Read Q'anjob'al Gn 32 Bible Online

Gn 32 - Q'anjob'al bible

Gn 32

¹Max lajwi tu', max beyc'altoj cham Jacob. Axa max yunej, max chalen ba yetok juntzan eb ángel yet Dios.

²A yet max yilon cham Jacob max yaloni: A cayti' is campamento eb ejército yet Dios, ẍi. Yuj tu' max yak' yik Mahanaim*fn* jun lugar tu'.

³Max chekontok cham Jacob juntzan eb is chekbej bay yul yet tx'otx' Seir, bay yul is makbej Edom, yet chi toj al-lay is yabixal bay Esaú, is yuẍtak tol lananxa tit Jacob yulak be.

⁴Max yalon is chekbanil bay eb axca ti': Alek bay cham wuẍtak Esaú tol: A oẍtak Jacob chi yaoc ba yalan a chekbanil, quex chi; cax che yalon paxok tol a yetok cham Labán max quin ayji ec' yin jun tiempoal ti'.

⁵A tinani' ay in wacax, ay in calnel, ay in chiwo, ay in burro, ay eb nak in chekbej c'al eb ix in chekbej. Chi waltok jun abix ti' ayach mamin wuẍtak, yujc'al chi wochej chin oc yin junc'ulalil etok, quex chi bay, ẍi Jacob.

⁶Axa yet max meltzoj eb nak chekbej tu xin, max yalon eb nak bay cham Jacob axca ti': —Mayal on betic' bay cham oẍtak; ti chi jayi. A wal caw ok ach ul chaonok. 400 wal winak ibil oc yuj, ẍi eb nak chekbej tu'.

⁷A yet max yaben Jacob juntzan tu', max xiwajok, max oc yin miman bilc'ulal. Lajwi tu xin, max pojon ec' eb anima ibil oc yuj, ca bulan max yutej, c'al no wacax, c'al no calnel, c'al no camello ibil oc yuj.

⁸Yujtol max na': Ta chi jayoc Esaú yin jun bulan, cax chi yak'len owal yetok, yak'ban tu' chi je' yel junxa bulan tu', ẍi cham.

⁹Lajwi tu' max txajli axca ti': Ach Jehová in Diosal, ach ton Diosal ach wichmam Abraham, c'al in mam Isaac, ach max ala' tol chin meltzoj bay in tx'otx'al c'al bay xol eb wican; max aloni tol ayachc'al oc wetok yet watx', watx' chin elocok.

¹⁰Caw wal man in mojok tol chak' a camc'ulal win, c'al a watx'c'ulal ayc'al oc wetok. Max in ec'tek bay a' aej Jordán yin tol asan ch'an jun in k'okoch ibil oc wuj; axa tinani', cabxa campamentoal chin elocok, caw wal ayxac'al tzet ay ayin.

¹¹Yuj wal dios, col in el yul k'ab wuẍtak Esaú. Caw wal chin xiwi talaj chi jay nak win, cax chi mak'on cam nak eb ix ix ti' c'al eb unin ti'.

¹²Ach max ala' tol watx'c'al ok in eloc oj. Max alon c'apaxok tol xiwil ok yun bisil winatil, axca wal yarenail a' mar, tol c'am chi je' bischaji, ẍi cham Jacob yin is txaj.

¹³A yet jun ak'bal tu' max cancan way bay tu', axa yet max k'inibi ajok max sic'on el xol masanil is tzet yetal ay yul is k'ab, is sabal bay Esaú:

¹⁴200 no txutx chiwo c'al 20 no mam chiwo; 200 no txutx calnel c'al 20 no icham calnel.

¹⁵30 no txutx camello yetokc'al yune' tolto max alji; 40 no txutx wacax, c'al lajonc'on no toro, 20 no' txutx burro c'al lajonc'on no mam burro.

¹⁶Yinxac'al aymanil max yak' cham Jacob junjun makan no' bay eb nak is chekbej, pojquiẍtak max yutej, max yalon bay eb axca ti': —Babjanektok, cax najat che yut e xol, ẍi cham.

¹⁷A bay nak inej oc jun bulan no' babel, max yal bay axca ti': —A yet ok a chalej a ba yetok cham wuẍtak Esaú, ta chi k'anlej ¿mactxel a patrón, c'al bay chach toji, mac yet no no', ibil oc oj ti'? ta ẍi ayach,

¹⁸cax chalon bay axca ti': A juntzan ti' sabalej ayach mamin Esaú yuj Jacob a chekbej. A a chekbej Jacob tu', tzakan wintak, cachi, ẍi cham Jacob bay.

¹⁹Axca tu' max yun yalon bay nak yet is cab makan max chektok, c'al bay nak yet is yox makan. Axca tu' max yun yalon bay masanil eb nak inej oc junjun bulan no no' tu': —A yet ok e chalen e ba yetok Esaú tu', jun lajanc'al che yut e yaloni.

²⁰Cax che yaloni tol a a chekbej Jacob tzakan jintak on, quex chi, ẍi cham bay eb nak chekbej tu'. Axca ti', chi na' cham Jacob xin, Tekan ok sicbok yowal c'ul Esaú yuj sabalej max wak' babjok in satak, catatu' ok wil-len wal oc in ba yetok; ta axca tu', ok mi in is cha' yin watx'il, ẍi.

²¹Axca tu xin max chek babjoktok masanil sabalej tu'. Axa cham Jacob xin, maxto cancan yet junxa ak'bal bay is campamento.

²²A yet jun ak'bal tu' max aj wan cham Jacob cax max yiontok eb xal yetbi cawanil, yetok c'apax eb ix cawan chekbej, c'al eb usluc'wan is c'ajol, cax max ec'tok eb bay taxbal bay a' aej chi yik Jaboc yetok masanil tzet ay.

²⁴Axa yet max cancan cham Jacob is tx'oklil, max yak'lej owal yetok jun winak masantac'al max sakbi.

²⁵Axa jun Cham tu' max yila' tol c'am chi ayc'ay Jacob tu', cax max mak'on is c'ojlub xub Jacob, axa yel weknaj is xub tu' yet chi yak'len eb owal.

²⁶Max yalon Cham tu' bay axca ti': —Bek in elok yujtol lananxa sakbi, ẍi. Max yalon Jacob bay axca ti': —C'am chach in bekilok, ta c'am chalcan junok watx' k'anej wiban, ẍi Jacob.

²⁷—¿Tzet a bi? ẍi Cham tu'. —Jacob in bi, ẍi cham.

²⁸Max yalon Cham tu' bay axca ti': —A tinani' majxa ek Jacob, palta Israelxa ok eka', yujtol max je' oj a teyelen a ba yetok Dios,*fn* c'al yetok anima, ẍi Cham.

²⁹—A tinani' al ayin tzet a bi ach ti', ẍi Jacob. Axa yalon Cham tu' axca ti': —¿Tzet yuj xan cha k'anlej in bi? ẍi bay. Cax max yaloncan Cham watx' k'anej yiban bay tu'.

³⁰Max yak'on yik Jacob Penuel*fn* jun lugar tu' yujtol max yal axca ti': Caw wal max wil sat co Mam Dios, palta ti' wal iquis into, ẍi cham.

³¹Lananxa yec'tok cham Jacob bay Penuel tu', max ajol c'u. Yujtol max k'ajtok is xub, xan toxac'al chi ay coxnajok chi beyi.

³²Yuj tu xin, c'am chi chi' eb yinatil Israel is tx'anil c'ojlub is xub no no', masantac'al yet jun c'ual ti' yujtol a bay is xub cham Jacob tu' max yab yail.