Read Punu 1 Samuel 13 Bible Online

1 Samuel 13 - Punu bible

1 Samuel 13

¹Saul amaba na … mabilima ava amabandila uba kaga, yiotsu yina mbe amaruma bilima bibeji o Israel.

²Saul amasola tosini yirieru tsibagora baIsrael; tosini beji tsimaba nandi o Mikmas na o julu mukongu uBethel na tosini mosi jimaba na Jonatan o Guibea o Benjamin. Amagabusa batu basusu: mutu mutu o ndagu andi.

³Yilumbu yimosi Jonatan amaboka murumitsi ubaPhilistin abamatsananga o Gueba, na baPhilistin bamadigulu. Saul amasiyisa mumbanda mu bulongu buotsu noyenavosanga rie: Bisi Hebreu badijabi!

⁴BaIsrael botsu bamagulu bevosi rie: Saul amabokisa murumitsi ubaPhilistin va mbura ogu, adimarombisa baPhilistin uvina tindi uvina baIsrael. Bagora bamarasuna Saul o Guilgal.

⁵BaPhilistin bamagukama utumuna baIsrael. Bamaba na magumarieru matosini tsimakalu na tosini yisiamunu tsibabeyitsi babakabala na bagora abamaba bapuela nderi yisieyi yimubu. Bamayevaga milaku o Mikmas, o yiari ayi wisi epalili yiBet-Aven.

⁶BaIsrael bamalaba yiri mangolu mogu mamasuka mu mbari bamabamugu, kabogu bamayenasuemanga mu malima na mawansi no gari tsimamanyi na tsibivaga na bansiga.

⁷Bamosi va gari ogu bamasabuga Jourdain uwenda o bulongu buGad na buGalaad. Saul mbe aki o Guilgal na bagora botsu abamaba nandi bamaregamanga.

⁸Amaviva yisambuali yibilumbu. Temu ajimakunsu na Samuel. Tumba Samuel asamatola o Guilgal na bagora bamabanda upansiga.

⁹Mbana Saul amavosa rie: Beganu bibulu bipagu tsiunyensa na pagu tsikabusulu tsimaboti. Mbana jaʼ beni amavagula pagu tsiunyensa.

¹⁰Yika emani uvagula pagu tsiunyensa mbana Samuel amatola na Saul amayemubengusana umubumba.

¹¹Samuel amawivula rie: Ayina yi? Saul amawaka rie: Nyinolaba yiri bagora bamabanda upansiga na gusamatola va temu ajimakunsu na yiri baPhilistin bavu bagukama o Mikmas,

¹²nyimatasa rie: BaPhilistin boyitumuna o Guilgal na nyisakasambila Fumu! La dibandu nsitabulila diambu uvagula pagu jiunyensa.

¹³Samuel amatsingula Saul rie: Gumavaga buduka, gusamakelisa diruma adi Fumu Nsambi agu amaguvega. Fumu amaleronda uwarisa durumu duagu o Israel te na mutubu.

¹⁴Tumba durumu duagu dugomuetsinga. Fumu amakesolila dibaala disusu nana amarondila na Fumu amamuvaga yivunda yibatu bandi mu mbari ndeʼ gusamakipa adi Fumu amaguruma.

¹⁵Mbana Samuel amarambuyila o Guilgal uwenda o yiari yiandi. Saul na bagora bamosi bamarambuyila o Guilgal uduka bagora basusu o Guibea uBenjamin. Saul amatala bagora abamaba nandi: bamaba kama yisiamunu.

¹⁶Saul na muana andi Jonatan na batu abamaba nogu bamavaga milaku va Guibea uBenjamin na baPhilistin bamavaga milaku o Mikmas.

¹⁷Yilumbu yimosi o milaku mibaPhilistin umapala dibuli dibabungitsi abamakegaba makabu marieru; dimosi dimavioga o nsila jiOfra o yiari yiChoual;

¹⁸disusu dimavioyila o nsila jiBet-Horon; na adimurieru dimavioyila o nsila jimandilu amavu o yiari yiyibususu yiHyenes o yiari yikumu.

¹⁹Basamaba bakuba o bulongu buotsu buIsrael mu mbari baPhilistin bamavosa rie: Tugobitsianu baHebreu utula majenga nesi makongu.

²⁰Dibaala diotsu o Israel bamawendanga ombu baPhilistin uyesiba bitimunu bimunongu na munongu na mumbi,

²¹ava bisalulu biogu biminongu na minongu bimatunina na mitobu mimarekama.

²²Dimalabana yiri yilumbu yidivita vasamaba nesi dijenga nesi dikongu ombu bagora botsu baSaul na Jonatan; yika Saul na muana andi Jonatan bamaba na bitogulu.

²³Dibuli dimosi dibagora babaPhilistin bamavaga milaku miogu va nsila ajivioyi o Mikmas.