Read Q'anjob'al Gn 40 Bible Online

Gn 40 - Q'anjob'al bible

Gn 40

¹Lajwi tu', ay cawan winak max oc preso; a jun nak, chi ak'on is vino cham rey, axa junxa nak xin, yajaw yayji yin tzet chi yun watx'ji ixim pan chi lo cham. Ay is mul eb max oc bay cham.

²Yuj tu' xan max tit yowal cham yin eb.

³Max chek cham rey yalay octok eb yul preso bay yatut cham yajawil eb soldado chi taynen cham, a ton tu' ay c'apax octok José preso.

⁴Ac'ala' yul is k'ab José max yaoc cham yajaw yayji tu' eb nak cawan is mulnajwom cham rey tu'. Caw wal najatil max can eb nak yul preso.

⁵Ay jun ak'bal max oc is wayich eb nak cawan chekbej cham rey tu', junjun wayichej tu' ayc'al yelapnok.

⁶A yet k'inibalil max apni oc José yilon eb nak. Axa max yiloni caw wal ayoc eb yin bilc'ulal,

⁷cax max k'anlen bay eb: —¿Tzet yuj xan cusiltakxac'al yili e sat chi wila'? ẍi bay eb.

⁸—Ay wal co wayich max oc yet ak'balil ti', palta c'am mactxel cayti' chi je' yalon el ayon tzet wal yelapnok, ẍi eb nak. —¿Tom manak Dios chi coc'alnen el wayichej? Alek ayin tzet max e wayichnej tu', ẍi José tu' bay eb.

⁹Yuj tu' a nak chi ak'on is vino cham rey, max oc ijan yalon is wayich tu' bay cham José axca ti': —A yin in wayich max wil yin jun an uva,

¹⁰tol ay oxeb is k'ab an. Max wil yelol is wol, cax max yak'on is xumaquil, axa an xumac tu', max oc an yin racimo uvail cax max k'inbi.

¹¹Max wiloni tol mitx'bil aj is copa cham rey wuj, cax max wiontek an uva tu', max in pitz'on el yal an yul is copa cham rey tu' cax max waon oc yul k'ab cham, ẍi nak.

¹²Max yalon José bay axca ti': —Tix chi yal elapnok a wayich ti': A an oxeb k'ab uva max el tu', oxeb c'u chi yala'.

¹³A yet cabej tinani' ok beyc'ulnej el cham rey a mul. Ok lajwok tu' cax ok ach yaon oc cham yin a mulnajil junelxa; ac'ala' ach ok ak' pax is copa cham rey tu'.

¹⁴A yet ok yion ba jun chi wal ayach ti', chin a natek bay cham rey tu' yet watx' chin el c'apaxtok bay yul preso ti'; ok'okab a c'ul win.

¹⁵Ayin ti' axca tol elk'anebil intek bay xol eb nak hebreo. Man in mojok ayin oc yul preso ti' yujtol c'am wal jabok tzet tol yob max wunej, ẍi José.

¹⁶A yet max yaben nak yajawilal eb watx'nem pan, tol watx' max yun watx' alnen el José is wayich nak chi ak'on is copa cham rey tu', max yalon pax nak axca ti': —Ayin ti' max in wayichnej tol ayajtok oxeb motx ixim sak pan yiban in jolom max wila'.

¹⁷A yul jun yaliẍ motx yet is yox ayajtok yiban in jolom tu', xiwil makanil pastel ayaytok yul yet chi lo' cham rey tu'; palta axa no tz'iquin max jay ul loon ajtek ixim yul te motx tu', ẍi nak.

¹⁸Cax max yalon José bay nak axca ti': —A chi yal elapnok a wayich tu': a oxeb motx tu' yechel oxeb c'u,

¹⁹xan a yet cabej tinani', a tu' ok beyc'ulnej el cham rey tzetbil yayji oc a mul. Lajwi tu' cax ok chekon cham yilay el a jolom, cax ok ach aj t'unan yin jun te te'; axa no ostoc ok ul chiontok a mimanil, ẍi José tu' bay nak.

²⁰Cabji wal yalon el José is wayich eb nak cawan tu', cax max chaon cham rey tu' k'inal is yabilal. Max yawten cham masanil eb nak mimek yajaw ayoc yin yajawilal yetok cham. Satak wal eb mimek yajaw tu' max bet ilay eltek eb nak cawan ayoc yul preso tu'.

²¹Nak chi ak'on is vino cham rey, max alay oc nak yin is mulnajil junelxa yet chi yil nak yak'lay is vino cham.

²²Axa nak yajaw yilomal tzet chi yun watx'ji ixim pan, max chek cham rey yet chi aj t'unan nak axca wal max yut yalon José.

²³Palta majxac'al tit cham José yul is c'ul nak chi ak'on is vino cham rey tu'.