Read Q'anjob'al Gn 18 Bible Online

Gn 18 - Q'anjob'al bible

Gn 18

¹Lajwi tu' max tx'oxon aj ba Jehová bay cham Abraham bay cawilal juntzan matx'ji yul makbej cham Mamre. Chuman mi wal c'u, chotan eltek cham Abraham tu' bay tentail is mantiado, cax max jayoc Jehová bay.

²Axa max yilon Abraham, lecan oc oxwan winak satak. A yet max yilon tu', ayman max toj lemnaj chaon eb, cax yay nojnaj sat tx'otx' satak eb.

³Cax max yalon cham bay junok eb axca ti': —Ach mamin, yuj wal dios, manchakto ex toji.

⁴Echbanejek, ti' chi toj wala', tol chi ilaytek jabok aej, cax ok e tx'ajon e yakan. Xewanek yich te te' ti' bel.

⁵Yak'ban wal e yec' in c'atan ti', ti' chi toj wi' jabok tzet ok e lo', yet watx' chi oc e yip, cax ok ex tok paxok, ẍi cham Abraham tu'. —Asi' xin, ẍi eb bay.

⁶Axa yoctok lemnaj Abraham yul is mantiado tu' cax max yalon bay Sara axca ti': —¡Lim! itek oxebok echbal ixim harina caw wal watx', cax cha watx'nen jayebok yichk'ak'il pan, ẍi bay.

⁷Cax max toj lemnaj Abraham bay ay no' is wacax, max bet yiontek jun no ach'ej wacax caw wal watx', cax max yak'on no' bay jun nak is chekbej yuj watx'nelay el no' yin aymanil yet chi chilay no'.

⁸Cax max yiontek mantequilla, c'al leche, yetok no chibej max watx'nelay el tu', cax chi maymon ec' yilon low eb bay yich te te' tu'.

⁹Cax max k'anlen eb bay Abraham: —¿Baytal ay xal etbi Sara? ẍi eb bay. —Ayoctok xal yul co mantiado on ti', ẍi cham bay eb.

¹⁰Axa yalon Jehová axca ti': —Yab axca ti' yet jun ab, ok in jay junelxa ach ul wulaneni; a yet tu' ok jay junok yune' etbi tu', winak unin ok aljok, ẍi bay. Yak'ban xal Sara xin, toc'al chi abxalwi xal yin tzet chi al-layi. A yintak Abraham tu', lecan oc xal yul is mantiado eb tu'.

¹¹A Abraham yetok xal Sara tu' caw wal ichamtak animaxa eb, axa xal payxatax c'alta' c'amxa yechel unin chi yila',

¹²xan toc'al max tzewi xal yul is c'ul, yet max yaben yal-lay tu', cax max naon axca ti': ¿Tzetto wal ok yun wochen jun ti', ilab tol ixnam inxa c'al icham winakxa wetbi? ẍi xal.

¹³Axa yalon Jehová bay Abraham tu' axca ti': —¿Tzet yuj xan chi tzewi etbi ti'? ¿Chi mi na' tol yuj ixnamxa c'amxa chi je' yilon yin junok unin?

¹⁴¿Xin ta ay tzet c'am chi je' wuj e naoni? Yab wal axca ti' yet jun ab, ok in jay yet jun tiempoal ijanxacanok junelxa ach ul wulaneni. A yet tu', ok jay junok yune' Sara ti', winak unin ok aljok, ẍi Cham.

¹⁵A yet max yaben xal Sara axca tu', cax max xiw xal, max yalon xal axca ti': —Tokwal ayin chin tzewi, ẍi xal. Axa tak'wi Cham Yajaw tu' bay xal axca ti': —Wojtak tol max ach tzewi, ẍi Cham bay xal.

¹⁶Max xew tu' cax max toj eb nak ula'wom tu' bay beal Sodoma. Max toj cham Abraham yetok eb janic' yuj tak'elencan ba eb.

¹⁷Cax max yalon Jehová axca ti': Moj chi wal bay Abraham ti' tzet toxa ok wunej;

¹⁸ilab tol a' ok oc yichmamok jun miman conob tec'an waayi. Mayal wak' in ti' bay tol yujc'al, ok chaon masanil nacionlak yulyibank'inal in watx'c'ulal.

