Read Q'anjob'al Gn 16 Bible Online

Gn 16 - Q'anjob'al bible

Gn 16

¹A xal Saray yetbi cham Abram, manc'alta' uniwom ixok xal, palta ay jun is yak'omal serbil xal chi yik Agar, aj Egipto ix.

²Cax max yalon xal bay cham yetbi tu' axca ti': —Ilab tol c'am wune' chi yak' Jehová ti' xan chin tewi ayach tol chach way yetok ix wak'omal serbil ti', talaj chi jay junok yune' ix tol chi oc wuneok, ẍi xal. Max cha c'ul Abram tzet max yal xal Saray tu'.

³A yet lajonebxa abil yayji ec' eb bay Canaán, max yaon oc xal ix is chekbej aj Egipto yul k'ab yetbi tu', yet chi oc ix cab istzilejal.

⁴Axa way cham Abram yetok ix Agar tu' cax max can unin yin ix. Axa yet max yaben ix tol ayxa oc unin yin, cax yaynakilxac'al max yun xal Saray tu' yuj ix.

⁵Lajwi tu' cax max yalon xal bay cham Abram tu' axca ti': —Ojc'al xan yaynakil chin yut ix max wak' estzilok ti'. Ti' pax wal ayin max wak' ix estzilok, akxam laj yet ok jay yune' ix tu' yel miman yelapnok ix wintak chi yut naoni. Beyokab el c'ul Jehová jin etok, ach mi ay a mul ma ayin, ẍi Saray tu'.

⁶Axa tak'wi cham Abram tu' axca ti': —A ix ak'omal serbil ti', yul a k'ab ayoc ix. Ach cha na' tzet chot ix, ẍi cham bay xal. Xan max oc xal ajc'ulal yin ix, masanta max yal yelaj ix.

⁷Palta axa cham yángel Jehová max chalej el ba yetok ix bay tz'inan tx'otx', bay cawilal ti' jun a' aej bay chi tojcan beal Shur.

⁸Cax max k'anlen bay ix axca ti': —Agar, ach yak'omal serbil xal Saray, ¿baytal petoj ach, cax baytal chach toji? ẍi bay ix. —Tol chin elaj bay xal Saray in patrona, ẍi ix.

⁹Cax max yalon cham ángel tu' bay axca ti': —Meltzojan bay xal a patrona tu', yikem chot a ba bay xal, ẍi bay ix.

¹⁰Max yalon c'apax cham ángel tu': Ok wiaj can bisil enatil, c'am mac ok bischaj yuj.

¹¹Tutun yobix ach xa, xan a yet ok jay jun one' tu', Ismael*fn* ok ak' yika', yujtol max yab Jehová ok' yuj a bilc'ulal.

¹²Caw wal sac'ap ok yun jun unin tu' axca junok no xolakteal burro. Ok yak' nak owal yetok eb anima, cax ok yak'on c'apax eb anima tu' owal yetok nak. Ok cajay nak bay chi yochej c'ul caxc'al c'am chi cha' c'ul eb yican, ẍi cham ángel tu'.

¹³Yujtol max k'anjab Agar yetok cham Yajaw, xan max yak' yik axca ti': Cham Dios chin iloni. Chi ali axca ti': Tutun wal yel max wil yin Cham chin iloni, ẍi ix.

¹⁴Yuc'bala' Cham iquis cax chin yilon paxok, caytu' bi a' uc'bala' nan xol Cades yetok Bered yuj ix. Lajwi tu' max meltzoj bayc'alta' ayic'ok.

¹⁵Max jay jun yune' Agar yetok Abram cax max yak'on cham yik Ismael.

¹⁶86 abilxa is k'inal Abram, yet max jay nak Ismael is c'ajol tu'.