Read Punu 1 Samuel 14 Bible Online

1 Samuel 14 - Punu bible

1 Samuel 14

¹Yilumbu yimosi Jonatan muana dibaala uSaul amanengila mufudu agumabeganga bitogulu biandi rie: Ruga, tʼwendi te no milaku mibaPhilistin amivu o disimu dina. Tumba Jonatan asamaditsingula taji andi.

²Saul amaba va tsomu dimbu jiGuibea o tsi muiri ugeranada o yiari yiMigron, na bagora abamaba nandi bamaba kama yisiamunu.

³Ahia muana dibaala uAhitoub muana nguji Ikabod muana dibaala uPinhas muana dibaala Heli muvagulitsi upagu uFumu o Silo amaduaranga yilinga yiyijungi yibuvagulitsi bupagu. Bagora basamajaba temu aji Jonatan amawendila.

⁴Va maviogulu ama Jonatan amaronda uvioyila utola o milaku mibaPhilistin vamaba mamanyi mabeji masakama yiari na yiari; dimosi dimanengulungu Bosses, disusu Senne.

⁵Dimanyi dimosi divu o banda va nsungisini na Mikmas na disusu divu o tandu va nsungisini na Gueba.

⁶Jonatan amanengila mufudu agumabeganga bitogulu biandi rie: Ruga, tʼwendi te no milaku mibapayi babaPhilistin, tanguji Fumu otuwamusa mu mbari vagaa diambu adiugandisa Fumu utu waka kalala, nesi tuji mua dutalu dugeyi nesi duneni.

⁷Jandi agumabeganga bitogulu biandi amamuwaka rie: Vaga diotsu adi guitasi, nyigululu yika ndeju, laba nyiji nagu na nyivu nyikunsama uyenagudukanga.

⁸Jonatan amavosa rie: Tʼwendi ombu batu beni tuyelabananogu.

⁹Pa botusikiga rie: Sikamanu te na tutola ombu genu! Tusikama mbura mosi, tugowenda ombu gogu.

¹⁰Tumba pa botunengila rie: Ruganu ombu getu! Tuwenda mu mbari Fumu obawakisa ombu getu. Ayina yiuba yilimba yietu.

¹¹Jogu botsu bamakelasa ombu baPhilistin abamavosa rie: Labatianu bisi Hebreu abepalili o biduna abi bamasueminanga.

¹²Batu beni bamavosa na Jonatan na agumabeganga bitogulu biandi rie: Ruganu ombu getu, tuirondi udutsingula mua diambu. Jonatan amatsingula agumabeganga bitogulu biandi rie: Nduki, Fumu amabawakisa ombu baIsrael.

¹³Jonatan amamata makongama na agumabeganga bitogulu biandi amayenamudukanga. BaPhilistin bamayenaberuganga va gusu Jonatan na agumayenabeganga bitogulu biandi amayenabalukulanga va nsima andi.

¹⁴Va mua mbura jigeyi vamaba dubudama dutega duJonatan na agumabeganga bitogulu biandi; bamaboka magumabeji mabaPhilistin.

¹⁵Goma jimadugunu o milaku miotsu na mbanda tsi jiotsu nombu baPhilistin botsu nesi o milaku mi-abamakindanga bulongu; bulongu buotsu yika goma na goma. Vamaba disisana dineni dibutamba.

¹⁶Bawatsi baSaul abamaba o Guibea uBenjamin bamalaba yiri baPhilistin bapuela bamapansiga na bamayenarina yiari na yiari.

¹⁷Mbana Saul amaruma bagora bandi rie: Talanu bagora nojaba abegambu. Banotala bamalaba yiri Jonatan na agumabeganga bitogulu biandi bagatsi.

¹⁸Mbana Saul amaruma muvagulitsi upagu Ahia rie: Bega yigara yipangini yiNsambi. (Yimaba o milaku mibaIsrael.)

¹⁹Ava Saul amavosilanga na muvagulitsi upagu, nduku jimaviolila o milaku mibaPhilistin. Saul amavosa na muvagulitsi upagu rie: Gusula dikaka diagu.

²⁰Mbana Saul na bagora bandi botsu bamagukama na bamawenda te no mbura jiutoyila; baPhilistin bamayenanongasananga majenga na kimbu jimaba jineni.

²¹Va gari baPhilistin bamaba bisi Hebreu abamalengasusu kabogu bamaba nogu o milaku, jogu bamafubana na bagora baSaul na baJonatan.

²²Babaala botsu baIsrael abamasuema o mukongu uEfraim bamagulu yiri baPhilistin urina beyenarina kabogu bamafulana ubabingisa nobatumuna.

²³Muna yilumbu yieni Fumu amawaka baIsrael kalala na bamayenatoganga te no disimu dina diBet-Aven.

²⁴Yilumbu yimaba yivura ombu baIsrael. Saul amaganisa batu kaka ava amavosila rie: Mutu ayaji te na tsisiga te na nyimagabusila bavinitsi bami pila! Ne mutu mosi asamaji.

²⁵Botsu bamatola o musiru agumaba na puela buji.

²⁶Bagora banokota o musiru bamalaba buji abumakelumuganga; tumba ne mutu mosi asamabuji mu mbari bamakipa kaka.

