Read Q'anjob'al Gn 25 Bible Online

Gn 25 - Q'anjob'al bible

Gn 25

¹Maxto yi' cham Abraham junxa yetbi chi yik Cetura.

²A eb is yuninal yetok xal a ton Zimram, Jocsán, Medán, Madián Isbac c'al Súa.

³A Jocsán a ton is mam Seba c'al Dedán. A pax eb yinatil Dedán xin, a ton eb asureo, c'al eb letuseo yetokc'al eb leumeo.

⁴Axa pax eb yuninal Madián a ton Efa, Efer, Hanoc, Abida, c'al Elda. Masanil juntzan ti' is yinatil c'al xal Cetura.

⁵A cham Abraham max yak' masanil is tzet yetal sataknej Isaac.

⁶Axa pax is yune' juntzanxa eb xal ix tu xin, asanc'al sabalej max ak'lay bay eb yuj cham. A yet iquisto ec' cham, max c'oli cheklay can el eb nak tu' yuj cham bay c'atan Isaac is c'ajol. Max cheklaytok eb nak bay yetc'ulal bay chi ajol c'u.

⁷175 abil is k'inal cham Abraham yet max cami.

⁸Ichamilxac'al max on cami.

⁹A eb is c'ajol, a ton Isaac yetok Ismael max bet mukon bay ch'en nach'en bay Macpela, bay cawilal tx'otx' yet cham Mamre bay tx'otx' tx'otx' yetben ta nak Efrón is c'ajol Zohar, cham hitita.

¹⁰A ton tx'otx' tx'otx' tu' manbil yuj Abraham bay eb hitita. A bay tu' junej max mukay cham Abraham tu' yetok Sara is camom yetbi.

¹¹Axa yet mayal camtok cham Abraham, cax max yak'on Dios is watx'c'ulal yiban Isaac, max cancan cajan cawilal a' uc'bala' chi yik, Cham iquis chin iloni.

¹²Tix wal yoc yabixal eb yinatil Ismael is c'ajol Abraham yetok Agar, ix aj Egipto is chekbej Sara.

¹³Is txolilal tzet max yun yalji eb: Nebaiot, a ton nak babel unin tu', catatu' Cedar, Adbeel, Mibsam,

¹⁴Misma, Duma, Massa,

¹⁵Hadar, Tema, Jetur, Nafis, c'al Cedema.

¹⁶A ton is bi eb lajcawan is c'ajol Ismael ti'. A is bi eb nak tu' max oc is biok is tx'otx' bay max ayji junjun eb nak; junjunc'al eb, yajaw max yuncan eb yin junjun conob.

¹⁷137 abil is k'inal Ismael cax max cami.

¹⁸A masanil eb yinatil tu' max apnican oc cajan eb bay nan xol Havila yetok Shur, bay satak tx'otx' Egipto bay chi toj beal Asiria. A bay tu' max cajay eb, caxc'al c'am wal chi je' c'ul eb icanejal.

¹⁹Tix wal yoc yabixal Isaac ti', is c'ajol cham Abraham.

²⁰40 abil is k'inal cham Isaac yet max mojay yetok Rebeca is cutz'in Betuel, yanab nak Labán arameo, nak cajan bay Padan-aram.

²¹A Rebeca tu' c'am yune'. Axa Isaac max txajli bay Jehová yet chi yak' Cham is yuninal eb. Axca tu xin max yab Jehová is txaj, cax max oc Rebeca yin yobixal.

²²Tioẍ eb unin tu', xan chi yak'lej eb owal yin is txutx tu', yuj tu' max na' xal: ¿Tzet yuj xan chi jay jun ti' wiban? ẍi xal. Lajwi tu' max toj xal yalon is yailal bay Jehová.

²³Max tak'wi Jehová bay: Cab nación ayoc en, cab conobal ok yun eb nak yet ok aljok eb. Jun yel ay yip, cax tec'an yintak junxa. A nak babel ok can nak yalan is chekbanil nak tzunan, ẍi Cham.

²⁴Max apni oc is c'ual yet max alji yune' xal Rebeca, cax tioẍ eb unin max alji.

²⁵Nak babel max alji, cakyin yili, ayc'al is xil yin is mimanil, xan max yak' eb yik Esaú.*fn*

²⁶Tzunan jay pax junxa yuẍtak tu' lacan oc is k'ab yin is chop yakan Esaú tu', yuj tu' max yak' eb yik Jacob.*fn* 60 abil is k'inal Isaac yet max alji eb yune' xal Rebeca tu'.

²⁷Max ch'ibc'al aj cawan unin tu'. A nak Esaú max cha c'ul nak max tojc'al ec'jab xolak te'. Caw wal watx' max eloc nak yin uktej no'. A pax nak Jacob xin, c'am wal bay chi toj najat, ayc'al ec' nak yul is campamento eb.

²⁸Yel ay is camc'ulal cham Isaac yin nak Esaú, yujtol caw wal chi cha c'ul cham chi chi' no c'ultakil no' chi jay yuj nak. Axa pax xal Rebeca xin, yel chi yochej pax xal nak Jacob.

²⁹Ay jun c'ual ipan txicon nak Jacob tu' loj yet max jay nak Esaú tu' ec'jab xolak te', caw wal c'unbinak nak.

³⁰Max yalon nak: Ak' wal janic'ok a lobej cakyin yili tu' ayin, caw wal chin cam yuj wajil, ẍi nak. (Yuj tu xin Edom*fn* max ak'lay can yik nak.)

³¹Yin babelal chak'can a satak yet a babel winakil*fn* ayin, catatu' chi wak'on a lobej, ẍi nak Jacob tu'.

³²Axa yalon Esaú tu': —Ilabi, tol lanan in cam yuj wajil ti', yilxa jun in satak yet in babel winakil tu', ¿tzet wal ok oc wuj? ẍi nak.

³³—Ak' a ti' ayin yet jun bek ti', ẍi Jacob. —Inye, ẍi Esaú, cax max yak'on is ti', yet chi tx'oxilok tol chi yak'can is satak yet is babel winakil bay Jacob tu'.

³⁴Lajwi tu xin, max yak'on Jacob pan c'al jun sec' loj tu' bay Esaú. Axa yet max xew lowi, max aj wanok cax c'am wal jabok tzet chi na' yuj is satak yet is babel winakil tu'.