Read Q'anjob'al Gn 29 Bible Online

Gn 29 - Q'anjob'al bible

Gn 29

¹Caytu' max yun tojc'al Jacob, max oc yul is tx'otx'al eb nak cajan bay yetc'ulal bay chi ajol c'u.

²Axa yet max apni oc bay tu' max yilontok jun a' uc'bala'. A bay is cawilal a' tu', ayic' ox bulan no calnel, yujtol a a' chi yuc' no'; ay jun miman ch'en ayoc is makilok ti a'.

³A yet chi wajon ba masanil no calnel bay tu', axa eb nak ilom calnel chi ion el ch'en makil ti a' tu', cax chi yak'on eb nak yuc'a' no', chi lajwi tu' cax chi makchen paxcan eb ti a' tu'.

⁴Axa Jacob max k'anlen bay eb ilom calnel axca ti': —¿Mac ex txel ex wamigo? ẍi Jacob. —Aj Harán on, ẍi eb nak.

⁵—¿E yojtak mi cham Labán is yitxiquin Nacor? ẍi Jacob. —Ja', jojtak ton cham on, ẍi eb nak.

⁶—¿Watx' mi is c'ul cham che yila'? ẍi Jacob tu'. —Watx' c'ul cham. Ilab ix Raquel is cutz'in cham, lanan jayoc yetok is calnel cayti', ẍi eb nak.

⁷Max yalon Jacob bay eb axca ti': —Canto c'u ¿tzet yuj xan man toc'alok che yak'can yuc'a' no' cax che yilon low no' janic'okxa? ẍi bay eb.

⁸Cax max yalon eb bay axca ti': —C'am chi je' axca tu', yowalil tol chi jechbanej wajon ba masanil no' calnel, catatu' ok jion el ch'en miman ch'en ayoc is makilok ti a' uc'bala' ti', yet chi je' yak'lay yuc'a' masanil no calnel tu', ẍi eb.

⁹Lanantoc'al k'anjab Jacob yetok eb nak tu', cax max apni oc Raquel yetok no' is calnel is mam, yujtol a ix chi ilon no'.

¹⁰A yet max yilon Jacob yapni oc ix yetok no calnel Labán, a ton is yican Jacob, ayman max toj lemnaj yion el ch'en makil ti a' uc'bala' tu', max yak'on yuc'a' no calnel tu'.

¹¹Cax yin aymanil max yak'on cawil c'ul ix Raquel, max tz'ubon el is ti' ix, cax max ok'ajok.

¹²Axa c'oli yalon Jacob tu' bay ix tol yune' xal Rebeca, xal yanab Labán. Maxc'al yab Raquel axca tu', max toj lemnaj yalon bay is mam.

¹³Maxc'al yab Labán binaj Jacob is yune' yanab, xan max toj lemnaj chaoni, max oc lak'an yin, max tz'ubon el is ti', axa yiontok bay yatut tu'. Axa yoc ijan Jacob tu' yalon tzet max yunc'al tita.

¹⁴Max yalon Labán bay axca ti': Wal yel caw wal ayontoc'al ocok, ẍi bay. Max cancan Jacob yetok cham Labán yin jun xajaw;

¹⁵axa yet max ec' el jun xajaw tu', axa yalon cham Labán bay axca ti': —A tinani' caxc'al ayto juj co ba, palta maj je' tol toc'al ok ach mulnaj ayin, tol c'am jabok a tojol ok e'. Al ayin jantak ok ach in tojlanej, ẍi cham.

¹⁶A cham Labán tu' ay cawan is cutz'in, a ix babel chi yik Lea, axa junxa ix chi yik Raquel.

¹⁷A ix Lea tu' axq'uijantak c'alnaj yili ix, asan is bak' sat caw wal watx' yili, a pax ix Raquel xin, caw wal watx' yili ix.

