Read Punu 1 Samuel 19 Bible Online

1 Samuel 19 - Punu bible

1 Samuel 19

¹Saul amaruma muana andi Jonatan na baneni bandi botsu ubokisa David. Tumba Jonatan muana Saul amarondanga David tindi umuronda.

²Amamulubusa rie: Taji ami Saul erondi ugubokisa. Gukakebana, mugesa kedi romba mbura gukayesuemina.

³Nyupala va mosi na taji ami o kumu o yiari ayi guba; nyuguvosila ombu taji ami, nyugulu adi ovosa mbana nyugutsingula dionyi.

⁴Jonatan amavosa maboti maDavid ombu taji andi rie: Ndeʼ aguvu kaga, guyavayila musalitsi agu David dibi mu mbari asamaguvayila dibi, adi amaguvayila dimaba diwelimina.

⁵Amabufuila ava amabokila Goliath, muna yilumbu yieni Fumu amalungisa baIsrael botsu. Gumadilaba na mu dionyi gumalaba tindi nsangu. Dibandu yi gukevega mbela jimalungu ma a-gugaa na diambu? Dibandu yi gubokisila David?

⁶Saul amagulu diufi diJonatan na amaleva pesi rie: Fumu jaʼ beni ejabi! David agofu.

⁷Jonatan amanengila David na amamutsingula mambu meni motsu: mbana amamubega ombu Saul na amatsananga nana na kala.

⁸Divita dimamuebanda, David amayetumuna baPhilistin na amatoga nogu, amababelisa tindi ubabelisa te na jogu bamamurina.

⁹Mbana yinyunyi yibi ayimasindugu na Fumu yimagaanga Saul agumaba atsana o ndagu andi na dikongu va dikaka na David amasiganga sambi.

¹⁰Saul amatinda dikongu umubatiga va yibaga. Tumba David amadumuga, Saul amanonga yika yibaga. David amakumba nyuru na amarina vana tsisiga eni.

¹¹Saul amasindiga batu o ndagu David uyemuviva yiri bomuboka kedi. Tumba Mikal mugatsi David amamulubusa rie: Pa gugorina na mukolu egugu, gufu mugesa kedi.

¹²Amamusundusa va fenetera na David amayenarina yiri agoboku.

¹³Mbana Mikal amabonga kosi; amajisiliga va tangi; amabonga mukata uyinsabi amagusunsa va mbura muru na amajigumba dimfunga.

¹⁴Ava Saul amasindiyila batu uyemulanda Mikal amabatsingula rie: David ubela ebeli.

¹⁵Saul amamuebasindiga uyemulanda nanamavosa rie: Mumbeyilianu nesi va tangi andi yiri nyumubokisa.

¹⁶Batu beni bamagabuga; bamalaba kosi na mukata uyinsabi va tangi.

¹⁷Saul amawivula Mikal rie: Dibandu yi gumandunsila? Dibandu yi gumarinisila muvinitsi ami? Mikal amawaka Saul rie: Amansingula rie: Ndundi, mbe nyuguboka!

¹⁸Anana David amarinina. Amawenda ombu Samuel o Rama na amamutsingula motsu ama Saul amamuvayila. Mbana amawenda uyetsana na Samuel o Nayot.

¹⁹Bamayetsingula Saul rie: David avu o Nayot o yiari yiRama.

²⁰Saul amasindiga batu uyelanda David. Bamalaba dibuli dibabiyitsi abamabiganga, Samuel amaba yivunda yidibuli diogu. Yinyunyi yiNsambi amagaanga bilumbi biSaul, jogu wogu bamabanda uyina nogamuga.

²¹Bamayetsingula Saul na jandi amasindiga batu basusu, jogu wogu bamayina nogamuga. Amamuesindiga dibuli adimurieru na jogu bamayina nogamuga munongu mosi.

²²Mbana Saul amawenda jaʼ beni o Rama, anotola va yiduna yimamba, ayivu o Sekou, amawivula rie: Samuel na David agunyi bavu? Bamamuwaka rie: Bavu o Nayot o yiari yiRama.

²³Amawenda o Nayot o yiari yiRama. Jaʼ wandi amagaangu na Yinyunyi yiNsambi; Saul amayenawendanga noyenayinanga nogamuganga te na amatola o Nayot o yiari yiRama.

²⁴Amavula biduaru biandi na amayina nogamuga va gusu Samuel wandi; amakebuaga penyi va tsi yilumbu yieni yiotsu na mukolu uotsu. La dibandu bamawivulila rie: Saul wandi avu mubiyitsi?