Read Q'anjob'al Gn 23 Bible Online

Gn 23 - Q'anjob'al bible

Gn 23

¹127 abil max ec' xal Sara.

²Max cam xal bay conob Arba, chi yik c'apax Hebrón yul yet Canaán. Caw wal max ok' cham Abraham yuj is camichal xal Sara tu', max ocxac'al can cham yin cusc'ulal yuj.

³Max bekcan cham is mimanil is yetbi tu' cax max toj cham bay eb hitita bay jun lugar tu', max yalon bay eb axca ti':

⁴—Caxc'al mi tx'ok conobal wayji e xol ti', palta elok wal yin e c'ul tol che txon wal jabok in tx'otx' bay chin muk is mimanil xal wetbi, ẍi cham bay eb.

⁵Max tak'wi eb hitita tu' bay cham:

⁶—Mamin, ab wal tzet ok jal ayach, tol ach ti' caw wal miman elapnok co xol on, xan muk a camnak bay junok mukbanil camnak tol caw wal watx' chela'. C'am junok on tol c'am chi co cha' a muk is mimanil etbi bay tu', ẍi eb bay cham.

⁷Axa cham Abraham max aj lecanok, max tx'oxoni tol ay yelapnok eb nak yul sat, xan max ay nojanok.

⁸Max yaloni: —Ta caw wal yel chi je' e c'ul chin muk is mimanil wetbi cayti', alek bay nak Efrón, is c'ajol Sohar,

⁹tol chi txon ch'en olan ch'en bay Macpela ayin, bay cawilalxa tilak is tx'otx' nak. Ayin chi je' in tojlanen bay yin bayc'al ijan is tojol, axca tu' wet chi yun jun lugar tu' yet chi je' in mukon in camnak e xol, ẍi cham Abraham tu'.

¹⁰Tutun ay c'apax ec' nak Efrón hitita tu' xol eb tu'. Max paktzen bay cham Abraham tu' yin ipejal, yet watx' chi yab eb nak is yet conob ayic' bay tu', c'al eb chi oc bay conob tu'. Max yaloni:

¹¹—C'amak mamin, chi wal wal ayach, tol a jun olan ch'en tu', yetokc'al tx'otx' tx'otx' tu', toc'al chin sa' ayach. A eb nak wet conob ti', testigo chi yuncan eb, tol toc'al chin sa' tx'otx' ayach. Muk etbi bay tu', ẍi nak.

¹²Axa cham Abraham max ay pax nojanok,

¹³cax max yalon pax bay Efrón satak masanil eb: —Chi wal ayach, ab wal in tewilal, tol cha cha' wal is tojol tx'otx', catatu' ok in mukon wetbi, ẍi cham.

¹⁴Max tak'wi nak Efrón tu':

¹⁵—Ab xin mamin, tol 400 siclo ch'en plata*fn* is tojol tx'otx', a yin jun tu', c'amxa tzet chi jala', asan tol chi toj a muk aytok etbi tu', ẍi nak.

¹⁶Max cha c'ul cham Abraham tojlanen tx'otx' tx'otx', axca max yak' binaj nak tu', bay satak masanil eb hitita tu' max yechen cham Abraham ch'en 400 siclo plata, tz'akan max yun yalil axca yet eb txonjom.

¹⁷Axca ton wal tu' max yun yoccan tx'otx' tx'otx' nak Efrón yetok cham Abraham, tx'otx' Macpela cawilal tx'otx' yet cham Mamre, ch'en olan ch'en c'al te te'. Max yican cham Abraham tu' masanil.

¹⁸Yet-xa cham tx'otx'. Masanil eb nak hitita wajan ec' bay tu', c'al yetok masanil eb max oc bay puertail conob yet tu', testigo max yuncan eb yin jun trato tu'.

¹⁹Lajwi tu xin, max mukon Abraham is yetbi bay ch'en olan ch'en, bay tx'otx' Macpela, bay cawilal tx'otx' yet cham Mamre, ac'al oc chi yik Hebrón, bay yul yet Canaán.

²⁰Axca tu' max yut txononcantok eb nak hitita tx'otx' tx'otx' c'al ch'en olan ch'en bay cham Abraham bay chi muk is camnak.