Read Punu 1 Samuel 27 Bible Online

1 Samuel 27 - Punu bible

1 Samuel 27

¹David amatasa rie: Yilumbu yimosi Saul omboka; dimosi buandi diwelimina nyuyesuema o bulongu bubaPhilistin mbana Saul odunda umbingisa o bulongu buotsu buIsrael; anana nyumurinina.

²David amasogama na kama yisiamunu tsibadukitsi bandi, bamawenda ombu Akich muana dibaala uMaok agumaba kaga jiGat.

³David na badukitsi bandi bamatsana o Gat ombu Akich; mutu mutu amaba na mukuta andi; David amaba na bagatsi bandi babeji, diwendi rie: Achinoam agumaba muisi Jizreel na Abigail agumaba muisi Karmel agumaleba mugatsi Nabal.

⁴Saul anogulu yiri David amarina o Gat kabogu amadunda umubinga.

⁵Yilumbu yimosi David amatsingula Akich rie: Pa guilabi yiri nyivu nyiwelimina peyi mbura o musiengi ususu aji nyutsaninanga. Dibandu yi nyitsaninanga nagu o musiengi ukaga?

⁶Muna yilumbu yieni Akich amamuvega Siclag. La dibandu Siclag uvu musiengi ubakaga baJuda te na namunyi.

⁷Yitsingu yiDavid o bulongu bubaPhilistin yimaba yilima yimosi na tsungi jina.

⁸David na badukitsi bandi bamarambuyila Siclag uyenatumanga baGuechourie na baGuirzie na baAmalec; kala kala bisi malongu meni bamatsananga o Chour te no mandilu maEgypte.

⁹Bamabunga tindi ubunga yiari yieni; bamabokisa botsu nesi babaala nesi bagetu na amabonganga bindombu na bangombi na baburu na basamo na biduaru mbana bamayenagabuga ombu Akich.

¹⁰Ava Akich amamuwivula rie: Banyi dutsiyetumuna namunyi? David amawaka rie: O tandu o yiari yiJuda vo o tandu ombu baYeramelie vo o tandu ombu baQuenie.

¹¹David asamaronda yiri batu botolisa misamu miandi o Gat kabogu amaboka botsu nesi babaala nesi bagetu; mu mbari amatasa yiri bovosa rie: David amavaga kana na kana. Ayina yimaba yifu yiandi ava amatsaninanga o bulongu bubaPhilistin.

¹²Akich amavayila David yitu na amavosa rie: David amakebivisa ombu baIsrael nandi kabogu oba musalitsi ami te na mutubu.