¹⁸Axa Jacob xin max canxac'al is nabal yin ix Raquel, xan max yal axca ti': —Chin cancan ukebok abil ach wak'on serbil yuj ix Raquel a tzunan cutz'in, ẍi Jacob.

¹⁹Max yalon cham Labán: —Canancan xin, watx' chi wak' ix ayach, yintak tol a bay junokxa tx'ok winakil bay chi watok ix, ẍi cham.

²⁰Axca tu' max yun mulnaj Jacob yin ukeb abil yuj ix Raquel. Caw wal c'am chi yab nak yeq'uel janic' tiempo tu', yujtol caw wal chi camel c'ul yin ix.

²¹Axa yet max eq'uel ukeb abil tu xin, max yalon Jacob bay cham Labán axca ti': —A tinani xin, mayal lajwi tiempoal in trato ach wak'on serbil. Ak' ix wetbi ayin yet chin mojay yetok ix, ẍi Jacob.

²²Axa cham Labán max yawtej masanil eb cajan bay is cawilal tu', max chaon cham is k'inal nupayil is cutz'in tu'.

²³Axa yet maxax aj ak'bal max yiontek cham Labán ix Lea bay Jacob cax max way yetok ix.

²⁴Max yak'on cham Labán jun is chekbej ix Lea, a ix chekbej tu' chi yik ix Zilpa.

²⁵Axa yet max sakbi el xin, cax max yilontek nak Jacob tol a ix Lea max way yetok nak, cax max toj yalon nak bay cham Labán axca ti': —¿Tzet yuj xan caytu' max in otej? Yuj ix Raquel xan max in mulnaj ayach, ¿tzet yuj xan chin etnej? ẍi Jacob.

²⁶Max yalon cham Labán bay nak axca ti': —A beybalej cayti', c'am chi je' tol a eb ix tzunan ix chi babji yoc yichamil yintak eb ix babel ix.

²⁷Ikejcan jun semanail yet ix Lea ti', catatu' ok eon pax ix Raquel tu' tatol chak' a ti' a mulnaj ukebokxa abil wetok, ẍi cham Labán.

²⁸Cax max chaon c'ul Jacob tu' jun k'anej tu'. Max yiken jun semana k'inal nupayil yetok ix Lea tu'. Lajwi tu' max yak'on pax cham Labán ix Raquel is yetbiok Jacob.

²⁹Max yak'on c'apax cham Labán jun ix is chekbej ix Raquel tu' a ton ix chi yik Bilha.

³⁰Cax max junanen ba Jacob yetok ix Raquel, yelxac'al chi camc'ulnelay ix yuj, yintak pax ix Lea tu'. A yuj tu' xan maxto mulnaj ukebxa abil bay cham Labán.

³¹Axa yilon Jehová tol cabc'ulnebil xal Lea, axa yak'on is yaxilal yiban xal tu' tol ok jay yune' xal, axa pax xal Raquel xin, man ok yil unin.

³²Max oc xal Lea yobixal, max jay jun yune' xal, max yak'on yik Rubén,*fn* yujtol max yal xal, A Jehová max yila' tol intaknebil in yuj wichamil, axa tinani' ok in camc'ulnelay yuj, ẍi xal.

³³Lajwi tu' max jay pax junxa yune' xal Lea, max yak'on yik Simeón,*fn* yujtol max yal xal axca ti': Max yab Jehová tol cabc'ulnebil in elok, xan max yak' junxa wune' ti', ẍi xal.

³⁴Max jay pax junxa yune' Lea tu', max yak'on yik Leví,*fn* max yalon xal: A tinani' ok junanejxac'al ba wichamil ti' wetok, yujtol ayxa oxwan wune' yetok, ẍi xal.

³⁵Max jay pax junxa yune' xal Lea; max yak'on yik Judá,*fn* max yalon pax xal: A tinani' chi wi' can Jehová, ẍi xal. Asanxac'al tu' cax max oc wanaj yilon yin unin.