Read Punu 1 Samuel 17 Bible Online

1 Samuel 17 - Punu bible

1 Samuel 17

¹BaPhilistin bamabengusana mabadi mogu utoga divita na bamagukama va Soko aguvu o Juda; bamavaga milaku va gari Soko na Azeca va Efes-Dammim.

²Saul na mabadi mabaIsrael bamagukama wandi; bamavaga milaku o yibususu yiTerabeta, bamakunsama utoga na baPhilistin.

³BaPhilistin bamaba o julu mukongu o yiari yimosi na baIsrael bamaba o julu mukongu o yiari yisusu: yibususu yimabakakasana.

⁴Gora jimosi amapalila o milaku mibaPhilistin na amakelasa va gari mabadi motsu mabeji. Diina diandi Goliath agumaba muisi Gat; amaba na yirela yimetera yirieru na mua yibuku.

⁵Amaduaranga yisiemba yikunga na amaduaranga yikutu yibudilu yimagagala; utsira uyionyi umaba magumasiamunu makilu.

⁶Amaduaranga basamberi bakunga na ngubu jikunga va gari masambaka.

⁷Pandi jidikongu diandi jimaba nana munongu umubuangitsi na utsira udikongu diandi umaba yisambuali yikilu na yibuku. Jandi agumabeganga ngubu andi amarelanga va gusu andi.

⁸Goliath amarelama na amawivula baIsrael rie: Dibandu yi duikunsimini utoga divita? Menu ngaa muPhilistin? Jenu dugaa baviga baSaul? Solanu mutu aguyitoga nami!

⁹Pa orungula umbetsa nomboka, tuba baviga benu; tumba pa nyumubelisa nomuboka, duba baviga betu.

¹⁰MuPhilistin amabasovisa rie: Jenu baIsrael duna mutu agurungula utoga nami namunyi?

¹¹Saul na bagora bandi banogulu posulu tsimuPhilistin eni bamaregama na bamagaangu na goma jineni.

¹²Kabogu David amaba muana umuisi Efrata o Bethleem o Juda, diina diandi Jesse agumaba na yinana yibaana bababaala, nesi va temu Saul, dibaala dieni dimanuna kala.

¹³Baana barieru batega baJesse bamaduka Saul o divita; abamawenda nandi o utoga divita ababa: Eliab na Abinadab na Chamma.

¹⁴David amaba tindi ngebi. Bivunda birieru banoduka Saul,

¹⁵David amawendanga yigabuyi ombu Saul tumba amatsananga o Bethleem uyekelisa bindombu bitaji andi.

¹⁶Magumana mabilumbu Goliath amalabananga: kedi na tsisiga va gusu dibadi dibaIsrael.

¹⁷Yilumbu yimosi Jesse amaruma muana andi David rie: Bongila baana banguji bagu yietsu yieyiyi yiputu tsigaangu na yigumi yimapa, lensa noyevega baana banguji bagu o milaku;

¹⁸bega na yigumi yieyiyi yifomasa ombu yivunda yiogu yibatosini. Yelabati yeri baana banguji bagu baji buranga. Gukayinsingula misamu miogu.

¹⁹Jogu na Saul na dibadi dibaIsrael botsu bavu o yibususu yimiri miterabeta utoga betoyi na baPhilistin.

²⁰David amarelama kedi jineni. Amasila bindombu na mukelisi ususu, amanangula mufuna na amasogama nana Jesse amamurumina. Ava amatolila o milaku amarasuna bagora ukunsama bekunsimi uyetoga divita na ugamuga begamuyi migamu midivita.

²¹BaIsrael na baPhilistin bamakunsama utoga, dibadi na dibadi disusu.

²²David amawakisa abimaba nandi ombu mutu ubikelisa na amawenda mbangu ombu bagora abamaba batandama. Yika etoli, amawivuia baana banguandi rie: Duji buranga?

²³Ava amavosilanga nogu, Goliath muisi Gat amakueka va gari mabadi motsu mabeji; amavosa mambu ama amalevosanga; David amamagulu.

²⁴BaIsrael botsu ava bamalabila dibaala dieni bamagabuga mansinsima na goma.

²⁵Mutu mutu amawivulanga rie: Duilabi dibaala dieni adiruyi? Eruyi umueyisovisa baIsrael! Pa mutu omuboka, kaga omuvega tindi busina na omuwetsa na muana andi umugetu na ndagu taji andi jigomuefuta lepu.

²⁶David amawivula bagora abamaba bebeli nandi rie: Yi bovayila aguboka muPhilistin eni agugusula yisonyi ombu baIsrael? Yi muPhilistin eni avu, agusarebu eni? Dibandu yi esiengili dibadi diNsambi aguvu monyu?

²⁷Batu bamavosulila munongu mosi, bamamutsingula rie: Anana bovayila jandi agumuboka.

²⁸Muana nguji andi Eliab agumamugulu ava evosili na batu beni amanyoyila David tindi kabu. Amawivula rie: Dibandu yi gutsiruyila? Na nyi gutsisila mua bindombu bieni o kumu? Nyijabi dunangu duagu na bikumbu biagu. Gutsiruga uyilaba nana betoyili.

²⁹David amawaka rie: Diambu yi nsivaga? Yika uwivula nsiwivula.

