Read Q'anjob'al Gn 43 Bible Online

Gn 43 - Q'anjob'al bible

Gn 43

¹Caw wal ow yak'on wajil yul is conob eb nak.

²Max lajwi el ixim trigo max bet yi' eb nak tu' loon cham Jacob yetok yuninal, max yalon pax cham bay eb nak axca ti': —Asek junelxa bay Egipto yet che man janic'okxa tzet chi co lo', ẍi cham.

³Max yalon pax nak Judá axca ti': —Caw wal watx' max yut yalon cham chi txonwi trigo tu': Tatol c'am che yitek nak e yuẍtak tzunan unin tu', c'amxa chi wil e sat cayti', ẍi cham.

⁴Yuj wal tu xin, ta chi toj nak juẍtak ti' jetok, chon toj manoj trigo tu'.

⁵Ta c'am chi je' toj nak xin, c'amxa chon toj on, axca wal max yal cham txonom trigo tu': Tatol c'am che yitek nak e yuẍtak tzunan unin tu', c'am chex jayoc in satak, ẍi cham.

⁶Max yalon cham Israel axca ti': —¿Tzet yuj xan max e yal bay jun cham tu' tatol ay junokxa e yuẍtak? Caw wal chin e yaoc yin bilc'ulal chi wabej, ẍi cham.

⁷Max tak'wi eb nak axca ti': —Max k'anlej el cham tzet jayji oc on, c'al tzet inatilejal on. Max k'anlen c'apaxok ta ayto ec' co mam on, ta ayto c'apax juẍtak on. Yuj tu' xan max jal bay tol ayto ec' co mam cax ayto junxa juẍtak. ¿Tokwal jojtak on xin tatol chi yal cham tol chi jitok nak juẍtak on ti'? ẍi eb nak.

⁸Max yalon pax nak Judá bay is mam tu' axca ti': —Ta c'am chi yochej a c'ul chon cam yuj wajil co masanil, chatok nak juẍtak ti' jetok. Ayin chin wabaj in ba in taynen nak, axca tu' ti wal chon toj yin aymanil.

⁹Ayin chin wabaj in ba yuj nak ta ay tzet chi oni; ta c'amxa chi jay nak wuj, caw wal yob chin can yul a sat.

¹⁰Ta maj ec' co tiempo cayti', mayal xam jak' cayelok tinani', ẍi nak.

¹¹Max tak'wi cham mamej tu' axca ti': —Ta c'amxa tzet watx' chi jutej, yunokab axca che yal tu', asek. Iektok janic'ok sabalej bay cham. A juntzan tzet yetal watx' chi ch'ib cayti', a' che yitok bay: bálsamo, no yalcab, perfume, mirra, nueces, c'al almendras.

¹²Iektok e tumin yet che manon ixim trigo, cax che yion meltzoj ch'en tumin max yak' meltzoj eb nak yulak is ti' e coẍtal tu', tekan toc'al max c'ay is c'ul eb nak, xan ayaytok ch'en.

¹³Iektok nak e yuẍtak ti', cax chi toj e yilon pax cham yajaw tu'.

¹⁴A Dios, Cham Chi Je' Yuj Masanil, a' ok oc yin is nabal cham tu' cax ok bekchaj el nak e yuẍtak Simeón, cax watx' chi yun meltzojtek nak Benjamín ti' e yetok. Axa ayin ti xin, ta chin can yin c'am c'ajolal, canok in ab yin c'am c'ajolal xin, ¿tzetto wal chi wutej? ẍi cham Israel.

¹⁵Max lajwi tu xin, cax max yaon aytok eb nak sabalej tu' yulak is coẍtal, c'al ch'en tumin. Max yiontok eb nak nak Benjamín. Max toj eb bay Egipto. Axa yet max apni eb satak cham José,

¹⁶max yilon cham tol ajun nak Benjamín; max yalon cham bay yilomal yatut axca ti': —Itok juntzan eb nak ti' bay watut, cax chak'on mak'lay cam junok no wacax, cax chi watx'ji junok loj, tol ok low eb nak wetok yet chuman ti', ẍi cham José tu'.

¹⁷Lajwi tu' max ilaytok eb nak yuj yilomal yatut tu', max yiken tzet max yal José.

