Read Punu 1 Samuel 6 Bible Online

1 Samuel 6 - Punu bible

1 Samuel 6

¹Yigara yipangini yiFumu yimatsana yisambuali yitsungi o bulongu bubaPhilistin.

²Mbana baPhilistin bamanengila bavagulitsi bogu bapagu na bavanditsi na bamabawivula rie: Yi tuvaga na yigara yipangini yiFumu? Tulonsianu adi tuvaga uyigabusa.

³Bamawaka rie: Pa dugabusa yigara yipangini yiNsambi Israel duyayigabusa pavala tumba vagulilanu Nsambi pagu jiufuta mbela; pa dubeluga dujaba dibandu yi amadulasilanga maguga.

⁴BaPhilistin bamawivula rie: Pagu yi tuvagula? Bamawaka rie: Bibagunu biranu bimavugu na bibagunu biranu bibanguga, biotsu bilora na lora. Biuba dedi na dutalu dubaana babakaga babaPhilistin mu mbari yivunga yimosi yimadugunu jenu botsu nesi bivunda.

⁵Vaganu bibagunu bimavugu na bibagunu bibanguga abebivisi bulongu na yitsanu Nsambi Israel tanguji mu dionyi odugusulila maguga, nesi mabansambi benu nesi mabulongu buenu.

⁶Dibandu yi dugalisila mirima mienu nana bisi Egypte na Pharaon bamagalisila mirima miogu? Asamabalasa mukilu andi na asamawensa baIsrael?

⁷Vaganu dikalu digona na bonganu bangombi babeji abenuisi, abasakaduta yilala na kala na dukatunga ngombi tsieni va dikalu na dukadibiga baana bogu o ndagu.

⁸Dukabonga yigara yipangini yiFumu, dukayinangiga mu dikalu; dukapodula bima biotsu bilora mu mua yigara ayi dusunsa va mugula yigara yipangini, abina duvagulila Fumupagu jiduliomusu; mbana dukadisindiga na diuyenawenda.

⁹Dukayenadidukanga udigengila: pa diuvioyila o nsila jimandilii o yiari yiBet-Chemech, diwendi rie: Fumu agumatuvaga motsu mana; pa tsiri nana tujaba tsiri jandi agumatulasa maguga meni tumba mamalabana yika ulabana.

¹⁰Adina baPhilistin bamavaga. Bamabonga bangombi babeji abamanuisanga na bamabatunga mu dikalu na bamadibiga baana babangombi o ndagu.

¹¹Bamanangiga yigara yipangini yiFumu mu dikalu va mosi na mua yigara ayi bamapodula bibagunu bibanguga balora na bimavugu malora.

¹²Bangombi bamaduka nsila jiBet-Chemech; bamadukanga yika nsila eni noyenagumbanga na basamapembuga yiari na yiari. Bivunda bibaPhilistin bamayenabadukanga te no mandilu maBet-Chemech.

¹³Bisi Bet-Chemech bamatsonsiganga ble o yibususu; banobuaga misu bamalabilila yigara yipangini, bamabasa de na nsangu ava bamayilabila.

¹⁴Dikalu dimatola o nungi Josue o Bet-Chemech na dimasikama vana. Avana vamaba dimanyi dineni, bamapasa dikalu uvaga mikansu na bamavagulila Fumu bangombi pagu tsiunyensa.

¹⁵Bisi Levi bamasundusa yigara yipangini yiFumu na mua yigara ayimaba va mugula yionyi ayimaba na bima bilora; bamasunsa biotsu bina va julu dimanyi dieni dineni. Bisi Bet-Chemech bamavagulila Fumu pagu tsiunyensa na pagu muna yilumbu yieni.

¹⁶Bivunda biranu bibaPhilistin banolaba dionyi bamayenagabuga muna yilumbu yieni o Ecron.

¹⁷Bibagunu bimavugu maranu malora abi baPhilistin bamavagulila Fumu pagu jiduliomusu abibi: yimosi yimusiengi uAsdod, yimosi yiGaza, yimosi yiAscalon, yimosi yiGat na yisusu yiEcron.

¹⁸Vamaba bibagunu bibanguga balora abimaba dedi na dutalu dumisiengi miotsu amimarumu na basefu baranu babaPhilistin; mimosi mimakandu bivaga na misusu yika nana. Dimanyi adimasunsu yigara yipangini yiFumu divu nderi mbeji, dionyi dikivu te na namunyi o nungi jiJosue o Bet-Chemech.

¹⁹Fumu amabokisa bisi Bet-Chemech aya bamadokimina yigara yipangini yiFumu; diwendi rie: Magumidusambuali mababaala. Batu bamakota bukuili mu mbari Fumu amabokisa batu bogu na yivunga yineni.

²⁰Bisi Bet-Chemech bamawivula rie: Anyi orungula uwara va gusu Fumu Nsambi? Ombu nyi yigara yipangini yiuwenda ava yiukakinina netu?

²¹Bamatinda bilumbi ombu bisi Quiriat-Yearim uyebatsingula rie: BaPhilistin bamagabusa yigara yipangini yiFumu; niganu uyiyilandulila.