Read Punu 1 Samuel 11 Bible Online

1 Samuel 11 - Punu bible

1 Samuel 11

¹Nahach kaga jiAmmon amayekanda Yabech o Galaad. Bisi Yabech botsu bamalenda kaga rie: Vangana pangini netu na jetu tugusalilanga.

²Tumba Nahach kaga jiAmmon amabawaka rie: Nyuvangana pangini nenu tumba nyuletoba jenu botsu misu mamabaala ulasa baIsrael botsu yisonyi.

³Bivunda biYabech bamamutsingula rie: Tusingisi mua temu nesi yisambuali yibilumbu yiri tutinda bilumbi o yiari na yiari biIsrael; pa tugodila mutu utuwamusa tuba abagu.

⁴Bilumbi bimatola o Guibea uSaul na bamatsingula batu mambu meni. Batu botsu bamagamuga na bamalila.

⁵Saul amaruganga o musiru na bangombi bandi mbana amawivula rie: Dibandu yi batu belilili? Bamamutsingula adi bisi Yabech bamavosa.

⁶Saul anogulu mambu meni amagaangu na Yinyunyi yiNsambi na amanyoga kabu jineni.

⁷Amabonga bangombi babeji aba amasasa aba amatinda mapula yiari na yiari o Israel jiotsu na amavosa rie: Mutu uotsu agugoduka Saul na Samuel o uyetoga divita, bingombi bandi bosasu munongu mosi. Goma jiFumu jimagaanga baIsrael, jogu botsu bamamuduka va mosi.

⁸Saul amabangasisa o Bezec; baIsrael abamatsana o banda bamaba kama yirieru tsitosini na magumarieru matosini tsibabaala baJuda.

⁹Mbana amatsingula bilumbi abimaruga rie: Dukatsingula bisi Yabech o Galaad rie: Mugesa ava muangulu duwaku kalala. Bilumbi bamayetsingula mambu meni ombu bisi Yabech. Bamabasu na nsangu

¹⁰na bamatsingula bisi Ammon rie: Mugesa tuba abenu, dukatuvayila nana duirondili.

¹¹Ava kedi Saul amagaba bagora mabuli marieru. Bamakota o milaku mibisi Ammon ava mavuvungi na bamabatoyisa te na muangulu. Bisi Ammon abamarina bamayenapansiga; vasamasiala ne batu babeji va mbura mosi.

¹²Batu bamawivula Samuel rie: Banyi batsiwivulanga rie: Saul oturumanga? Wakisanu batu beni, tukababokisa.

¹³Tumba Saul amavosa rie: Ne mutu mosi agobokusu va yilumbu yieyiyi mu mbari namunyi Fumu amawaka baIsrael kalala.

¹⁴Samuel amanengila baIsrael rie: Ruganu, tʼ wendianu o Guilgal uyewarisa bukaga buSaul.

¹⁵Batu botsu bamawenda o Guilgal avana va gusu Fumu bamamuetubula bukaga buSaul. Bamavagulila Fumu pagu tsikabusulu tsimaboti. Mbana Saul na baIsrael botsu bamabasa na nsangu jineni.