Read Punu 1 Samuel 10 Bible Online

1 Samuel 10 - Punu bible

1 Samuel 10

¹Samuel amabonga yirura yimatsi ama amawitila va julu muru uSaul. Amamufifa na amavosa rie: Fumu amagubiatsa guba sefu jibatu bandi.

²Namunyi yika guinsili gurasuna babaala babeji va mugula ungila jiRachel va mandilu maBenjamin o Selsa. Jogu bogutsingula rie: Baburu aba gumayenaromba bamalabana; leguluati, taji agu agemuetasi diambu dibaburu tumba avu na murima o julu mu diambu dienu na ekewivuli rie: Yi nyuvaga mu diambu dimuana ami?

³Mbana guwenda mua vala te na gutola va muiri musena uTabor. Avana gubengunina na babaala barieru abewendi o uyitsa Nsambi o Bethel: umosi ebeyi baana barieru babinsabi, ususu mapa marieru mageyi na ususu tsuva mosi jimalamu.

⁴Boguwivula rie: Guji mua buranga? Na boguvega mapa mabeji ama guwaka.

⁵Va julu vana gutola o Guibea-Elchim agu barumitsi babaPhilistin betsanini. Ava gukotila o musiengi gubengima na yinombu yibabiyitsi aberuyisini o mbura ajiyingitsi na bangomfi na bandungu na mambika na basambi na jogu beni boyina nogamuganga.

⁶Yinyunyi yiFumu ogugaanga na ndeʼ wagu guyina nogamuganga va mosi nogu na gukaluga mutu ususu.

⁷Ava gulabila bilimba bieni biotsu gukavaga adi gulaba diwelimina mu mbari Nsambi aji nagu.

⁸Mbana guteyila o Guilgal; mbana nyugurasuna uyivagula pagu tsiunyensa na pagu tsikabusulu tsimaboti. Gupiva te na yisambuali yibilumbu mbana nyugurasuna ugutsingula adi guvaga.

⁹Yika Saul esoyimi anokakana na Samuel, Nsambi amamuvega murima ususu na bilimba bieni biotsu bimadugusu muna yilumbu yieni.

¹⁰Ava Saul na musalitsi andi bamatolila o Guibea bamalaba yinombu yibabiyitsi ayimayenamubengusananga. Yinyunyi yiNsambi amagaanga Saul na amabiga va mosi nogu.

¹¹Botsu abamalemujabanga bamalaba yiri ubiga ebiyi va mosi na babiyitsi na bamavosasananga rie: Diambu yi dimalabana na muana Quich? Saul wandi avu mu dutalu dubabiyitsi?

¹²Muisi Guibea amawaka rie: Basusu fumu ogu anyi? (La dibandu bewivusiningi rie: Saul wandi avu mubiyitsi?)

¹³Anomana ubiga amawenda o mbura jiyingitsi.

¹⁴Katsi Saul amawivula Saul na musalitsi andi rie: Agu dubetsi? Saul amawagula rie: O uromba baburu tumba tugaabalaba, kabogu tutsiwenda ombu Samuel,

¹⁵Katsi Saul amamuevosa rie: Kabogu nsinguli ama Samuel atsidutsingula.

¹⁶Saul amawagula katsi andi rie: Jandi atsitutsingula yiri baburu bamalabana. Tumba asamamutsingula mambu mabukaga ama Samuel amamutsingula.

¹⁷Samuel amanengila baIsrael va gusu Fumu o Mispa,

¹⁸mbana amatsingula baIsrael rie: Fumu Nsambi Israel jandi rie: Nyimadupalisa o Egypte na nyimaduwaka kalala ombu bisi Egypte nesi bavinitsi benu botsu.

¹⁹Namunyi duiliyili Nsambi enu nsima agumaduwaka kalala mu purulu tsienu tsiotsu na maguga menu motsu mbana duimuvondi rie: Tuveyi kaga! Gukamanu va gusu Fumu muna bifumba bienu.

²⁰Samuel amabambasana yifumba yifumba yiIsrael, amabuaga mbanda: Fumu amasola yifumba yiBenjamin.

²¹Amabambasana yifumba yiBenjamin muna mikuta miogu na yifumba yiMatri yimasolu. Mbana Saul muana dibaala uQuich amagaangu. Bamamuromba tumba basamamulaba.

²²Bamamueyemoga na Fumu rie: Vagaa dibaala vava? Fumu amavosa rie: Labatianu, usuema esuemi o nsima mufuna.

²³Bamawenda mambangu uyemupalisa; mbana amakelasa ombu batu, amaviolila botsu usakama.

²⁴Samuel amawivula batu botsu rie: Duilabi agu Fumu amasola? Vagaa mutu aguvu dedi nandi. Batu botsu bamagamuga rie: Abi kaga!

²⁵Samuel amajabisa batu musuga ubukaga na amagusona mu dibuku adi amakotisa o Mbura Nsambi. Mbana amaganina baIsrael, mutu mutu amagabuga o ndagu andi.

²⁶Saul wandi amagabuga o ndagu andi o Guibea. Batu abamaba na mirima misunda bamayemuvetsiga, batu abamalonsu na Fumu.

²⁷Vamabanga batu babi abamavosanga rie: Ayina yi? Jandi guna otuwaka kalala? Bamamulensanga na basamamuvega ne yima yimosi. Tumba Saul asamabakipa.