Read Punu 1 Samuel 2 Bible Online

1 Samuel 2 - Punu bible

1 Samuel 2

¹Mbana Anne amasambila dusambu duedudu rie: Fumu amambasa na nsangu, Fumu amaroyisa mangolu mami, Nyilensi bavinitsi bami. Nyilabi nsangu na duwamusu duNsambi.

²Vagaa mutu aguvu usiema nana Fumu; vagaa Nsambi jisusu yika ndeju; vagaa dimanyi adivu dedi na Nsambi etu.

³Dundanu posulu tsidunangu; posulu tsibisiengu tsiyamuepala mu miunu mienu; Fumu avu Nsambi aguijabi motsu, jandi ekeluli mambu motsu.

⁴Pita jibango mangolu jimatabuga, abadeda bamamuedila mangolu.

⁵Abamaba na biguji bipuela berombi biguji, abamaba na nsala bamagukuru. Yinguma yimugetu amabura yisambuali yibaana, tumba agumaburanga amakaluga yinguma.

⁶Fumu ebokisi na eveyi monyu; esindiyi batu o mbura jiabafu na ebagabusi wandi.

⁷Fumu eveyi bujaga na eveyi busina wandi; esundusi tumba ematisi wandi.

⁸Eretsiyi yifufu agumaberuga, egobuli agumabuagu ubatsanisa va mosi na bivunda va yitsiga yibundumba; mu mbari butamba buotsu buvu buFumu; jaʼ beni amatusunsa mu makutu.

⁹Okipanga taka tsijogu abemurondi. Tumba abemugali bobungu o pisama; mu mbari mutu agelungi na mangolu majaʼ beni.

¹⁰Bavinitsi baFumu boregama; ava obatindila yidumi yiandi; Fumu otabula bunsonsi te no biari biotsu bimalongu. Eveyingi kaga jibatu bandi mangolu; oroyisa mangolu mayibiatsi yiandi.

¹¹Elcana amagabuga o ndagu andi o Rama. Tiimba Samuel amakota o yisalu yiFumu o Silo o tsi durumu duHeli muvagulitsi upagu.

¹²Baana bababaala baHeli bamaba batu babi na basamajabanga Fumu.

¹³Guluanu nana yifu yibavagulitsi bapagu beni yimabila ava bamavagulila pagu: pa mutu amavagula pagu yiotsu ayi bamalambila nyama musalitsi umuvagulitsi upagu amaba vana, amaba na musomu uminu marieru va dikaka diandi.

¹⁴Amagutsoka mu mambiji mamunongu na munongu na jiotsu aji musomu umapalisanga ajina jimaba jimu vagulitsi upagu. Anana baana bababaala baHeli bamavayilanga baIsrael botsu abamawendanga o Ndagu Nsambi o Silo.

¹⁵Nesi bakanyensa matsi mayibulu, musalitsi umuvagulitsi upagu amavosa na jandi agumavagulanga pagu rie: Peyi nyama jiugangila muvagulitsi upagu; agosinga nyama jilambu, erondi nyama jimbisu.

¹⁶Pa mutu omutsingula rie: Lenyensa matsi mayibulu mbana gubonga aji guirondi; musalitsi amawaka rie: Nesi! Jipeyi namapapa, pa tsiri nana nyugupatulajionyi.

¹⁷Baana bababaala baHeli bamakerombisa mbela jidibi dineni va gusu Fumu ava bamalevulila pagu tsiFumu.

¹⁸Samuel amasalanga yisalu va gusu Fumu na amaduara yilinga yiyijungi yibuvagulitsi bupagu yimatsanda maboti.

¹⁹Yilima na yilima nguji Samuel amamurariyilanga yilinga na amamubeyilanga yionyi ava bamawendilanga na mulumi andi o uyevagula pagu.

²⁰Heli amagabila Elcana na mugatsi andi miula na amavosa na mugatsi andi rie: Fumu agubuesi baana na mugetu egugu aboba va yivinga yi-agu amawakisa ombu Fumu! Mbana bamayenagabuga o dimbu diogu.

²¹Fumu amabanganga na Anne na amabura baana barieru bababaala na babagetu babeji. Samuel amabanguganga va gusu Fumu.

²²Heli amanuna tindi ununa na amagulu nana baana bandi bababaala bamavayilanga baIsrael botsu; amagulu wandi yiri bamasilamanga na bagetu abamasalanga va dikotulu dindagu yibenguna.

²³Amabawivula rie: Dibandu yi duivayili mambu mamunongu eni? Batu botsu bagensinguli bifu bieni bibi?

²⁴Baana bami dundanu. Ama nyigulu bevosi magaa maboti; jenu duirombisi batu baFumu uvaga dibi.

²⁵Pa mutu ovayila mutu ususu dibi, Nsambi omutabulila bunsonsi tumba pa mutu ovayila Fumu dibi anyi orungula umutabulila bunsonsi? Ne nana basamagulu diufi ditaji ogu. Fumu amatabula diambu yiri bafu.

²⁶Samuel amabuelanga unega na amalasanga Fumu na batu ubueji.

²⁷Mubiyitsi amawenda ombu Heli na amamutsingula rie: Fumu jandi rie: Nyisamakelasa o ndagu taji agu ava amabila o Egypte o ndagu Pharaon?

²⁸Va gari bifumba biotsu biIsrael nyimasola Aaron unsalila yisalu yiami yibuvagulitsi bupagu nomatanga o yinyensulu yiami yipagu unyensa bima bimbunga jiboti noduara yilinga yiyijungi yibuvagulitsi bupagu va gusu ami. Nyimabavega jogu na bategula bandi, pagu tsiotsu tsiunyensa atsimasielusunu o muji atsi baIsrael bepagulilingi.

²⁹Dibandu yi duinyungilili pagu tsiami tsiunyensa na pagu tsiami tsitsangu atsi nyimaduruma upagulila? Dibandu yi guiyitsili baana bagu uviolila menu? Jenu na baana bagu uroga duiroyi na pagu tsibatu baIsrael.

³⁰Gulu adi menu Fumu Nsambi Israel nyivosi rie: Nyimavangana yiri jenu na bisi ndagu agu nesi bisi yifumba yiagu dubanganga bavagulitsi bapagu va gusu ami mutubu. Tumba namunyi nyivosi rie: Viaga! Nyuyitsa abekitsi tumba nyulensa abendensi.

³¹Gulu temu jika bebeli aji nyubungila mangolu magu na mangolu mamukuta agu nesi mu yifumba yiagu vagosiala ne yinunu yimosi.

³²Gulaba muvovinitsi agusala yisalu yindagu ami. Diuleba Fumu ofunisila baIsrael maboti; vagosiala ne yinunu yimosi o ndagu agu.

³³Nyusingisa aguagu umosi ugengila yika ugengila yisalu yiami yiyinyensulu yipagu agulilanga na mabembu ava yifumba yiotsu yiugudilanga.

³⁴Yilimba ayiugujabisa adi nyivosi namunyi ayiyi: baana bagu babeji Hofni na Pinhas jogu botsu babeji bofu mu yilumbu yimosi.

³⁵Nyukesolila muvagulitsi upagu usigama agusala nana nyirondili. Nyuwarisa yifumba yiandi mutubu na osalanga va mosi na kaga aji nyusola.

³⁶Mutu uotsu agusiala mu mukuta agu oyegudama va gusu andi udila mua mbongu nesi yibuku yidipa na omuvonda rie: Kokolu tsiagu, peyi yisalu yika la yisalu ombu bavagulitsi bapagu yiri ngofu na nsala.