²⁷Jonatan asamajaba kaka aji taji andi amaganisa batu kabogu amabambasana kodu nguangu ajimaba nandi va dikaka amajidukusu va mukelili ubuji na amaviosa dikaka o munu; kabogu misu mandi mamasigama.

²⁸Mbana gora mosi amamutsingula rie: Taji agu amaganisa batu kaka ava amavosila rie: Mutu ayaji namunyi! La dibandu bagora amavolila nyuru tsiogu.

²⁹Jonatan amawaka rie: Taji ami elasi batu uvura, labatianu nana misu mami mamasigama mu mbari nyimabimba mua buji.

³⁰Dingensa mbe batu batsiji abi batsikinda namunyi ombu bavinitsi mbe dubudama bubaPhilistin dusamasinsa uroga?

³¹Muna yilumbu yieni baIsrael bamabelisa baPhilistin ubandila o Mikmas te no Ayalon. Batu bamavola tindi uvola nyuru

³²na bamabola abimakindu. Bamabonga bindombu na bangombi na baana babangombi, bamabiboka na bamabiji na malungu.

³³Bamayebafunda ombu Saul rie: Labati batu bevayili Fumu dibi ava bejangini nesi malungu. Saul amavosa rie: Dibi duivayi; mbungisinianu dimanyi dineni.

³⁴Mbana amabuela rie: Pansiganu ombu batu na tsingulanu mutu mutu umbeyila ngombi andi vo yindombu yiandi uyibibokila vava. Mbana duji na dugomuevayila Fumu dibi ava dujangilanga nyama atsikadekisa malungu. Vana mukolu eni mutu mutu amabega ngombi andi uyejiboka va julu dimanyi.

³⁵Kabogu Saul amarungila Fumu yinyensulu yipagu: yionyi yimaba yitega ayi amarungila Fumu.

³⁶Saul amaruma rie: Tudukianu baPhilistin ne mukolu egugu, tuyebakindanu te na wisi otebuga na tuyayesilanu na yima yimosi guna. Bagora bamawaka rie: Tuvayianu diotsu adi guilabi divu diwelimina. Tumba muvagulitsi upagu amavosa rie: Tugolewivula Nsambi?

³⁷Saul amawivula Nsambi rie: Nyuwenda ombu baPhilistin? Gubawakisa ombu baIsrael?

³⁸Tumba Nsambi asamawagula muna yilumbu yieni. Saul amavosa rie: Bivunda biotsu, ruganu gunu; njabisianu dibi adimavagu namunyi.

³⁹Mu mbari Fumu aguvu Mugobutsi uIsrael ageweʼ yilu! Ne pa muana ami Jonatan ana mbela oboku.

⁴⁰Va gari bagora botsu jimosi asamamuwagula. Saul amaruma baIsrael botsu rie: Vioganu jenu botsu yiari yimosi; jetu na muana ami Jonatan tuba o yiari yisusu. Mbana bagora bamatsingula Saul rie: Vaga adi gulaba divu diwelimina.

⁴¹Saul amavosa na Fumu rie: Nsambi Israel! Jabisa ngensa. Jonatan na Saul bamagaangu na bagora basamalabana na diambu.

⁴²Saul amaruma rie: Buaganu mbanda va gari jetu na muana ami Jonatan! Jonatan amagaangu.

⁴³Saul amaruma Jonatan rie: Tubulili adi gumavaga. Jonatan amamutubulila rie: Nyimamanga mua buji va kodu nguangu ami: Meʼ janduʼgu nyufu!

⁴⁴Saul amagamuga rie: Ngensa Nsambi okilisa pa Jonatan agofu namunyi!

⁴⁵Bagora bamawivula Saul rie: Ayi? Jonatan agumatuwaka kalala oboku? Digorungula uba! Fumu agewendi yilu! Kokolu tsiagu, mudundi. Mangolu maNsambi masamaba nandi namunyi? Anana bagora bamawakila Jonatan kalala, kabogu asamaboku.

⁴⁶Saul amadunda ubingisa baPhilistin kabogu baPhilistin bamayenagabuga o yiari yiogu.

⁴⁷Saul anodila durumu dubaIsrael amatoga mavita yiari na yiari bibavinitsi bandi: baMoab na baAmmon na baEdom na bakaga baSoba nesi baPhilistin; biari biotsu abi amawendanga amalunganga.

⁴⁸Yilumbu yimosi amalasa tindi mangolu mandi; amabetsa baAmalec, anana amawakila baIsrael kalala ombu jogu abamabakindanga.

⁴⁹Saul amabura baana bababaala: Jonatan na Ichevi na Malkichoua na baana babagetu babeji: yivunda diina diandi Merab; ngebi diina diandi Mikal.

⁵⁰Diina dimugatsi uSaul Ahinoam muana mugetu uAhimaas. Diina diyivunda yidibadi diandi Abner muana dibaala uNer agumaba katsi Saul.

⁵¹Quich, taji Saul na Ner taji Abner bamaba baana baAbiel.

⁵²Yitsingu yiotsu yiSaul vamaba mavita na baPhilistin kabogu ava Saul amalabila mutu umangolu amamungasisa mu dibadi diandi.