Read Punu 1 Samuel 26 Bible Online

1 Samuel 26 - Punu bible

1 Samuel 26

¹Bisi Zif bamawenda ombu Saul o Guibea na bamawivula rie: Gugejabi yiri David usuema esuemi o julu mukongu uHakila va nsungisini na kumu?

²Saul amaretsama na amawenda o kumu jiZif na tosini yirieru tsibagora baIsrael abamasolu uyeromba David.

³Amavaga milaku va julu mukongu uHakila va mugula nsila. David amaba o kumu; amagulu yiri Saul uduka emuduki.

⁴Amatinda baleyitsi na amagulu na buranga yiri Saul amatola.

⁵Mbana David amarelama amawenda o mbura aji Saul amavaga milaku na amalaba yitsiga yiSaul na yiAbner muana Ner agumaba yivunda yibagora bandi. Saul amasiliminanga va gari milaku na batu botsu bamamutsiengila yiari na yiari.

⁶David amanengila Ahimelek muisi Hitt na Abichai muana dibaala uSerouia muana nguji Joab, amabawivula rie: Anyi owenda nami o milaku miSaul? Abichai amawaka rie: Meʼ nyuweʼ nagu.

⁷David na Abichai bamawenda mukolu o milaku; va temu eni Saul amaba yilu vana na dikongu diandi dimaba disumu va tsi o muru yitsiga. Abner na bagora botsu bamamutsiengila yiari na yiari, botsu yika bilu.

⁸Abichai amatsingula David rie: Namunyi Nsambi eguwakisi muvinitsi agu; kokolu tsiagu nsingisi yiri nyumusuma dikongu diami te na butamba yiri ngomueruga gunu mu diambu diedidi.

⁹Tumba David amawaka Abichai rie: Guyamuboka! Anyi orungula ubemba yibiatsi yiFumu norina mbela?

¹⁰David, amavosa rie: Fumu ejabi! Fumu jaʼ beni omudimba, diurungula uba yiri yilumbu yiandi yiutola na ofu vo owenda o betoyili divita na ofuila guna.

¹¹Tsatsabi, ngorungula ubemba yibiatsi yiFumu! Bonga yika dikongu adivu o muru yitsiga yiandi na tsuva mamba, tʼwendi.

¹²Kabogu David amabonga dikongu na tsuva mamba abimaba va muru yitsiga yiSaul; bamayenawenda. Ne mutu mosi asamabalaba, ne mutu mosi asamajaba adimaba; mutu asamarambuga mu mbari botsu bamaba tindi bilu abi Fumu amabawendisa.

¹³David amasabuga o disimu dimosi na amasikama o julu mukongu vala na milaku miSaul.

¹⁴Mbana amagamuyila bisi milaku na Abner muana dibaala uNer rie: Abner, gugowagula? Abner amawaka rie: Ndeʼ lʼanyi aguivayili kaga nduku?

¹⁵David amawaka Abner rie: Ndeʼ gugaa dibaala? Va gora ajivu dedi nagu o Israel? Dibandu yi gugekelisi kaga agu? Mutu amakota uyemuboka.

¹⁶Adi gutsivaga digaa diwelimina. Fumu ejabi! Diwelimina yiri duboku jenu botsu mu mbari dugaakipa fumu enu aguvu yibiatsi yiFumu. Labati, dikongi difumu na tsuva andi mamba abibetsi va muru uyitsiga yiandi!

¹⁷Saul amajaba diufi diDavid kabogu amawivula rie: Je dina diufi diagu David? David amawaka rie: Nyiina, diufi diami, kaga fumu ami!

¹⁸Mbana amawivula rie: Dibandu yi guimbingisili? Yi nyimavaga? Diambu yi dipeyi mbela?

¹⁹Kaga aguvu fumu ami, gulu posulu tsiami: pa Fumu egusibisi umbingisa asingi pagu. Pa batu begusibisi, Fumu abaloyi. Bembingisi namunyi yiri nyutsana o bulongu abu Fumu amapega nderi bensindiyi rie: Wenda yesalila bansambi bangana.

²⁰Aa, malungu mami mayabonduga va tsi vala na Fumu! Dibandu yi guindukili, menu aguvu mugenyi? Dibandu yi guimbingisili nderi mutu ebingili nguali o musiru?

²¹Saul amavosa rie: Nyimavaga dibi David, muana ami ruganga ngomueguvaga dibi mu mbari namunyi gumakipa diambu dimonyu ami. Nyimavaga buduka na nyimavaga dibi dineni.

²²David aftnavosa rie: Dikongu diagu aradi! Mutu agu ayidibonga.

²³Fumu osaka mutu mutu dedi na dusungugu duandi na usigama uandi; namunyi Fumu amaguwakisa ombu gami tumba ngaaronda uguboka mu mbari Fumu amagusola uba kaga.

²⁴Dedi mosi nana nyimakipila monyu agu namunyi Fumu ekipili monyu ami; okwaka kalala ava nyulabila maguga.

²⁵Saul amatsingula David rie: Miula mibi nagu, muana ami David! Bisalu biagu biotsu biugabulu miula! David amayenawenda, Saul amayenagabusila o ndagu andi.