¹⁸Caw wal max xiwaj eb nak yujtol max ilaytok eb bay yatut cham, cax chi yal-len eb bay junjun axca ti': —Trampa jun ti', tekan yuj ch'en tumin max yak' meltzoj eb nak ayon, yuj tu' chon ilaytek cayti', tekan ok on yaoc eb nak yin mosejal yetok no' co chej ti', ẍi eb nak.

¹⁹Yuj wal tu', a yet max apni oc eb nak bay puertail na tu', max oc tean eb yin cham yilomal yatut tu',

²⁰cax max yalon eb nak axca ti': —Mamin, ilabi, ayon ti' maxax on ulic' manoj trigo yet junel;

²¹axa yet max on meltzoj on, max on way yul be. A yet max co jakon co coẍtal, max jiloni tz'akan ayaytok ch'en tumin max jak'balnej co manon co trigo yulak ti' co coẍtal. Max jipaxtek ch'en tumin tu' junelxa tinani' cax chi jak'on ch'en yin tz'akan ayach.

²²Tx'ok max jipaxtek is tojol ixim ok co man pax tinani'. Man jojtakok on, mac max aon aytok ch'en tu' yul is ti' co coẍtal tu', ẍi eb nak.

²³Max yalon cham tu' axca ti': —C'am tzet che na' yuj jun tu'; c'am chex xiwi. A Diosal e mam e yetok max aon aytok ch'en yul is ti' e coẍtal tu' junelxa. Ayin max in cha ch'en tumin max e yak' tojolok e trigo max e yi' tu', ẍi cham bay eb. —Max lajwi tu', max yion eltek cham nak Simeón bay yul preso, cax max elol nak bay ayic' eb nak uẍtakejal tu'.

²⁴Max ilaytok eb nak masanil yuj bay yatut José, max yak'on aej yet tx'ajil yakan eb, max ak'lay c'apax lobej is chej eb.

²⁵Lajwi tu xin, max yionxac'al ajtek eb nak yulak is coẍtal sabalej ok yak' bay José yet ok apnok oc yet chuman; yujtol yojtakxa eb nak tol ok low eb yetok.

²⁶Axa yet max apni oc José xin, max yak'on eb sabalej tu' bay, max ay nojan eb sat tx'otx' bay satak José.

²⁷Max lajwi tu' cax max k'anlen cham bay eb nak, ta watx'c'ulalc'al ay eb, max yalon c'apaxok: —¿Jantak yalon c'ul icham e mam max e yal ayin? ¿Iquis tom ec' cham? ẍi bay eb.

²⁸Max ay nojan eb nak max yalon eb bay: —A cham co mam tu' on, ayto ec'ok, watx'toc'al is c'ul cham, ẍi eb nak.

²⁹Axa max yilon oc cham nak Benjamín is yuẍtak, nak junej is txutx yetok, max yaloni: —¿A mi nak e yuẍtak tzunan unin max e yal ayin ti'? ẍi. A ton nak, ẍi eb. Yak'okab Dios watx'c'ulal eban, ẍi cham bay Benjamín.

³⁰Max lajwi yalon axca tu', caw wal miman chi cam c'ul yin is yuẍtak tu', max oc pitz'naj yin is c'ul tol chi ok' yuj, axa toj lemnaj yul is cuarto yet chi ok' bay tu'.

³¹Yet max lajwi yec'tok is cusc'ulal tu', max tx'ajon el is sat, cax max eltek; max yaloni: Iekxa eltek co lobej tinani', ẍi cham.

³²Jun is meẍa José tu' is tx'oklil. Tx'ok junxa meẍa bay max oc eb nak yuẍtak tu', cax tx'ok pax junxa meẍa bay chi low eb aj Egipto chi lowc'alta' yetok José tu'; yujtol a eb nak aj Egipto tu' ay yowalil ta junnej chi low eb nak yetok eb nak hebreo.

³³A eb nak yuẍtak José tu' yin txolilal max yun yay chotjab eb nak yuj is chekbej José, atac'ala' is yabilal junjun eb, yujtol axca tu' max yut yalon José tu', nak babel, masantac'al nak tzunan unin. Toxac'al chi c'ayaj c'ul eb nak, cax chi yil-len oc ba eb.

³⁴A loj ay bay meẍa José, a' max ak'lay bay eb. Axa pax bay nak Benjamín xin, oyebto bijan ec'ban yet nak max ak'lay yintak yet juntzanxa eb nak tu'; catatu' max low eb, c'al yuq'uena' eb yetok yin tzalojc'ulal.