Read Q'anjob'al Gn 30 Bible Online

Gn 30 - Q'anjob'al bible

Gn 30

¹Max naon ba c'ul Raquel, yujtol c'amc'al yune' xal chi yila', axa c'oli chichon oc c'ul xal yin xal Lea tu', max yalon bay yetbi tu' axca ti': —Ak' wune'. Ta c'amak, ti' wal chin cami, ẍi xal.

²Cax max tit yowal cham Jacob, max yalon bay xal axca ti': —¿Tokwal Dios in? A Cham c'am chi ak'on one' tu', ẍi Jacob.

³Max yalon xal bay: —Wayan yetok ix in chekbej Bilha, xan a yet ok jay yune' ix tu', axca wal wune' ok yunej, ẍi Raquel tu'.

⁴Cax max yak'on Raquel ix is chekbej tu' bay Jacob, max junanen ba yetok ix.

⁵Axa jay jun yune' ix Bilha tu'.

⁶Max yalon Raquel axca ti': Dan*fn* ok yik nak unin ti', yujtol max yab co Mam Dios in txaj, axa is beyc'ulal max oc wetok, xan max yak' jun unin ti' ayin, ẍi xal.

⁷Lajwi tu' max jay pax junxa yune' ix Bilha yetok Jacob.

⁸Max yalon pax Raquel tu': A jun unin ti' ok yik Neftalí,*fn* yujtol chi wak' owal yetok xal in nuej Lea, lanan yayc'ay wuj tinani', ẍi.

⁹Axa yet max yilon pax xal Lea xin tol c'amxa yune', max yak' ix is chekbej Zilpa bay Jacob.

¹⁰Max jay jun yune' ix Zilpa yetok Jacob xin.

¹¹Watx' wet xin; yuj tu' Gad*fn* chi yik nak unin ti', ẍi xal Lea.

¹²Lajwi tu' max jay pax junxa yune' Zilpa yetok Jacob.

¹³Max yalon pax Lea axca ti': Caw wal tzalojc'ulal wet, axa eb wet ixal ok alon tol ay in tzalojc'ulal, yuj tu' xan ok yik nak unin ti' Aser,*fn* ẍi xal.

¹⁴Ay jun c'ual max toj nak Rubén ec'jab xolak te' yet wal ipan jolay ixim trigo. A bay tu' max ilchaj juntzan an ac'un yuj, chi yik mandrágora*fn* chi loji sat. Max yiontok nak an bay Lea is txutx; axa yet max yilon Raquel sat an ac'un tu', max yalon bay Lea axca ti': —Yuj wal dios, ak' junok mandrágora max yitek nak one' tu' ayin, ẍi xal.

¹⁵Max yalon xal Lea tu' axca ti' bay: —¿Tom man k'okbilok yuj max eic' wichamil, axa tinani' chi yochejxac'al a c'ul cha k'anic' an mandrágora max yitek nak wune' ti'? ẍi xal. —Ta chak' an tu' ayin, chi je' chach way yetok Jacob yet jun ak'bal ti', ẍi xal Raquel tu'.

¹⁶Axa yet k'ekbintakilxac'al max meltzojtek cham Jacob yin is mulnajil, max toj xal Lea tu' chaon cham, max yalon bay axca ti': —A tinani' ok ach way wetok, wal yel max wak' an mandrágora max yitek nak wune' bay in nuej Raquel, a majanbalilok, ẍi xal. Axa way cham Jacob tu' yetok xal yet jun ak'bal tu'.

¹⁷Max yab Dios is txaj xal, xan max cancan unin yin xal; catatu' max jay junxa is c'ajol cham Jacob yetok xal, yet-xa is so' unin eb.

¹⁸Max yalon xal Lea axca ti': Isacar*fn* ok yik nak unin ti', yujtol max paktzej Dios ayin, yuj max wak' ix in chekbej bay wichamil, ẍi xal.

¹⁹Lajwi tu' max jay pax junxa yune' Lea yetok cham Jacob, a ton yet is wak unin eb.

²⁰Max yaloni: Max yak' Dios jun sabal manxa watx'ilok ayin, xan ok in camc'ulnelayc'al yuj wichamil ti'. Wakwanxa unin chi wil yetok ti', xan a nak unin ti' ok yik Zabulón,*fn* ẍi xal.

²¹Yinxac'al lajubal max yilon yin jun ix unin, max yak'on yik Dina.

²²Max nachajtek Raquel yuj Dios, max yab Cham is txaj xal, max yak'on Cham is yune'.

