Read Q'anjob'al Gn 27 Bible Online

Gn 27 - Q'anjob'al bible

Gn 27

¹Max ec'c'al tiempo xin, max oc cham Isaac icham winakil, cax c'amxa chi je' yilwi cham. A yet jun c'ual, max yawten is c'ajol chi yik Esaú, nak babel winak, max yalon bay: —Ach in c'ajol, ẍi cham. —¿Tzet ẍi mam? ẍi nak.

²—Ti' wal chela' caw wal icham winak inxa. Lem ẍixac'al talaj in cam yet yecal cabej ti'.

³Yuj tu' xan chi wochej tol chach toj a say junok in chibej xolak te'. Itok a julbal yet cha jul junok wet;

⁴cax cha watx'nen junok in lobej caw wal watx', axca wal chi wochej. A yet chi watx'ji el xin, cax cheontek. Yak'ban chin lowi, cax ok waloncan watx' k'anej eban yet c'amto chin cami, ẍi cham.

⁵Axa xal Rebeca xin, ipan yaben xal tzet chi yal cham Isaac tu' bay Esaú, axa yet max toj nak Esaú tu' xolak te' sayon is chibej is mam tu',

⁶max yalon xal bay nak Jacob, nak tzunan axca ti': —A tinani' wune', max wab wal yalon a mam bay nak oẍtak Esaú, tol ẍi:

⁷Asi' say junok in chibej xolakteal no', cax cha watx'nen junok in lobej, caw wal watx' chotej. Yak'ban chin lowi cax ok wak'oncan yaxilal, c'al waloncan watx' k'anej eban satak Jehová yet c'amto chin cami, ẍi bay nak.

⁸Yuj tu' ach wune', ikej wal tzet ok wal ti'.

⁹Asi' bay no calnel, cax cheontek cac'onok no yune' chiwo tol caw wal watx', cax ok in watx'nen junok is lobej a mam tu', caw wal watx' ok wutej axca wal chi yochej c'ul tu'.

¹⁰Achxa ok etok bay, yet chi lowi, cax ok yaloncan watx' k'anej eban yak'ban c'amto chi cami, ẍi xal.

¹¹Axa yalon Jacob bay is txutx tu': —A nak wuẍtak tu' ay is xil nak yinlak is mimanil, palta ayin ti' c'am pax in xil.

¹²Talaj c'uxan chin is matxtenej in mam tu', cax chin nachaj el yuj, ok mi na' tol toc'al chi wetnej, axam wal chi yun ajok, catabxa chi titcan wiban, cax man yaxilalok chi wicanok, ẍi nak Jacob tu'.

¹³Max tak'wi is txutx tu' bay axca ti': —C'amak wune', ta ay catab chi yalcanok, aokab wiban chi titcanok, asan tol chekej bay chi wala'. Asi', itek cac'onok no yune' chiwo tu', ẍi xal.

¹⁴Max toj Jacob tu' yiontek no yune' chiwo tu', axa yak'on bay is txutx tu', cax watx' max yun jun loj tu' yuj xal, axca chi yochej c'ul cham Isaac tu'.

¹⁵Lajwi tu' cax max yion eltek xal is tec'an pichil nak Esaú tu', nak is babel unin xal, c'uan aj is pichil tu' bay is mantiado, cax max yaon oc xal yin nak Jacob, nak tzunan winak tu'.

¹⁶Axa yetok is tz'umal no chiwo tu', max pichon xal is k'ab nak, c'al is tel nuk' nak bay c'am xil.

¹⁷Cax max yak'on xal pan c'al loj max watx'nej tu' yitok nak.

¹⁸Axa yoctok Jacob tu' bay ayic' is mam, cax max yalon axca ti': —Mam, ẍi nak. —Jay. ¿Mac ach txel ach in c'ajol? ẍi cham Isaac tu'.

¹⁹—Ayin Esaú in, a babel c'ajol in. Mayal in watx'nej a lobej max ala'. Ajan wonanok, lowan, ablej wal jabok no c'ultakil no max bet in jul ti', cax chaloncan watx' k'anej wiban, ẍi nak.

²⁰Axa k'anlen cham Isaac tu' bay axca ti': —¿Tzet wal max ot michchaj no' yin aymanil, c'ajol? ẍi cham. —A Jehová co Diosal max oc wetok, xan aymanxac'al max ilchaj no' wuj, ẍi nak.

²¹Axa yalon pax cham Isaac tu' bay axca ti': —Jitztek a ba in c'atan, ok ach in matxtenej ta yel ach in c'ajol Esaú ach, ẍi cham.

²²Cax max jitzontek ba Jacob c'atan is mam tu', max c'oli matxtenen cham tatol ay is xil nak. Lajwi tu' max yalon axca ti': Cochwal yul is nuk' nak Jacob chi wabej, asan xin tol ay pax xil is k'ab chi wabej axca wal yet nak Esaú, ẍi cham bay.

²³Maj nachaj el yuj cham, yujtol ay xil is k'ab axca wal yet nak Esaú is yuẍtak, yuj tu' max yaloncan el cham watx' k'anej yiban nak.

²⁴Cax max k'anlen wal pax junelxa bay axca ti': —¿Yel mi wali, ach ton mi in c'ajol Esaú ach? ẍi cham bay. —Ja' ayin ton Esaú in, ẍi nak Jacob tu'.

²⁵—Itek in lobej tu xin c'ajol, yak'ban chin chi' no no' max bet etek xolak te' tu', cax ok waloncan el watx' k'anej eban, ẍi cham Isaac. Max yak'on low Jacob is mam tu', cax max yion c'apax tek vino bay, cax max yuq'uen cham Isaac.

