Read Punu 1 Samuel 16 Bible Online

1 Samuel 16 - Punu bible

1 Samuel 16

¹Fumu amawivula Samuel rie: Te na temu yi gunyonganga Saul? Nyimamubusa, agomueba kaga jiIsrael. Basa disiyi diagu matsi, wenda ombu Jesse aguvu muisi Bethleem, nyimasola umosi va gari baana bandi aguba kaga.

²Samuel amawivula rie: Tsie nyuwendila? Saul odigulu mbana omboka. Fumu amavosa rie: Gukayenabeganga muana ngombi na gukavosa rie: Nsiruga uyivagulila Fumu pagu.

³Gukanengila Jesse o pagu; nyugujabisa adi vengu guvaga, gukasingila agu nyugulonsa matsi.

⁴Samuel amavaga adi Fumu amavosa kabogu amawenda o Bethleem. Bivunda bimusiengi bamabasa na goma, bamawenda umubengusana na bamamuwivula rie: Va diambu?

⁵Amawaka rie: Nyiina; nyimaruga uyivagulila Fumu pagu. Keliomisanu na ruganu nami uyevagula pagu. Amaruma Jesse na baana bandi bababaala ukeliomisa noruga o pagu.

⁶Ava bamakotila Samuel amalaba Eliab na amatasa rie: Aguna agu Fumu amasola.

⁷Tumba Fumu amatsingula Samuel rie: Guyakipa nana avu, nesi yirela yiandi mu mbari nyimamubusa. Fumu agekipi ayi mutu ekipi; mutu egengili ama elabi na misu tumba Fumu egengili murima.

⁸Jesse amanengila Abinadab na amamuviosa va gusu Samuel; Samuel amavosa rie: Fumu agaasola agugu wandi.

⁹Jesse amaviosa Chamma tumba Samuel amavosa rie: Fumu agaasola agugu wandi.

¹⁰Jesse amaviosa yisambuali yiandi yibaana bababaala va gusu Samuel; Samuel amavosa rie: Fumu agaasola ne umosi va gari ogu.

¹¹Mbana Samuel amawivula Jesse rie: Baana bagu bababaala abotsu bana? Amawaka rie: Vesiali tindi ngebi, David; eyenakelisa bindombu. Mbana Samuel amaruma Jesse rie: Ruma mutu uyemunengila mu mbari tugoleji mulambu upagu tsiunyensa te na oruga.

¹²Jesse amasindiga mutu uyemunengila. Kabogu amaba tindi muboti na dunyengi na yinsi yiboti. Fumu amaruma Samuel rie: Relama, musingi matsi madubiatsu, abi kaga.

¹³Samuel amabonga disiyi dimatsi na amamusinga monyi va gusu baana bataji bandi. Yinyunyi yiFumu amagaanga David, ubandila vana yilumbu yieni te no gusu. Samuel amarelama amayenawenda o Rama.

¹⁴Yinyunyi yiFumu amasila Saul na yinyunyi yibi yimasindugu na Fumu umupupisa.

¹⁵Basalitsi baSaul bamamutsingula rie: Laba yinyunyi yibi ayimasindugu na Nsambi yigupupisi.

¹⁶Kokolu tsiagu fumu, gukasingisa jetu basalitsi bagu uromba mutu aguijabi usiga sambi; ava Nsambi osindiyila yinyunyi yibi mutu eni osiga yisigu yiandi uguvumisa.

¹⁷Saul amawaka basalitsi, bandi rie: Diwelimina, tombilianu aguijabi usiga; dukamumbeyila.

¹⁸Musalitsi andi umosi amamutsingula rie: Nyimalaba muana uJesse muisi Bethleem aguijabi usiga; avu na tindi mangolu, avu mutoyitsi mavita, evosi buranga, ana yinsi yiboti va julu vana Fumu aji nandi.

¹⁹Saul amatinda bilumbi ombu Jesse umutsingula rie: Tindili muana agu David, oyikelisi bindombu.

²⁰Jesse amabonga buru aji amalongila biguji na tsu va malamu na muana yinsabi na amatinda bima bieni na muana andi David ombu Saul.

²¹David amatola ombu Saul na amakelasa ombu gandi. Saul amalaba tindi ubueji nandi na amamuvega yisalu uyenabeganga bitogulu biandi.

²²Saul amasindiga mutu uyetsingula Jesse rie: David abi nami, endasi ubueji.

²³Ava yinyunyi yibi ayimasindugu na Nsambi yimapupisila Saul, David amabonganga sambi na amajisiganga. Mbana Saul amavumanga; amabembugu na yinyunyi yibi yimakakananga nandi.