²³A yet max jay jun is babel unin xal max yaloni: Mayal yiel Jehová q'uixwilal ayoc win, yuj mayal yak' jun wune' ti'.

²⁴Matawal chi el yin c'ul Cham chi yak' pax junokxa wune', ẍi xal. Yuj tu' José*fn* max yik nak unin tu' yuj xal.

²⁵A yet mayal alji nak José, cax max yalon Jacob bay cham Labán axca ti': —A tinani' cha' in pax bay in conobal.

²⁶Ak' eb wuninal yetok eb ix wetbi, tutun yuj eb ix xan max in mulnaj miman tiempo etok; is mojxa tol chin paxi. Caw wal ojtak tzet max yun in mulnaj ayach, ẍi Jacob.

²⁷Axa max yalon cham Labán bay axca ti': —C'amak, yuj wal dios ayach watx'c'al ayji wetok, yujtol max in nailok tol oj wali, xan ay is yaxilal Jehová wiban.

²⁸Al ayin jantak wal chach in tojlanej, ẍi cham Labán.

²⁹Max yalon Jacob: —Ojtak wali tzet max yun in mulnaj etok, c'al tzet max yun wilon no' a jobbejal no' ti'.

³⁰Ojtak tol jayc'on ch'an no' a jobbejal no' ti' yet max in jayi, axa tinani' mayal wal aj can no'. Ataxc'al yet max quin jay tu' max c'olic'al yak'on Jehová is watx'c'ulal eban. Xal tinani', ¿bak'in ok in chail yich wilon wet yetok eb xal wetbi c'al wuninal ti'? ẍi Jacob.

³¹—Jantak wal a tojol cha k'ana' ok wak'a', ẍi cham Labán. —C'amokab in tojol chak'a', asan tol chi wil no' a calnel ti' janic'okxa, ta ok cha' a c'ul tzet ok wala'.

³²Cha' in oc xol no' a calnel ti' tinani', cax chin pojon el masanil no yune' k'ekyin, no tz'ibyin, c'al no jasquiltak is tz'ibil, c'al no yune' chiwo tz'ibyin, c'al no' tol jasquiltak is tz'ibil. A no' tu' chi oc in tojolok.

³³Yuj tu xin, a yet chach apni oc elon no no' tu', no' chi wi' in tojolok tu', caytu' chi yun elontek in yikemal ayach. Ta a xol no' wet tu' ay no chiwo, ma no calnel tu' man tz'ibyinok, c'al man k'ekyinok, tol ipan ach welk'anen chi yal tu', ẍi Jacob.

³⁴Yunokab xin. Chi cha' in c'ul tzet chal tu', ẍi cham Labán.

³⁵Ac'al ton a' yet jun c'ual tu' max pojon el cham Labán masanil no mam chiwo tol tz'ibyin, c'al no' jasquiltak is tz'ibil, c'al no txutx chiwo soman sak janic'ok, yetok masanil no calnel k'ekyin, max yak'on bay is c'ajol.

³⁶Max yiontok eb is c'ajol no' najat, oxeb c'ual tec'banil bay max cancan Jacob. Axa canc'alcan Jacob yilon juntzanxa no' is calnel cham Labán tu'.

³⁷Ayman max na' Jacob. Max tzoc'on el is k'ablak te te' chi yik álamo, te almendra, c'al te castaño. Tz'ibibi max yut joson el is tz'umal te'. Ay sak c'al k'ek max yun yili yuj.

³⁸Cax max yaon oc juntzan k'ablak te tu' satak no calnel tu' bay chi yuc'a' no', a ton bay tu' chi sakchi no'. Satak wal no' ay pax oc te te' tz'ibibi yili tu', xan a yet chi jay yune' no', tz'ibibixac'al yili' no' chi jayi.

⁴⁰A masanil no tz'ibyin yune' chi jay tu', max pojcan el Jacob masanil no' xol no' yet cham Labán. Axca tu' max yut pojonc'al el cham Jacob tu' is calnel xol no' yet cham Labán tu'.

⁴¹Masanil no' tol watx', a yet chi sakchi no', cax chi yaon oc Jacob tu' te te' satak no' bay chi bet no' yuc'a', yet watx' chi yil no' te te' tu' yet chi sakchi no'.

⁴²Axa yet chi jay no' yatak wal ay, c'am chi yaay Jacob tu' te te' tu'. Yuj tu', a no' c'am yip yet cham Labán, axa no' watx' yet Jacob no'.

⁴³Axca tu' max yun yoc Jacob tu' beyomal. Xiwil is jobbejal no', xiwil eb nak is chekbej, cax xiwil eb ix is chekbej, xiwil no camello cax xiwil no burro.