²⁶Max yalon pax bay axca ti': —Jitztek a ba in c'atan xin c'ajol, cax cha tz'ubon el in ti', ẍi cham bay.

²⁷Max jitzontok ba nak Jacob cax max tz'ubon el nak is ti' cham, max sukten cham is pichil nak, axa yalon watx' k'anej yiban nak tu' axca ti': Axca wal ti' yoc is jabil in c'ajol, axca yoc jabil an ac'un xolak te', ak'bil yaxilal yuj Jehová.

²⁸Yak'okab Dios nab yiban a tx'otx' yet xiwil ok yun sat awoj.

²⁹Xiwil anima ok ach ak'on serbil. Masanil nación ok ay jajan ayach. Yajaw ok on yiban eb yinatil oẍtak, ok ay jajan eb ayach. Ok ak'lay cawil eb watx' ok yut c'ul en, cax ok catabnelay eb yob ok yut c'ul en, ẍi cham.

³⁰Axa yet max lajwi yaloncan cham Isaac masanil watx' k'anej yiban Jacob, ato wal yeltok Jacob tu' bay ayic' is mam, max jayoc Esaú bet juloj no' tu'.

³¹Axa watx'nen jun loj manxa watx'ilok, cax max yion c'apax tok bay is mam, max yalon bay axca ti': —Ajan wan xin mam, cax cha chion no xolakteal no' max bet wi' ti', cax chaloncan watx' k'anej tu' wiban, ẍi nak bay is mam tu'.

³²Axa k'anlen cham Isaac tu' axca ti': —¿Mac ach txel? ẍi cham. —Ayin Esaú in, a babel c'ajol in, ẍi nak.

³³Caw wal max c'ayaj c'ul cham Isaac, toxac'al chi luklon ajok, max yalon axca ti': —¿Mac pax txel nak max bet iontek no' yin babelal xin, cax max yiontek jun loj tu' ayin? Mayal quin lowi yet c'amto chach jay ayach ti', xan mayal walcan el in watx' k'anej yiban nak tu', t'inanc'alta' ok cha nak yaxilal, ẍi cham.

³⁴Axa yet max yaben Esaú masanil tzet chi yal is mam tu xin, cax max wek'on el nak yaw yok'i, max yalon nak axca ti': —Al c'apax watx' k'anej wiban mam, ẍi nak.

³⁵Max yalon Isaac axca ti': —A nak oẍtak max quin ul etnen xin; mayal yitok nak masanil watx' k'anej, tol et ta' yayji ocok, ẍi cham. Axa tak'wi Esaú tu':

³⁶—Moj ton wal yikon Jacob. Yinxa cayel chin yetnej nak ti'. Yin babelal max yiec' nak in satak yin in babel winakil, axa pax tinani', chi yion pax ec' nak yaxilal tol t'inan ayin chi wi'. ¿C'amxam wal junokxa yaxilal max a c'ubajcan ayin mam? ẍi Esaú tu'.

³⁷Max yalon cham Isaac bay axca ti': —Ilabi max wak' yikbej Jacob eban, masanil eb yican ok oc eb is chekbejok; ac'ala' mayal in k'an bay co Mam Dios, tol xiwil ok yun yak'on is trigo c'al is vino. C'amxa tzet watx' chach wut xin, c'ajol, ẍi cham bay.

³⁸Max tewic'al oc Esaú yin cham axca ti': —Mam, ¿c'amxam wal junokxa watx' k'anej chi je' aloncan wiban? Al walcan junokxa a watx' k'anej wiban, ẍi Esaú. Max wek'on el yaw yok'i.

³⁹Yuj tu' max yalon cham Isaac: Caw wal najat chach elcan sat tx'otx' tx'otx' yax sat, c'al bay chi yak' nab.

⁴⁰Asan espada ok aoc yipok a c'ul, cax chekbej oẍtak tu' ok oncanok; axa yet ayxa ep xin, cax cha colon a ba bay nak, ẍi cham.

⁴¹Ataxc'al yet tu', max chichoncan oc c'ul Esaú yin Jacob tu' yuj tzet max al-laycan yiban yuj is mam tu', cax max naoni: Toxa ok on cus yuj is camichal in mam ti', catatu' ok in mak'on cam jun wuẍtak Jacob ti', ẍi Esaú tu'.

⁴²Axa yet max yaben xal Rebeca tzet lanan naon Esaú, max yawtentek Jacob, max yalon bay axca ti': —Ilab nak oẍtak Esaú chi yochej chach mak' camok yet chi yiic' q'uex pak ayach.

⁴³Yuj wal tu xin, ach wune', ab wal tzet chi wala'; elan aj cayti' cax chach tojcan bay Harán, cax chach ayji yetok nak in nuej Labán.

⁴⁴Chach canc'al yetok nak junok tiempoal masantac'al chi ec'tok yowal c'ul nak oẍtak ti'.

⁴⁵Axa yet mayal c'aytok yul is c'ul xin, cax ok walontok abej, axa a meltzojtek tu'. Maj je' in c'ul tol junnej c'ual chi yun e cam e cawanil, ẍi xal.

⁴⁶Max lajwi tu' max yalon xal Rebeca bay cham Isaac axca ti': —Caw wal chi cus in c'ul yuj eb ix hitita, eb ix yistzil nak Esaú ti', xan ta a nak Jacob chi yilej ba yetok junok eb ix hitita cajan bay Canaán ti', watx' mi tol chin cami, ẍi xal.