Read Q'anjob'al Gn 12 Bible Online

Gn 12 - Q'anjob'al bible

Gn 12

¹Ayxatax yalon Jehová bay cham Abram axca ti': Bekcan a tx'otx'al ti' c'al jantak eb ecan, c'al eb cajan bay yatut a mam, cax chach toj bay jun tx'otx' ok in tx'ox ayach.

²A enatil ok oc yin miman nacional wuj, cax ok in tx'oxon in watx'c'ulal ayach. Yelxac'al miman ok yun a binaji; oj ok chaon eb anima watx'c'ulal.

³Ok wak' cawil eb watx' ok yut c'ul en, cax ok in catabnen eb, yob ok yut c'ul en. Ojc'al xan ok wak' in watx'c'ulal yiban masanil eb anima bay yulyibank'inal ti', ẍi Cham.

⁴Axa yel Abram bay tx'otx' Harán tu' axca max yut yalon Jehová bay. Ayxa 75 abil Abram yet max toj bay tx'otx' Canaán.

⁵Max yitok yetbi yetok, a ton xal Saray, c'al nak Lot, is c'ajol camom yuẍtak, yetok eb is chekbej, c'al yetok jantak tzet ay yul is k'ab tol max yi' bay Harán. Caytu' max yun yapni bay Canaán.

⁶Max k'axponej ec' bay juntzan lugar tu' masantac'al max yal yapni oc bay Siquem, bay ay te matx'ji yul yet More, te' ya' yili yuj eb cananeo cajan bay tu' yet jun tiempoal tu'.

⁷A tu' max tx'ox ba Jehová bay cham Abram, cax max yalon bay axca ti': A jun tx'otx' ti' ok wak' masanil bay eb enatil, ẍi Cham bay. Axa watx'nen aj Abram tu' jun altar satak Jehová, yujtol a bay tu' max tx'ox ba Cham bay.

⁸Max lajwi tu', cax max toj bay chonlak tzalan, nan xol conob Betel yetok conob Hai. A tu' max ayji ec'ok. A conob Betel tu', a tu' ay bay yetc'ulal bay chi toj c'u. A tu' max watx'nej aj junxa altar yet chi oc yin ayilal bay Jehová.

⁹Lajwi tu', c'ojanc'ulal max beyc'al toji masantac'al max yal yapni bay tx'otx' Néguev.

¹⁰A ton yet jun tiempoal tu' max yak'on jun miman wajil bay jun lugar bay ayic' Abram tu'. Yuj tu' xan max aytok cham cajay jun tiempoal bay Egipto.

¹¹A yet toxa chi apni oc bay Egipto tu', max yalon bay Saray is yetbi tu' axca ti': A tinani' ay wal jun tzet chin na': A ach ti' caw wal watx' eli.

¹²A yet ok yilon eb nak aj Egipto ti', ok yalon eb nak: A jun ix ti' yetbi jun winak ti', ẍi mi eb nak. Axa naon eb nak in is mak'on cam tu', axa ach xin c'am tzet ok ach yut eb, asan tol ok ach can yetok eb.

¹³Xan a ok ot aloni tol wanab ach, yet watx' xajan ok in yil eb, cax man ok in is mak' cam eb nak oj, ẍi bay.

¹⁴Axa yet max apni oc Abram bay Egipto tu xin, axca ton tu' max yut eb. Max yilon oc eb nak aj Egipto tu', tol a Saray tu' caw wal watx' yili.

¹⁵Max yil c'apax oc eb ayoc yin opiso yetok cham rey tol caw wal watx' yili xal, cax max toj eb nak yalon bay cham, axa yiontok eb xal bay yatut cham rey tu'.

¹⁶Yuj Saray tu' xan watx' max il-lay Abram tu' yuj cham rey tu'. Xiwil is calnel, wacax, no mam burro, c'al no txutxej, c'al no camello max salay bay yuj cham rey tu'. Xiwil eb nak chekbej c'al eb ix chekbej max ak'lay c'apax bay.

¹⁷Palta yailok c'al Saray tu', xan xiwil yailal max jayoc yiban cham rey tu' yetokc'al eb cajan yetok bay yatut yuj Jehová.

¹⁸Xan max chek cham rey tu' bet tit Abram cax max yalon bay axca ti': ¿Tzet yuj xan caytu' chin otej? ¿tzet yuj xan maj al ayin tatol etbi xal ti'?

¹⁹Akxa tinani' tol anab xal ala', toc'al max elocok yet max wiontok xal yuj yoc wetbiok waloni. A tinani xin, itok xal, cax chach toji, ẍi cham rey tu' bay.

²⁰Lajwi tu xin, cax max yak'on cham rey orden bay eb nak is chekbej tu', tol chi ilay el Abram yul conob Egipto tu' yetok yetbi, c'al masanil tzetak yetal ay bay.