalerangunga na Ruth uvioga evioyi. Booz amamunengila rie: Lerugati. Amakueka ombu gandi na amatsana.

²Booz amagunga yigumi yibivunda bimusiengi na amavosa rie: Letsanatianu! Jogu bamatsana.

³Mbana amavosa na yiburu yiElimelek rie: Noemi amaruyila o Moab na usumbisa esumbisi musiru uyiburu yietu Elimelek.

⁴La dibandu nyimanengilila bambeji bebaba ugutsingula rie: Pa guirondi ugusumba, nsinguli mu mbari pa gugerondi ugusumba nyudivaga. Nyijabi guna musuga uviolila menu. Dibaala dieni amawagula rie: Nyugusumba.

⁵Mbana Booz amavosa rie: Ava gugusumbila na Noemi gubialila na Ruth wandi aguvu muisi Moab agumaba mugatsi mfumbi, yiri diina dimfumbi digotsiemuga, diwendi rie: Disiala diandi diubanganga.

⁶Dibaala dieni adimaba na musuga ugusumba amawaka rie: Ngorungula. Adina diutombisa ubivisa tindi disiala diami. Ka bonga musuga uotsu, mu mbari ngorungula udivaga.

⁷Mu temu eni o Israel ava mutu amasumbisila vo usopana musiru ovega duvondu duandi yilimba ombu musumbitsi uwarisa pangini nolasa yiri diambu dimatabulu.

⁸Kabogu amagusula duvondu va gusu batu beni na amavosa na Booz rie: Ma, guna musuga uotsu.

⁹Mbana Booz amatsingula bivunda na batu botsu rie: Namunyi jenu duvu bambeji yiri nyimasumba na Noemi biotsu abimaba biElimelek na biKilion na biMalon,

¹⁰na nyimabialila Ruth aguvu muisi Moab aguvu mukuili uMalon. Adina diurombisa disiala dimfumbi ubanganga, obanganga na bategula; diwendi rie: diina diandi diurangumunungu mu bukulu mutubu.

¹¹Batu botsu abamaba o dikotulu dimusiengi na bivunda bamavosa rie: Jetu tuvu bambeji! Fumu afunisingi mugetu eni dedi mosi nana amafunisila Rachel na Lea bagatsi baJacob abamabura baana baIsrael! Lasa mangolu magu o yifumba yiEfrata, na diina diagu didumusu o Bethleem!

¹²Na baana bagu aba mugetu egugu oguburila bafuningi munongu mosi nana baPeres agumaba muana Tamar na Juda.

¹³Kabogu Booz amabonga Ruth na ava bamafubinina yitsiga Nsambi amagabila Ruth miula na amadila dimi. Amabura muana dibaala.

¹⁴Bagetu nandi bamavosa na Noemi rie: Ka muna ubueji gu Fumu amaguvega mutegula agugukelisanga. Abi muneni o Israel.

¹⁵Agukelisi nogugabusa nsangu nesi mu bununu buagu. Boji buagu eviolili ne yisambuali yibaana bababaala mu mbari egurondi na amaguburila muana dibaala.

¹⁶Noemi amaba ndetsi muana.

¹⁷Bagetu nandi bamavosa rie: Noemi amadila muana dibaala! Bamamuluga Obed. Amaba taji Jesse agumaba taji David.

¹⁸Miina mabategula baPeres amama:

¹⁹Peres akabura Hesron, Hesron akabura Ram; Ram akabura Amminadab;

²⁰Amminadab akabura Nachon, Nachon akabura Salma;

²¹Salma akabura Booz; Booz akabura Obed;

²²Obed akabura Jesse; Jesse akabura David.