Read Punu 1 Samuel 21 Bible Online

1 Samuel 21 - Punu bible

1 Samuel 21

¹David amawenda o Nob ombu muvagulitsi upagu Ahimelek; amawenda mbangu noregama ubengusana David. Amamuwivula rie: Dibandu yi guvu pinsa? Vagaa mutu oyilingi nagu?

²David amawaka rie: Kaga amapega diruma rie: Mutu ayajaba dibandu didiambu adi nyigusindiyili. La dibandu nyimavanginina ubenguna na batu bami va mbura.

³Yi yivu nagu o ndagu? Peyi mapa maranu vo yima yisusu ayivu nagu.

⁴Muvagulitsi upagu amawaka David rie: Ngaa na mapa o ndagu nana na kala tumba vavu mapa mapagu; pa batu bagu bagaafubana bitsiga na bagetu nyurungula uguvega monyi.

⁵David amamugabusila rie: Tubusilanga ufubana bitsiga na bagetu tuka mua temu, ubandila na yilumbu ayi nyimasogama batu bami botsu bavu balioma, lesa mu mulingu ujetu beni tukekelisa balioma tambusa na mulingu egugu?

⁶Kabogu muvagulitsi upagu amamuvega mapa mayingitsi mu mbari vasamaba mapa masusu; yika mapa mapagu amamagusululu va gusu Fumu novinsu na amamagoku muna yilumbu yieni.

⁷Muna yilumbu yieni musalitsi umosi uSaul amaba adibugu va gusu Fumu; amaba muisi Edom, diina diandi Doeg; amaba yivunda yibabungulitsi babindombu baSaul.

⁸David amawivula Ahimelek rie: Gugaa na dikongu vo dijenga o ndagu agu? Ngaadila temu ubega ne dijenga ne bitogulu biami mu mbari kaga amaruma rie: Lensa.

⁹Muvagulitsi upagu amawaka rie: Bonga dijenga diGoliath, muPhilistin agu ndeʼ beni gumaboka o yibususu yiterabeta: divu dipietu va muvelu o nsima yilinga yiyijungi yibuvagulitsi bupagu; pa guirondi udibonga, dibongi mu mbari vagaa disusu vava. David amavosa rie: Vasakalabana dijenga dimunongu eni; dipeyi!

¹⁰David amarelama na muna yilumbu yieni amarina Saul tindi vala. Amatola ombu Akich, kaga jiGat.

¹¹BaAkich bamamuwivula rie: Aguna tsiri David aguvu kaga jibulongu buIsrael? Tsia mu diambu diandi bagetu bamayenawimbililanga ava bamayenayininanga rie: Saul amaboka tosini andi, David amaboka yigumi yiandi yitosini.

¹²David amakelisa mambu meni mu murima andi na amalaba Akich, kaga jiGat, tindi goma.

¹³Amakelasa ombu gogu nderi dilagu avu; amavaga mambu makulini: amayenasonanga va maguyi na mateji mamayenakelumuganga mu penga andi.

¹⁴Akich amawivula baneni bandi rie: Dugelabi yiri mutu egugu dilagu avu? Dibandu yi duimubeyili ombu gami?

¹⁵Je meʼ nyina nsala dilagu la dibandu duimbeyili jandi guna yiri nyuba mbeji jikulini tsiandi? Agokota o ndagu ami!