Read Q'anjob'al Gn 28 Bible Online

Gn 28 - Q'anjob'al bible

Gn 28

¹Axa yawtentek cham Isaac tu' nak Jacob, max c'oli yaloncan el watx' k'anej yiban, cax max yaloncan jun chekbanilej bay axca ti': C'am yechel che' junok etbi bay xol eb ix aj Canaán ti'.

²A tu' chach toj yul yet Padan-aram bay yatut a mam icham Betuel, cax chach mojay yetok junok eb ix is cutz'in Labán, nuej a txutx.

³Axa Dios Cham Chi Je' Yuj Masanil ok yak' yaxilal eban, xiwil ok yun bisil enatil. A xol eb tu' a tu' ok eltek xiwilok nacionlak.

⁴Ok yak' Cham ayach c'al bay masanil enatil, yaxilal bay max yak' is ti' yak'on bay echmam Abraham, yet watx' ok oc jun tx'otx' bay ayon ec' ti' etok, tol a wal caw Jehová max altencan bay echmam tu', ẍi cham Isaac tu' bay Jacob.

⁵Axca tu xin, max cheklaytok Jacob yuj cham Isaac bay Padan-aram. Max toj Jacob bay yatut Labán, is c'ajol Betuel arameo, is nuej xal Rebeca, is txutx Jacob c'al Esaú.

⁶Axa max yaben cham Esaú xin tol max yal pax cham Isaac watx' k'anej yiban nak Jacob, cax max chekontok bay Padan-aram yet chi yi yetbi bay tu'. Cax max yabeni tol a yet max yalon is mam watx' k'anej tu', max yalon c'apaxok tol c'am chi je' yion nak yetbi bay xol eb ix ix bay Canaán tu',

⁷cax max tojcan Jacob bay Padan-aram axca max yut yalon is mam c'al is txutx.

⁸Axca tu' max yun yojtaknen el Esaú tol a is mam tu' c'am chi yochej eb ix ix aj Canaán.

⁹Yuj tu xin, max toj yil is yican Ismael, is c'ajol cham Abraham, cax max yion jun is cutz'in chi yik Mahalat, yetok eb ix ibilxac'alta' yuj. A ix Mahalat tu' ay jun is nuej chi yik Nebaiot.

¹⁰Axa yet max el Jacob bay Beerseba max tojcan bay is beal Harán.

¹¹Max apni oc bay jun lugar, a bay tu' max can yet ak'balil, yujtol mayal ay c'u. Axa yet toxa chi way xin, cax max yiontek jun ch'en ch'en bay tu' is k'anok, axa yay telan way tu'.

¹²Cax max oc jun is wayich, max yiloni tol ay jun axca k'ochbe max yila'. Chi tojtac'al sat tx'otx' ti' masantac'al chi ajapnok bay satcan. Max yiloni tol a eb ángel yet Dios chi ajtok, chi aytek bay jun be tu'.

¹³Cax max yilon c'apaxok tol a Jehová lecan oc bay chi ajapnok jun be tu', cax chi yalon axca ti': Ayin ton Jehová is Diosal echmam Abraham, c'al a mam Isaac. Ok wak' ayach c'al bay masanil enatil, jun tx'otx' bay telan ach ay ti'.

¹⁴A enatil tu' xiwil ok yun bisil axca pokokal tx'otx', cax ok tojc'al leeok eb bay yetc'ulal bay chi ajol c'u, bay yetc'ulal chi tojcan c'u bay norte, c'al bay sur; masanil nacionlak yulyibank'inal ti' ok cha eb watx'ilal oj ach ti', c'al yuj eb enatil.

¹⁵Ayinc'al oc etok, cax ok ach in taynejc'al bayc'al ok ach tok, cax ok ach wion meltzojtek bay jun tx'otx' ti' junelxa. Manc'al ok ach in bekcanok, palta ok wunc'al bay max wak' in ti' ayach, ẍi Cham.

¹⁶Axa yet max el wayan Jacob max naon axca ti': Wal yel ayic' Jehová bay jun lugar ti', caw wal man wojtakok, ẍi.

¹⁷Cax max xiwajok max naoni: Caw wal ay is may jun lugar ti', yatut Dios, cax puertail satcan yayji, ẍi.

¹⁸Axa yet max k'inibi aj yet junxa c'ual, caw wal max pet aj wan, cax max yiontek ch'en ch'en max yaoc is k'anok tu', max wabancan ajok, max cancan ch'en yin yechelejal, axa seconcan ay aceite yiban ch'en.

¹⁹A bay jun lugar tu', a tu' ay jun conob yettax payxa chi yik Luz, axa Jacob max q'uexon is bi max yak'on yik Betel.*fn*

²⁰A bay tu' max yak' Jacob is ti': Ta wal a Dios ok in is taynej cax ok occ'al wetok yin jun in viaje bay chin toj ti', ta ok yak'c'al in lobej c'al in pichil,

²¹ta caw wal watx' in c'ul, cax ok in meltzojtek bay yatut in mam, ta axca tu', a ton Jehová ti' in Diosal.

²²A bay max in wabaj can aj ch'en ch'en ti', axca yatut Dios chi yuncanok, cax ok wak'on in diezmo yin masanil tzet ok yak' ayin, ẍi Jacob.