Read Q'anjob'al Gn 13 Bible Online

Gn 13 - Q'anjob'al bible

Gn 13

¹A yet max el Abram yetok yetbi bay Egipto yetokc'al masanil is tzetak yetal, max meltzojtok eb yul yet Néguev, cax ajun Lot yetok eb.

²A Abram tu' caw beyomxa, xiwil ch'en oro bay, xiwil is plata, xiwil no no' jobbil yuj.

³Max el pax bay Néguev tu'. C'ojanc'ulal max apni yul yet Betel bay max apni oc yet babelal, bay nan xol Betel tu' yetok Hai.

⁴A tu' watx'nebilcan jun altar yuj, yettax yalantok. A bay tu' max txajli bay Jehová junelxa.

⁵A Lot junej chi ec' yetok Abram, xiwil c'apax is calnel yetok is wacax, cax xiwil is chekbej chi mulnaj yetok.

⁶C'amxa chi yab lugar bay chi low is jobbejal no' eb. Majxa je' tol junej chi ayji eb.

⁷A eb nak yilomal calnel Abram chi yak'lej eb nak owal yetok eb nak yilomal calnel Lot. A yet jun tiempoal tu', cajanto c'apax ec' eb cananeo, c'al eb ferezeo bay tu'.

⁸Yuj tu' xan ay jun c'ual max yal Abram bay Lot axca ti': Caw wal ayontoc'al ocok. Maj je' jak'len owal, tamwal eb nak jilom calnel maj je' yak'len eb nak owal.

⁹A masanil jun lugar ti' colan yayji. Chi je' a sic'len bay chach cani, yet watx' chi co poj co ba. Ta chach tojcan yel ti', ayinxa chin tojcan yoc ti'. Ta chach tojcan yoc ti xin, ayinxa chin tojcan yel ti', ẍi cham Abram tu' bay.

¹⁰Axa toj t'anan Lot bay jun miman ac'al bay ti a' Jordán tu' masantac'al chi apni bay conob Zoar. Ay yaejal jun ac'al tu', lajan yilitok axca junok miman hortaliza, ma axca yili tx'otx' Egipto max yila'. A yet max watx'nen cham Abram tu' is trato tu' yetok Lot, c'amto chi c'aylay el Sodoma c'al Gomorra yuj Jehová.

¹¹A jun ac'al bay ti a' Jordán tu', max sic'can el Lot, cax max cajay bay yetc'ulal bay chi ajol c'u, axca ton tu' max yut pojlen ba Abram yetok Lot.

¹²Xan max can Abram yul makbej tx'otx' Canaán, axa pax Lot xin, max cajay bay xol conoblak bay yac'alil ti a' Jordán, bay cawilal conob Sodoma. A tu' max ayji.

¹³A bay jun conob tu' caw wal c'am watx'il beybal anima, xiwilxa yobtakil chi el yunen eb bay Jehová.

¹⁴Maxc'al toj Lot tu xin, max yalon Jehová bay Abram axca ti': A tinani' iltok a satak, c'al entak, c'al bay a tz'eyil-lak.

¹⁵A masanil juntzan lugar ipan elontok ti', ayin chi wak' ayach yin tojbalk'inal, cax yet c'apax masanil enatil ok yunej.

¹⁶Axca wal yatakil bischaj pokokal tx'otx' tx'otx', caytu' yatakil ok yun bischaj enatil, cax manc'alta' ok bischajok.

¹⁷A tinani xin, ajanwanok cax cha beytzen yin masanil is tel c'al is sat jun tx'otx' ti', yujtol chi wak' jun tx'otx' ti' ayach, ẍi Cham bay Abram tu'.

¹⁸Axa yion aj Abram tu' is campamento, cax max toj cajay cawilal juntzan te matx'ji yul is makbej jun winak chi yik Mamre, cawilal conob Hebrón. Cax max watx'nen aj cham jun altar satak Jehová.