¹⁹Ayin max in siq'uilok yet watx' chi yal masanil in chekbanil bay masanil is yuninal c'al is yinatil, yet watx' chi yikej eb, c'al beybalnen eb masanil tzet yetal watx', c'al tojolal, yet watx' chi wak' c'apax yun bay tzet max wak' in ti' bay, ẍi Cham.

²⁰Lajwi tu', max yalon Jehová bay Abraham tu' axca ti': —A masanil eb anima bay Sodoma c'al bay Gomorra, caw wal yob yel k'umal eb, yelxac'al max aj can yobtakil eb.

²¹A tinani', ti chin toj bay tu', wilbalok ta caw yel chi aj can eb yin yobtakil axca chi yun yal-lay ayin tu', axca tu xin, ok wojtaknej el sic'libil, ẍi Cham.

²²A cawan eb max ec' k'anjab tu', palanxac'al tojcan eb bay Sodoma, axa pax Jehová tu xin, max cancan k'anjab yetok Abraham.

²³Max jitztok ba Abraham c'atan Cham janic' xa, cax max k'anlen bay Cham axca ti': ¿Tom ok a c'ayil eb anima c'am is mul yetok eb ay is mul?

²⁴K'inalok ta ay 50 anima watx' yul conobal tu', ¿xin ta cha c'ayil jun conob tu'? ¿c'am mi chak' mimanc'ulal yin eb yuj eb 50 c'am is mul tu'?

²⁵Maj je' ok ot axca tu'. Ta cha c'ayil eb c'am is mul yetok eb ay is mul axcaxac'al mi tol lajan is mul eb masanil chi yal tu'; manchak ot axca tu'. Miman juez ach yulyibank'inal, ¿tokwal ok on tzet yetal man tojolok? ẍi Abraham tu' bay Cham.

²⁶Axa max tak'wi Cham, max yalon bay axca ti': —Ta ay 50 anima watx' yul conob Sodoma tu', yuj eb 50 tu' chi wak' mimanc'ulal yin masanil anima cajan bay tu', ẍi Cham.

²⁷Max yalon pax Abraham bay Cham axca ti': —Ak' mimanc'ulal win, tol oktoc'al in k'anjab ayach, a' ach ti' Yajaw ach, xal in xin, anima in.

²⁸Ta c'uxan ayto owanokxa c'am chi tz'aknaj yin 50 eb anima watx', ¿tom yuj wal c'am owanxa tu', cax cha' c'ayon el jun conob tu'? ẍi Abraham. Max tak'wi Cham bay: —Ta ay 45 anima tol caw wal watx', c'am chin c'ayil jun conob tu', ẍi Cham.

²⁹Max yalon pax Abraham: —Talaj asan 40 anima watx' ay bay tu', ẍi cham. —Yuj eb 40 tu' man ok in c'ayil jun conob tu', ẍi Dios.

³⁰Max yalon pax Abraham bay: —Ach Wajawil, chin tewi ayach, cax c'amokab chi tit owal win, yuj chach in teyej. Talaj c'uxan asan 30 anima watx', chi ilchaj oj, ẍi bay Cham. Max tak'wi Cham, max yaloni: —A yuj 30 anima c'am is mul tu', ok wak' mimanc'ulal yin jun conob tu', ẍi Cham.

³¹Axa Abraham max occ'al tean yin, max yaloni: —Mamin Wajawil, ti' wal ok ach in teyejc'al, ¿tzet wal chotej ta asannej 20 anima c'am is mul? ẍi. Max tak'wi Cham, max yaloni: —A yuj 20 anima watx' tu', c'am chin c'ayil jun conob tu', ẍi Cham.

³²Max yalon pax Abraham junelxa: —Ak'wal mimanc'ulal win Mamin Wajawil, c'amokab chi tit owal win, axac'al jun el ti' chin oc tean en, c'amxa tzet ok wal ayach: ¿Tzet chotej ta asannej lajonwan anima watx' is beybal chi ilchaj oj? ẍi bay Cham. Max yalon pax Cham: —Ta ay lajonwan anima watx' is beybal, c'am chin c'ayil jun conob tu', ẍi Cham.

³³Axa yet max lajwi k'anjab eb tu', max toj Jehová, axa meltzojcan cham Abraham tu' bay is mantiado tu'.