³⁰David amamuliyila nsima na amawivula gora jisusu bivu abi amalewivula; amamuwaka nana temu ajitega.

³¹Banogulu mambu amamavosu na David, bamayematsingula Saul agumamunengila.

³²David amatsingula Saul rie: Ne mutu mosi ayadeda mu diambu dimuPhilistin eni! Meʼ beni nyuweʼ uyetoga nandi.

³³Saul amatsingula David rie: Gugorungula uyetoga na muPhilistin eni mu mbari guki ngebi na jandi avu muisi mavita ubanda na bufudu buandi.

³⁴David amatsingula Saul rie: Ava nyimabungulila bindombu bitaji ami pa yimbungu vo ursa yimaruga uyigaanga yimosi mu mugamba

³⁵nyimayibingisa noyidimba, nyimayipatula yindombu. Pa yimaronda utoga nami nyimayibatiga va mingunga na nyimayidimba te na yimafu.

³⁶Anana nyimabetsila yimbungu na ursa, nyuvayila muPhilistin agusarebu munongu mosi mu mbari amasienga dibadi diNsambi aguvu monyu.

³⁷David amamuevosa rie: Fumu agumakwaka kalala mu nyala tsiyimbungu na mu makindi maursa okwaka kalala mu miogu mimuPhilistin wandi. Mbana Saul amatsingula David rie: Ka wendanga, Fumu abi nagu!

³⁸Saul amaruma mutu uduisa David bikutu biandi, amamuduisa yisiemba yikunga na yikutu yibudilu.

³⁹Va julu vana amaduara dijenga diSaul na amaweliga uwenda mu mbari mbe asakaweliga na kala. Tumba amatsingula Saul rie: Ngorungula uwenda na bitogulu biebibi, nyisakaguku na bionyi. Amabisila.

⁴⁰Amabonga nguangu andi na amasola mamanyi maranu maboti mu mujamba; amamapodula mu kobi andi. Mbana amabonga yilangandaji yiandi; amawenda uyetoga na Goliath.

⁴¹Goliath amakuekanga pesu pesu ombu David na dibaala adimayenabeganga ngubu andi amawendanga va gusu andi.

⁴²Anolabilila David amamulensa, amamulaba yika muana agumaba tindi muboti na yinsi yiboti.

⁴³Goliath amagamuyila David rie: Mondi nyivu yiri guiruyi na nguangu ombu gami? MuPhilistin amamuloga na bansambi bandi,

⁴⁴na amabuela rie: Ruganga, nyuguboka; batsoli na bibulu bimusiru boji musonyi agu.

⁴⁵David amatsingula muPhilistin rie: Guiruyi uyitoga nami na dijenga na dikongu na dibaga; tumba menu nyutoga nagu na diina diFumu mabadi na diNsambi mabadi maIsrael agu ndeʼ gumasienga.

⁴⁶Fumu oguwakisa namunyi ombu gami nyugubetsa na nyugutabula muru; namunyi nyuwakisa mfumbi tsibaPhilistin ombu batsoli na bibulu bimusiru. Na bisi butamba buotsu bojaba yiri baIsrael bavu na tindi Nsambi.

⁴⁷Dibuli diotsu dibaIsrael bojaba yiri Fumu egobuli tsiri na dijenga vo na dikongu. Avu Fumu divita diedidi. Jandi oduwakisa ombu getu.

⁴⁸Yika Goliath ebandi uvioga va gusu David, David amavioga mbangu o mbura aji bamatoyilanga uyebengusana muPhilistin.

⁴⁹Amakotisa dikaka mu kobi andi, amabonga dimanyi dimosi na amaditinda na yilangandaji yiandi. Dimanyi dimanamu muPhilistin va mbami andi na dimakota tindi ukota; muPhilistin amaberuga magudama.

⁵⁰Anana David amavayila; na yilangandaji na dimanyi dimosi amabelisa muPhilistin, asamasalisa nesi dijenga umuboka.

⁵¹Amawenda mbangu, amayesikama va mbura aji Goliath amaba, amasomuna dijenga mu yisupu yiGoliath na amamutabula muru. BaPhilistin banolaba yiri ngogaga ogu amafu bamarina.

⁵²Bagora baIsrael na baJuda bamagamuga migamu midivita na bamabingisa baPhilistin te no yibususu nesi o dikotulu dimusiengi uEcron. BaPhilistin bamatsunguga tindi utsunguga, bamayenaberuganga muna nsila jiChaaraim te no Gat nesi te noEcron.

⁵³BaIsrael bamaruyila o ubingisa baPhilistin na bamakinda milaku miogu.

⁵⁴David amabonga muru uGoliath; amayenagubega o Jerusalem; amakotisa bitogulu biandi o ndagu andi jitsanda.

⁵⁵Ava Saul amalabila David ewendi uyebengusana Goliath amawivula Abner yivunda yibagora rie: Mua mufudu eni muana nyi? Abner amawaka rie: Dingensa, ngemujabi.

⁵⁶Kaga amaruma rie: Jaba muana nyi avu.

⁵⁷David anoboka Goliath amagabuga o milaku; amamubega ombu Saul. (David amaba na muru uPhilistin va dikaka.)

⁵⁸Saul amamuwivula rie: Mufudu, ndeʼ muana nyi? David amawaka rie: Muana musalitsi agu Jesse muisi Bethleem.