Read Q'anjob'al Gn 17 Bible Online

Gn 17 - Q'anjob'al bible

Gn 17

¹99 abil is k'inal Abram, yet max tx'oxon aj ba Jehová bay junelxa, cax max yalon bay axca ti': —Ayin ton Dios in, chi je' wuj masanil, watx'c'al chot a ba in satak.

²Ok wak' jun in trato etok, tol xiwil enatil ok elok, ẍi Cham bay.

³Axa yay nojan Abram tu' sat tx'otx' yak'ban chi k'anjab el Dios yiban. Max c'oli yalon Cham axca ti':

⁴—Tix jun trato ok wak' etok ti': Tol ok ach oc yichmamok xiwil nacionlak.

⁵Majxa ek Abram, palta Abrahamxa*fn* ok eka', yujtol ok ach wacan oc is yichmamok xiwil nacionlak.

⁶Xiwil ok yun wion aj can bisil enatil, ok oc eb nacionlakil. A xol enatil tu', a tu' ok eltek xiwilok eb rey.

⁷A jun in trato chi wak' etok ti', c'al yetok masanil eb enatil tu' yin tojbalk'inal, tol a Diosal in, c'al is Diosal in eb.

⁸A tinani' ec'jabwom ayji bay tx'otx' Canaán ti', palta xin, ok wak' masanil tx'otx' ti' ayach c'al bay eb enatil yin tojbalk'inal, cax is Diosal in eb c'apaxok, ẍi Cham bay.

⁹Max yalon c'apax Dios bay Abraham tu' axca ti': —Axa ach ti' ikej jun in trato ti', cax yowalil chi yikej c'apax eb enatil yet chi beyc'altok.

¹⁰A ton jun in trato chi wak' e yetok ti', tol yowalil che yikej. Masanilokab winak unin chi alay oc yechel is mimanil,

¹¹xan ilayokab el tz'umal jolom is winakil eb e winak unin. A jun tu' yechel in trato yayji e yetok.

¹²Yukubixial yalji junjun winak unin, cax chi alay oc jun yechelej tu' yin eb, caxc'al e yuninal ma yuninal eb e chekbej. Yowalil chi ak'lay c'apax circuncidar eb e chekbej tu', eb tol manbil bay tx'ok conobal. Yowalil chi alay oc jun yechelej tu' e yin junjun ex, yin c'amc'al yeq'uilal. Axca tu xin, a jun in trato e yetok ti' miman txequelokab yin e mimanil yin tojbalk'inal.

¹⁴Tzanc'al mac winakil tol man ocnakok jun yechelej tu' yin, yowalil che yiel e xol, yujtol c'am chi yikej in trato max wak' e yetok, ẍi Cham.

¹⁵Max yalon c'apax Dios bay Abraham axca ti': —A yet ok beytok ti', manxa Sarayok ok yikc'alta' etbi, palta tol Saraxa*fn* ok yika'.

¹⁶Ok wak' yaxilal yiban, cax ok jay junok a c'ajol yetok. Wal yel, ok wak' yaxilal yiban. Ok oc txutxok xiwilok nación; cax xiwil eb reyal conoblak ok eltek xol yinatil tu', ẍi Cham.

¹⁷A yet max yaben cham Abraham jun tu', cax max ay nojan cham tac'al sat tx'otx' cax c'oli tzewi cham, chi c'oli naobtaneni: ¿Tom okto wal jay in c'ajol? 100 abil inxa, cax 90 abil is k'inal Sara, ¿tom okto wal jay yune'? ẍi cham Abraham.

¹⁸Lajwi tu' max yalon Abraham bay Dios axca ti': —Mata wal chi el yin a c'ul, chak' is cawil nak Ismael ti', cax watx'c'al chi eloc nak, ẍi cham.

¹⁹Axa tak'wi Dios bay axca ti': —Mayal wal ayach tol ok jay junok a c'ajol yuj Sara. Isaac*fn* ok ak' yika', a ton yetok nak ok wak' jun in trato ti' yin tojbalk'inal, yetok eb is yinatil nak.

²⁰A pax nak Ismael xin, mayal ach wabej, ok wak' watx'c'ulal yiban, xan xiwil ok yun yinatil. Ok aj can bisil yinatil nak. A xol yinatil nak tu', ok eltek lajcawanok eb mimek yajaw. A yinatil nak tu' mimek nación ok yun yelocok.

²¹A pax in trato max wak' etok xin, ok yunc'alta' yetok nak Isaac nak a c'ajol ok aljok bay Sara yab axca ti' yet junab, ẍi Cham bay.

²²A yet max lajwi k'anjab Dios yetok Abraham tu' cax max toji.

²³Ac'al oc yet jun c'ual tu' max yaoc Abraham tu' yechel nak Ismael tu' yetok masanil eb nak is chekbej, tol aljinak yintak, c'al masanil eb nak tol manbil yuj, yetok masanil eb anima cajan ec' yetok bay yatut. Max yaoc yechel eb masanil, axca yalon Dios bay.

²⁴99 abil is k'inal Abraham yet max alay oc jun circuncisión tu' yin.

²⁵Axa Ismael xin, 13 abil is k'inal yet max alay oc yechel tu'.

²⁶Ac'al oc yet jun c'ual tu' max alay oc jun yechelej tu' yin eb cawanil,

²⁷yetok masanil eb winak ayic' yetok, eb is chekbej aljinak yintak, c'al eb tol manbil yuj bay junokxa tx'ok conobal.