Read Q'anjob'al Gn 21 Bible Online

Gn 21 - Q'anjob'al bible

Gn 21

¹Axca max yun yalon Jehová Dios bay xal Sara, tol ok jay jun is yune', cayton tu' max yun yion el ba tzet max yal Cham.

²Yuj tu' max oc xal yobixal, max jay jun is yune' yet caw ichamxa Abraham tu'. Max alji nak unin tu' axca wal is tiempoal albilcan yuj Dios.

³Isaac max yik nak unin tu' yuj Abraham.

⁴Yet yukubixial wal yalji nak unin tu', cax max ak'lay circuncidar yuj Abraham axca chekbanilej albil yuj Dios.

⁵100 abilxa is k'inal Abraham yet max alji Isaac.

⁶Max naon ba c'ul xal Sara, max yaloni: Max quin yak' tzewok co Mam Dios; masanil eb chi aben tol ayxa wune', ok tzewok eb wetok, ẍi xal.

⁷Max yalon pax xal: Tok ay eb anima max alon bay Abraham, tatol okto wak' txutxwok unin, palta xin, maxto wil unin, max jay jun is c'ajol Abraham wetok, caxc'al yel ichamxa, ẍi xal Sara.

⁸Axa yet max el nak Isaac yin im, max chaon cham Abraham jun miman k'in.

⁹Axa max yilon xal Sara tol a nak is c'ajol Abraham bay ix Agar, ix aj Egipto, tol chi buchwaj yin nak Isaac.

¹⁰Yuj tu' max ak'wi c'ulej xal Sara bay cham Abraham, max yaloni: Tokokab ix mosejal yayji ti' yetok is yune' tu', yujtol man ok je' yion nak yune' ix ti' is satak yetok nak wune' Isaac ti', ẍi xal Sara tu'.

¹¹A wal jun k'anej tu' caw wal ya' max yab cham Abraham tu', yujtol is c'ajol c'apax cham nak Ismael tu'.

¹²Axa Dios max alon bay cham: Manchak tac a c'ul yuj nak unin ti', c'al yuj ix a chekbej ti'. Ikej masanil tzet chi yal Sara tu', yujtol a yin nak Isaac, a tu' ok beyc'altok enatil, axca max yun walon ayach.

¹³A pax nak yune' ix mosejal tu xin, ayin ok in watx'nej jun miman nación yin is yinatil nak yujtol a c'ajol nak, ẍi Dios.

¹⁴Puch k'inibalil yet junxa c'ual max yak' cham Abraham lobej, c'al jun tz'um nojnak yuj aej bay ix Agar. Max yak'on yiktok ix, cax max yak'on c'apax nak unin yul k'ab ix. Max toj ix xin yin tol man txequelok bay chi ca toji bay tz'inan tx'otx' yul yet Beerseba.

¹⁵Axa yet max lajwi a' aej ay yul no tz'um tu xin, cax max bekoncan ix nak unin bay yich jun te yaliẍ te'.

¹⁶Najatta max toj ay chotan ix, yet watx' c'am chi yil ix camil nak unin tu' yaloni; axa yet max ay chotan ix, max ok'aj ix.*fn*

¹⁷Max yab Dios yok' c'apax aj nak unin tu'; atac'al bay satcan max k'anjab aytek cham yángel Dios bay ix Agar tu', max yaloni: ¿Tzet chach on Agar? C'am chach xiwi, a Dios mayal yab yaj yaw nak unin bay max ak'can tu'.

¹⁸Asi', il nak unin tu', cheon aj wan nak, cax cha mimanc'ulneni, yujtol ayin ok in watx'nej jun miman nación yin nak, ẍi Cham, ẍi jun ángel tu'.

¹⁹Axa Dios max tx'oxon jun aej bay Agar, cax max toj ix, max yak'on noj ix no' tz'um yuj aej, cax max yak'on yuc' nak Ismael tu'.

²⁰A Dios max colwajc'al yetok nak unin tu', cax max ch'ibc'al aj nak. Max ayjic'al ec' nak bay tz'inan tx'otx' bay yul yet Parán; julom no' max elocok. Axa max yun xin, max mojay nak yetok jun ix aj Egipto yuj is txutx.

²²A yet cajan ec' Abraham yul yet Néguev, max betic' Abimelec k'anjab yetok, cax ajun Ficol yetok, sat yajaw yayji xol eb soldado. Axa Abimelec max alon bay cham Abraham axca ti': —Chi jila' tol a Dios ayc'al oc etok yin masanil tzet chonej.

²³Yuj wal tu', ak' a ti' ayin satak Dios, tol c'am chon etnej bay jun lugar ti', tamwal eb in c'ajol, tamwal eb winatil; cax chak'on a ti' ayin, tol watx'c'al ok ot a c'ul win. Axca max ach wutej, cac'al tu' ok ot pax a c'ul yin masanil eb anima bay jun conob bay cajan ach ec' ti' tinani', ẍi Abimelec.

²⁴—Chi wak' in ti' ayach, ẍi cham.

²⁵Axa yalontek cham bay Abimelec yuj jun a' uc'bala', tol a eb is chekbej Abimelec tu' max ion ec' a'.

²⁶Max yalon Abimelec: —A wal caw wal man wojtakok tzet yayji jun k'anej ti', yujtol ach c'am chal ayin, man wojtakok mactxel max uten jun tu', ẍi.

²⁷Catatu' max yiontek cham Abraham calnel c'al wacax, cax max yak'on bay Abimelec. A yet jun c'ual tu', max watx'nej eb cawanil jun is trato.

²⁸Axa cham Abraham max pojon el ukc'on no k'opoj calnel xol is calnel tu'.

²⁹Yuj tu xin max k'anlej Abimelec: —¿Tzet yuj xan cha pojil ukc'on no calnel tu'? ẍi.

³⁰Axa yalon cham axca ti': —Cha' no ukc'on calnel ti' ayin, yin tx'oxon elok tol yel ayin max in watx'nej jun a' uc'bala' ti', ẍi cham.

³¹Yuj wal tu' xan max yikcan jun lugar tu' Beerseba,*fn* yujtol a bay tu' max yak' eb is ti' bay junjun.

³²Junelnej max watx'nej can eb is trato tu', cax max meltzoj Abimelec yetok Ficol bay is conobal eb nak filisteo, yujtol filisteo eb.

³³A bay Beerseba tu', a tu' max yaw cham Abraham jun te te' chi yik tamarisco. A bay tu' max oc cham yin ayilal bay Jehová, Cham Dios tol ayc'al ec' yin tojbalk'inal.

³⁴Najatil max ayji cham Abraham bay is tx'otx'al eb nak filisteo tu'.