Read Punu 1 Samuel 30 Bible Online

1 Samuel 30 - Punu bible

1 Samuel 30

¹A va David amatolila yilumbu yimurieru na batu bandi o Siclag amarasuna baAmalec bamakinda o tandu o Siclag. Bamapansa na bamanyensa Siclag,

²na bamakotisa bagetu na botsu abamaba guna o buviga, nesi bangebi nesi bivunda. Basamaboka ne mutu mosi tumba bamayenabega botsu ava bamayenawendilanga.

³Ava David na badukitsi bandi bamatolila o musiengi bamarasuna umanyensu; bagatsi bogu na baana bogu bababaala na babagetu bamabegu baviga.

⁴Mbana David na badukitsi bandi bamalila tindi ulila te na basamamuedila mangolu ulilanga.

⁵Nesi bagatsi botsu babeji baDavid bamayenabegu; Ahinoam muisi Jizreel na Abigail muisi Karmel agumaleba mugatsi uNabal.

⁶David amagaangu na munyongu uneni mu mbari badukitsi bandi bamavosanga rie: Tumutindili mamanyi; botsu bamabasa na munyongu mu diambu dibaana bogu bababaala na babagetu. Tumba David amawarisa murima na Fumu Nsambi andi.

⁷Amaruma Abiatar muvagulitsi upagu agumaba muana uAhimelek rie: Kabogu mbeyili yilinga yiyijungi yibuvagulitsi bupagu! Abiatar amawakisa David yilinga yiyijungi yibuvagulitsi bupagu.

⁸David amawivula Fumu rie: Nyuduka bakinditsi beni? Nyubadala? Fumu amamuwaka rie: Baduki, gubadala na guwaka baviga kalala.

⁹David amasogama, jogu na kama yisiamunu tsibadukitsi bandi. Bamatola o mujamba uBessor avana abamayenasialanga nsima bamasikimina.

¹⁰Tumba David amayenawenda na kama jina tsibadukitsi; kama beji tsibadukitsi bamasikama va Bessor mu mbari mangolu mamabasuka.

¹¹Bamarasuna dibaala o musiru adimaba muisi Egypte, bamamubega ombu David. Bamamulisa biguji na bamamunuisa mamba

¹²na bamamuvega mifiga na mirayisan migumuga. Anomana uji amamuedila mangolu mu mbari amamana bilumbu birieru binyangu na mikolu mirieru tsiri uji nesi unu mamba.

¹³David amamuwivula rie: Ndeʼ muana nyi? Muisi yi guvu? Amawaka rie: Nyiji muisi Egypte, muviga umuisi Amalec, tuka bilumbu birieru fumu ami amambusa mu mbari nyimabela.

¹⁴Jetu tumakinda o tandu Crete o yiari yiJuda nesi o yiari yiCaleb na tumanyensa Siclag.

¹⁵David amamuwivula rie: Gusinga umbega ombu bakinditsi beni? Amawaka rie: Ndevili pesi mu diina diNsambi yiri gugomboka na yiri gugokwakisa ombu fumu ami mbana nyuyegulonsa agu bavu.

¹⁶Jandi amaba mulonsi-nsila uDavid; amamulasa baAmalec abamaba o yiari yieni yiotsu: uji bejiangingi nonuanganga noyinanga, usangila besangili mu diambu dibiotsu abi bamakinda o bulongu buPhilistin na bubaJuda.

¹⁷David amabatoyisa ubanda kedi te na tsisiga; ne umosi va gari ogu asamarina, yika kama jina tsibafudu abamanangama mu basamo.

¹⁸David amapatula bagatsi bandi babeji ombu baAmalec na biotsu abi bamakinda.

¹⁹Ne mutu mosi asamagambu; nesi ngebi nesi yivunda nesi muana dibaala nesi umugetu nesi yima yiotsu ayimakindu nesi abi bamabapatula; David amagabusa biotsu.

²⁰David amabonga migamba mibaAmalec nesi bindombu nesi bangombi; jogu abamawendisanga migamba mieni na abamarelanga va gusu bamavosanga rie: Abibi abi David amakinda.

²¹David amatola ombu kama beji tsibadukitsi abamavola nyuru mu nsila na bamakonda umuduka, abamasiala o mujamba uBessor. Jogu bamawendasana ubengusana David na batu bandi. David anobambana nogu amabawivula rie: Duji mua buranga?

²²Vana temu eni bango bikumbu abamawenda na David bamavosa rie: Jogu abagaawenda netu tugobavega ne yima yimosi mu abimakindu; abi tutsiyepatula; yika mutu mutu odila mugatsi andi na baana bandi; bababongi na bayenawendanga.

²³Tumba David amavosa rie: Baana bataji bami duyavaga nana mu abi Fumu amatuvega; amatukelisa na amawakisa bakinditsi beni ombu getu; jogu abamaruga uyitutoyisa.

²⁴Anyi odugulu mu diambu diedidi? Makabu motsu moba dedi nesi ma-abamawenda o utoga nesi ma-abamasiala ukelisa bima; bogabana biotsu va mosi.

²⁵Anana bamavayilanga ubandila vana yilumbu yieni; David amavaga mugaga aguvu te na namunyi o Israel.

²⁶Banogabuga o Siclag David amatinda dikabu dimosi di-abimakindu ombu bivunda biJuda, diwendi rie: ombu bambatsi bandi na amabatsingula mambu memama rie: Adina divu dikabu dienu dibima abimakindu bibavinitsi baFumu.

²⁷Anana amatindila mitindu ombu bisi Bethel nombu bisi Ramot o tandu nombu bisi Yattir;

²⁸nombu bisi Aroer nombu bisi Sifmot nombu bisi Echtemoa;

²⁹nombu bisi Rakal nombu bisi misiengi miYeramelie nombu bisi misiengi mibaQuenie;

³⁰nombu bisi Horma nombu bisi Bor-Achan nombu bisi Atak;

³¹nombu bisi Hebron nombu bisi biari biotsu abi David na batu bandi bamayenavioyilanga.